Read Western Highland Purepecha San Mateo 26 Bible Online

San Mateo 26 - Western Highland Purepecha bible

San Mateo 26

¹Enga Jesusi k'amarapka íni ambe uandani, jurhengorherichani arhiaspti:

²“Eskajtsï na mítetini jakaia, tsimani jurhiatekua jimbo Páskueri k'uínchenhaati ka Acheti Uájpanksï jupikaati ka krúsirhuksï cháparhataati.”

³Ka tátecheri urhejtsïkuricha ka juramukua jurhentpirichaksï ka achamasï iretarhu anapuechaksï, Kaifasioksï tángorhentaspti enga táta k'éripka,

⁴ka eratsekuntasptiksï ka sésiksï úskuspti néna engaksï Jesusini jupikapiringa ka uándikunksï.

⁵Ka arhijperasptiksï: “K'uínchekuarhu nómbe, jimboka iretarhu méntku ísï jánhaaka.”

⁶Enga Jesusi Betania jápka, Simonio engaksï xúta jukarhekorheti arhimpka,

⁷uarhiti ma andarheraspti tsúntsu ma jinguni p'untsumekua ambakiti jatsiratini, ka Jesusini atajtsïkuspti, enga Jesusi t'ireni jápka uaxakatini.

⁸Íni ambeksï exerini, jurhengorherichaksï ikiaspti ka uandasptiksï: “¿Andisï ísï ambendarhenha?

⁹Inde úpirindi jukaparhakua jimbo antaranhantani ka tuminani kómu jándichani íntsaani.”

¹⁰Enga Jesusi kurhajchaapka, arhiaspti: “¿Andijtsïsï íni uarhitini xáni ambe arhiparhatani jaki? Inderini kánekua sési ambesï úcheti.

¹¹Kómu jándichantsï méntku xéani jauaka, ka ji k'óruni no méntkisï chánksïni jinguni jauaka,

¹²inderini p'untsumekua atarhentaxati jimbokani ji jatsinhantaakia.

¹³Sési jimboksïni arhixaka eska náni uéjki ma parhakpeni enga i jimbanhe aiangperata arhijtsïkperanhaaka, i úkua uandanhantaati ka inde uarhiti míanhantaati.”

¹⁴Ma enga témbeni tsimani jurhengorhericha jingunipka, enga Júdasï Iskariote arhinhempka, niraspti tátecheri urhejtsïkurichani uandaxekuani,

¹⁵ka arhiaspti: “¿Ambejtsïni íntskua, ka jíksïni Jesusini intsïnharhitaaka?” Ka imaksï ma ekuatse témbeni taiakata íntskuspti.

¹⁶Ka Júdasï jiáni uératini jirinhakuntaxapti na enga jatini sési japiringa Jesusini intsïnharhitaani.

¹⁷Imani jurhiatekua jimbo enga k'urhinda no xarhipiti jukariri k'uínchekua uénakorhejka, jurhengorherichaksï Jesusini andarheraspti ka arhistiksï: “¿Naniri uékasïnki eskachi Páskueri t'irekua úntaaka?”

¹⁸Ka ima uandaspti: “Ni je iretarhu, ka achetintsï ma arhiaka, eska jurhentpiri uandaxaka eska jurhiatekua niáranchaskia; ka eska Páskua jimbo jurhengorhericha jinguni chénio nitamakorheaka.”

¹⁹Ka jurhengorherichaksï úspti ísï eska Jesusi na juramukuapka, ka jimaksï péraspti enga Páskueri anhapiringa.

²⁰Chúrekua, Jesusi témbeni tsimani jurhengorherichani jinguni uaxakaspti t'ireni.

²¹Ka engaksï t'ireni jápka arhiaspti: “Sési jimboksïni arhisïnga eskarini cha ma ísï intsïnharhitpeaka.”

²²Ka jurhengorherichaksï kánekua kómu p'ikuarheraspti ka mándanksï uénaspti kurhamarheni: “¿Tata, ji?”

²³Ka ima arhiantaspti: “Ima enga jíndeni jinguni urhanirhu atarhutani jaka, imarinisï intsïnharhitpeati.

²⁴Sési jimbo Acheti Uájpa níntaati, ísï eskamendu imeri ambe na karakata jaka, k'óru ¡Áke ima enga Acheti Uájpani intsïnharhitpeaka! ¡Sánderu sésipirindi eska no andajpenupiringa!”

²⁵Ka Júdasï, ima enga intsïnharhitpepiringa arhispti: “¿Jurhentpiri jíxamueua?” Ka Jesusi arhispti: “T'úri ísï uandaska.”

²⁶Ka engaksï t'ireni jápka, Jesusi p'íkuspti kurhindani ka újchakuraspti ka jurhengorheri jémbechani arhustakuaspti arhiaparini: “Jupika je ka a je, i jucheti k'uiripekuesti.”

