Read Western Highland Purepecha San Mateo 4 Bible Online

San Mateo 4 - Western Highland Purepecha bible

San Mateo 4

¹Tátsekua Espiritu Jesusini jimesï páspti enga nónema irekaka, eska nóambakiti ts'éjkupiringa.

²Ka tsimani ekuatse jurhia k'arhinda jatinia, k'arhimaspti.

³Ka nóambakiti andarheraspti ka arhini: — Ekari sési jimbo Diósï uájpeka arhia arini tsakapuechani eskaksï kurhinda úkorhentaaka.

⁴Ka Jesusi mókukuntaspti: — Karakata jarhasti: “No k'urhinda jimbojkusï irenhaati, uandakuechani jimbojtu irenhaati enga Diósï uandauajka.”

⁵Tátsekua nóambakiti ireta újchakurakatarhu páspti ka k'éri tiósïo iótakuarhu péraspti

⁶ka arhispti: — Ekari Diósï Uájpeka, ixu uératini k'uanikurhi, nóchka karakata jarhaski andi: Diósï ánjeli jémbechani axauati eskaksïni kuájchakuaka. Ka imaksïni no jurajkuati eskari andatseraaka, ka eskari tsakapurhu ma no téksarhutaaka.

⁷Ka Jesusi mókukuntaspti: Ka ístu karakata jarhasti: “Ásï jáma chéti Acha Diósïni ts'éjkuni.”

⁸Ka k'amarani jámania, nóambakiti k'éri juátarhu ma páspti ka iámendu parhakpeni anapu juramukuechani exeraaspti ka na engaksï xáni sési jápka,

⁹ka arhispti: — Iámendu íni ambekini íntskuaka, engarini t'inguixurhichetini k'éri ambe arhiska.

¹⁰Ka Jesusi arhispti: — Kéndiku nóambakiti, jimboka karakata arhisïnga: “Chéti Acha Diósïndi k'éri ambe arhiaka ka imantkurisï marhuakuaka.”

¹¹Jiájkani nóambakiti Jesusini jurajkuspti ka ánjelichaksï jurhaspti ka marhuakuxaptiksï.

¹²Enga Jesusi mítepka eska Juánu ónhakata jarhaspka, Galilea kuanhatsentaspti.

¹³Tátsekua Nasareti uéakuspti ka Kafarnaumi niraspti irekani, k'éri iretarhu enga japundarhu uanamukutini jaka, jimesï engaksï Sabuloni uájpecha ka Néftali uájpecha irekapka.

¹⁴I ambe ísï úkorhesti, ísï eska Diósïri uandari Isaiasi uandaka:

¹⁵“Sabuloniri ka Néftaliri echeri, enga Jordanirhu parhikutini jaka, enga japundarhu uanamukutini jaka, Galilea engaksï no jakajkuticha irekaka.

¹⁶Ireta enga pájpakandu irekani jápka k'éri eramarhandekua exesti, ka engaksï uarhikueri k'umandarhu irekapka, eramarhandekua kánekua t'íntskakuaspti.”

¹⁷Jiájkani uénaspti Jesusi arhijtsïkpeni ka uandani: “Diósïni andarhentsï je, jimboka auandarhu anapu irechekua janoskia.”

¹⁸Jesusi Galilea anapu japundarhu uanamukuni nitamaxapti ka Simonini exespti, imani engajtuksï Pédru arhimpka ka erachi jémba Andresïni, uarhorakuechanksï k'uanimaani jarhani jimbokaksï kurucha p'itamatispka.

¹⁹Ka Jesusi arhiaspti: — Chúxapujtsïni je, ka jíksïni k'uiripu uarhori úaka.

²⁰Ka imaksï jurarkuaspti uarhorakuechani ka chúxapasptiksï.

²¹Sántku urhepatini tsimani erachichantu exeaspti, Jakobuni ka Juánuni, Sebedeo uájpechani engaksï tátjemba jinguni uarhorakuechani sïriantani jápka, ka ióarhiaspti.

²²Ka imaksï jurarkuspti icharhutani ka tátjembani ka chúxapasptiksï.

²³Tátsekua Jesusi iápuru Galilea ísï jámasïrempti, iretarhu anapu tángorhentskuecharhu, jimbanhe aiangperakua ka irechekueri ambe uandantaparini, ka mámaru jásï p'amenchakua ambakerpentasïrempti ka iámendu jásï uandanheatechantu ísï.

²⁴Iámu Síria Jesusiri ambe mítekorhespti ka pákuasptiksï iámendu imechani engaksï mámaru ambe jimbo nósesi p'ikuarherempka: Engaksï kómu p'ikuarherempka ka iámendu jásï p'amenchatichani, ka engaksï nóambakitichani incharhekorheatini jápka, ka engaksï p'íntani jámempka ka engaksï no úempka xanharani ka Jesusi iámenduechani ambakerantaaspti.

²⁵Ka uánekuaksï Galilea anapuecha ka Dekapolisi anapuecha ka Jerusaleni ka Judea ka iurhekua Jordanirhu parhikutini anapuechaksï Jesusini chúxapaspti.