²⁷Ka itsïmatarakua p'íkutini, diósïmaimukua arhispti ka íntsaaspti arhiaparini: “Iámenduecha marhuata je,

²⁸jimboka i jucheti iurhiriska, jimbanhe pakatperakueri enga uánekuechani jimbo tsîncheaka k'amanharhintskua p'uantsperantskua jimbo.

²⁹Sési jimboksïni arhixaka eska íni jásï úbasïri itsïrhukuani nóteruni auaka, ima jurhia jamberi engani na ménderu cha jinguni, kauikua jimbanhe auaka jucheti Tateri irechekuarhu.”

³⁰Engaksï na k'amarapka Diósïri pirekuechani pireani, Olibusï juátarhuksï niraspti.

³¹Ka Jesusi jima arhiaspti: “Iámenduechajtsïni nóteru mintsikaaka, nóchka karakata jarhaski andi: ‘Karichi erangutini uándikuaka ka karichichaksï etsajkamaati.’

³²Ka tsíntatini, Galileaksïni urhechepaaka.”

³³Ka Pédru arhispti: “Náuejkiksïni iámenduecha jurajkuni, jíkini nómeni jurajkuaka.”

³⁴Ka Jesusi arhispti: “Sési jimbokini arhixaka eska iásï chúrekua, enga t'arhechu nótki uerani jauaka, tanimu xanharirini no míteni uadaakia.”

³⁵Ka Pédru arhispti: “Nómenikini no míteni uandaaka, nájtukani t'úngeni jinguni uarhiaka” ka máteru jurhengorherichaksï májkueni arhisïrempti.

³⁶Xásïksï Jesusi Getsemani niáraspti ka jima arhiaspti: “Ixu uaxaka je, engani jamberi ji niraska kómarhani.”

³⁷Ka Pédruni ka Sebedeo uájpechantku pájtaaspti, ka kánekuamendu uénaspti kómu p'ikuarherani.

³⁸Ka Jesusi arhiaspti: “Kánekua kómu p'ikuarhenhexaka, enajkirini uarhikua niárancheia; pámbejtsïni je ka ásï k'ui je.”

³⁹Sántku xanharatini, tinguixurhispti tsérhukuani andaskueraspti ka kómarhaspti uandaparini: “Jucheti Táte, engari ambe újka, kénditacherini íni nósesi jámarhani; k'óru ásï ima úkorhe enga ji uéjka, úkorhe eskari t'u na uéjka.”

⁴⁰Imeri jurhengorherichani andarhentaaspti ka imaksï kuíxapti ka Pédruni arhispti: “¿Andi nómendujtsïni úski sóndi jukambetani?

⁴¹Tsínharhitini ja je ka kómarhini ja je, ásïksïni nósesi jásï ande. Sési jimbo espiritu uékaxati, k'órujtsï cha no úsïnga p'íngukorheni.”

⁴²Ménderu uéntaspti nirani kómarhani uandaparini: “Jucheti Táte, engari íni jásï ambe no újka kénditani, úkorhe eskamenduri t'u na uéjka.”

⁴³Ka k'uanhatsentaspti ka jurhengorherichaksï k'uíxaptiteru, jimbokaksï uarhisïrempka k'uínhchani.

⁴⁴Ka jima jurajkuaspti ka tanimu xanhari uéntaspti kómarhani.

⁴⁵Ka xásï jurhengorherichani andarhentaaspti ka arhiaspti: “¿Andi k'uíxakiterujtsï, ka mintsikorheni jarhani? Iásïstia enga Acheti Uájpa k'amanharhintatichani intsïnharhitanhaaka.

⁴⁶¡Jauara je, júia je! Exe je, janoxatiia ima engarini intsïnharhitpeaka.”

⁴⁷Jesusi uandaxaptiteru enga Júdasï niárapka, ima enga témbeni tsimani jurhengorhericha jingunipka, ka uánekuechaksï ima jinguni jámaxapti, chkári ka atajpetarakuechanksï jupikatini, engaksï tátecheri urhejtsïkuricha ka achamasï iretarhu anapuecha axaapka.

⁴⁸Ka Júdasï t'úini arhiarixaptia: “Néni engani ji putinharhikuaka, imesti, jupika je.”

⁴⁹Ka Júdasï Jesusini andarheraspti ka arhini: “¡Jurhentpiri!” Ka mátirku putinharhikuspti.

⁵⁰Ka Jesusi arhispti: “Pámpiri, ¿Amberisï úni juki?” Ka máruksï andarheraspti ka Jesusinksï jupikaspti.

⁵¹Ka ma enga Jesusi jinguni jámani jápka, atajpetarakua p'íjparhaspti, ka k'éri táteri jántspirini ma kachujpandikuspti.

⁵²Ka Jesusi arhispti: “Inchaarhakorhentsï atajpetarakuani, jimbokaksï iámendu ima engaksï atajpetarakua úrajka, indeni jimboksï uarhiati.

⁵³¿Andi nójtsï sáni eranhaskasïnki eskani ji úaka jucheti Táteni kómarhini? Ka ¿Andi imarini no ua témbeni tsimani míli ánjelichani axacheani?

⁵⁴¿Ka néna úkorhea enga karakata arhijka eska k'uanisïnga ísï úkorheni?”

⁵⁵Jima Jesusi arhijpespti: “¿Andijtsïnisï chkári ka atajpetarakuechani jinguni juki jupikani, enajkini ji sïpajkurha ambe? Mándani pauani jarhaska tiósïo jurhentpeni ka nójtsïni méni jupikaska.

⁵⁶K'óru i ambe úkorhexati jimboka jatsiska ísï úkorheni, eskaksï Diósïri uandaricha na karaka.”

⁵⁷Ima engaksï Jesusini jupikapka, k'éri táta Kaifasinksï pákuspti, ka jimaksï tángorhentatixapti juramukua jurhentpiricha ka iretarhu anapu achamasïchajtu.

⁵⁸Ka Pédru k'éri táto ekuarhu jamberi chúxapaspti. Inchaspti ka p'urhejkutichani jinguni uaxakaspti exeni ambe enga xáni úkorhepiringateru.

⁵⁹K'éri tátecha ka k'éri tángorhentskua, nónaksï Jesusini uarhikua k'amanharhitantani, chkuádirechanksï máru jirinhaaspti eskaksï chkuándirakua ambe arhiparhatapiringa,

⁶⁰ka nómbemaksï exekuntasïrempti, nájkikuraksï uánekua mámaru ambe arhiparhatani jarhempka eska ísïspka, ka tsimanderkuksï niáraspti,

⁶¹ka uandasptiksï: “Inde uandasti: ‘Ji úaka Acha Diósïri k'umanchekuani xerentani ka tanimu jurhiatekua jimbojku máteru úntani.’ ”

⁶²K'éri táta jauajpatsespti ka kurhamarhespti: “¿Nóri mókukurhea? ¿Ambeksïnisï xáni arhiparhatani jáki?”

⁶³Ka Jesusi no kurhakorhespti. Ka k'éri táta arhispti: “¿Diósïni jimbojtsïni arhi, t'úsï Krístue, t'úsï Diósï Uájpe?”

⁶⁴Ka Jesusi arhispti: “T'úri uandaska. Ka ístuksïni arhixaka, eskajtsï iásï uératini exeaka Acheti Uájpani Diósïri uinhapekuarhu jurhijkani uaxakatini jarhani, ka auandarhu anapu xúmurhu ísï jurhani jarhani.”

⁶⁵Ka k'éri táta xukuparhakuani karunhentaspti ka ikiatintku uandaspti: “¡Diósïni útakusti! ¿Ambeteruksï úni xánderu ambe arhiparhatani jaua? Kurhajchakorheskajtsïa

⁶⁶¿Nájtsï exesïnki?” Ka imaksï arhispti: “¡Uandikukuesti!” Arhisïremptiksï.

⁶⁷Ka t'uánharhikuspti ka ch'atarhuskanksï ka máteruksï páksandikuspti,

⁶⁸arhiparinksï: “¿Krístu, arhijtsïni nékinisï ata?”

⁶⁹Enga Pédru ekuarhu uaxanupka, uarhiti jántspiri ma andarheraspti ka arhini: T'újturi Jesusi, Galilea anapu jinguni jámaxapka.

⁷⁰Ka ima iámenduecha japarini no jiókorhesïrempti uandaparini: “No míteska ambe engarini arhini jaka.”

⁷¹Uéntatini, máteru exespti ka arhiaspti imechani engaksï jima jápka: “Indejtu Jesusi, Nasareti anapu jinguni jarhaspti.”

⁷²Ka ménderu Pédru no jiókorhesïrempti Diósïni ónharhiparini: “¡Ji indeni no míteska!”

⁷³Ísï tátsekua andarherasptiksï máru engaksï jima jámani jápka, ka Pédrunksï arhispti: “Sési jimbo t'újturi imecha jinguniska, míchakukorheskari.”

⁷⁴Jimakani Pédru uénaspti útantani ka Diósïni ónharhiparini uandani: “¡Ji indeni achetini no míteska!” Ka t'arhechu jimajku ueraspti.

⁷⁵Ka Pédru míjpaaspti enga Jesusi arhipka: “T'arhechu nótki jamberi uerani jauati, ka t'úrini tanimu xanhari no míteni uandaakia”. Ka Pédru uéntatini, jurajkutakorhentaspti uerani.