Read Western Highland Purepecha San Mateo 6 Bible Online

San Mateo 6 - Western Highland Purepecha bible

San Mateo 6

¹“Ásï jáma je uánekuechani japarini sési pakarakuekani, sési ambe úrini, jimboka ekajtsï ísï jámaska, chári Táte enga auandarhu jaka nómbemaksïni íntskuati.”

²“Ka engari no jatsikorherichani jarhuatauaka, ásï méntku imani uandaparini jáma, ísï eskaksï na jámka ísku ísï uandaricha, k'umanchekua tángorhentskuecharhu ka xanharu jimboksï uékani eskaksï k'éri ambe arhinhaaka. Sési jimboksïni arhisïnga, eskaksï ima andakua intsïnhaskia.

³K'óru t'u na engari jatini no jatsikorherini ma jarhuataaka, ásï míte chéti jájki uikixkandani ambe enga jurhijkandani íntspeka,

⁴eska sïpatekuarhkueuaka chéti jarhojperata ka chéti Táte engakini sïpatekuarhku exejka, imakini maiamuati.”

⁵“Na engari jatini Diósïni uandajpaaka, ásï xáxe eskaksï ima engaksï ísku ísï uandajka, jimbokaksï ima tsitisïnga anhaxurhitini k'umanchekua tángorhentskuecharhu ka terurukuecharhu uandamukukorheni; sési jimboksïni arhisïnga eskaksï ima maiamunhatixakaia.

⁶K'óru t'u, na engari jatini Diósïni uandajpaaka, inchakorhentsï ka mínhakorheni ka jandiojku chéti Táteni aiangukorhe, ka chéti Táte enga sïpatekuarhujtu exejka, imakini maiamuati.”

⁷“Ka ekari Diósïni uandajpaaka ásï mémechani uéntsï méntkueni arhini ísï eskaksï ima engaksï no jakajkujka, engaksï xáni uandauandametini ísï eratsejka eskaksï ísï kurhanhaaka.

⁸Ásïchka ts'éndakuantsï je, jimbokajtsï nótki jamberi aianguni jauaka chári Táteni, ka ima t'uíni mítetini jarhasïndiia ambejtsïsï uétarhenchani jarhajki.

⁹Cháchka arisï kómarhijpekorhe je: ‘Táte, engari auandarhu jaka, k'éri ambeskari, chéti jakangurhikua kánekua k'éri ambesti.

¹⁰Chéti irechekuajtsïni janoche. Úkorhe parhakpeni ísï eskamenduri t'u na uéjka, májkueni eska auandarhu na úkorheni jaka.

¹¹Íntskujtsïni iásï, mándani pauani anapu t'irekua.

¹²Púachentajtsïni ambe engachi nósesi útspeka, ísï eskani jucha na púakuantajka imechani engajtsïni nósesi úcheka.

¹³Ásïjtsïni jiáreta eskachi ísku ambe niátaaka, kénditachejtsïni nósesi jásï ambe. [Jimboka chétiska Juramukua ka uinhapekua ka k'érikua méntku isï. Ka ísïue.]’”

¹⁴“Ísï jimbo ekajtsï cha púatspentaska ambe engaksïni nósesi úcheka, chári Tátejtuksïni, enga auandarhu jaka, púachentaati;

¹⁵ka ekajtsï cha no púatspentaska, chári Tátejtuksïni no púachentauati chári k'amanharhintskuechani.”

¹⁶“Ekajtsï k'arhinda jauaka, ásï kómu jánharhintsï je, ísï eskaksï ima engaksï ísku ísï uandajka, engaksï kómu nínharhiparini xarhatakorheni úejka eskaksï k'arhinda jarhasïnga; sési jimboksïni arhisïnga eskaksï ima maiamunhatixakaia.

¹⁷K'óru t'u na engari jatini k'arhinda jauaka, jupanharhikorhe ka ambajtsïkorhe,

¹⁸eskari no xarhatatspeaka eskari karhinda jarhasïnga ka Tátentkuri xarhatakuni engari t'újku p'ikuarhenheparini újka, ka chéti Táte enga iámendu ambe exejka, imakini maiamuati.”

¹⁹“Ásï parhakpeni anapu jatsikorhekua kánerakorhe je, ixu enga seperi arhajka ka púni ka tereni ka engaksï sïpajkurhecha sïpajka.

²⁰Sánderu sáni auandarhu anapu jatsikorhekua kánerakorhe je, jini enga seperi no arhajka ka no tereni ka engaksï sïpajkurhecha no újka sïpani.

²¹Jimboka nani enga chári jatsikorhekua jauaka, chári mintsitajtu jima jauati.”

²²“Éskua xékorhetarakuesti; ísï jimbo eka chéti éskua ambakeka, t'úri iámu t'íkjandu jauaka;

²³ka enga chéti éskua no ambakeka, iámuri pájpakandu jauaka, ka nóri úaka sési erajkuni engari iámu pájpakanhetini jaka.”

²⁴“Nónema úsïndi tsimani achechani marhuakuani, jimboka ima ma ísïni kurhunheaka ka máteruni xénhchani, o ima ma ísïni sánderu sési kámaati ka máteruni ísku exeni. Nójtsï úaka Diósïni marhuakuni ka jatsikorhekuantu marhuakuni.”

²⁵“Ísï jimbo, jíksïni arhixaka: Ásï uandanhea je chári tsípekua jimbo, ambejtsï t'irea ka ambejtsï itsïmaa o xukuparhakua ambe jimbo ¿Andi no tsípekua sánderu jukaparhakueski eska t'irekua? ¿Ka andi no anhanhatakua sánderu jukaparhakueski eska xukuparhakua?

²⁶Exea je káratichani, nóksï tsíri jatsisïndi ka níksï p'ikuntajki ka níksï xanini patsarakua jatsijki; ka k'óru chári Táte auandarhu anapu t'ireraasïndi. ¿Andi nójtsï cha sánderu jukaparhaski eskaksï káraticha?

²⁷¿Ka ne ua cha ma ísï náuejki xáni jángorhentani, imeri irekuani ma jurhiatekua kuturani?

²⁸¿Ka andijtsïsï xukuparhakua jimbo uandanheajki? Exea je, na enga jukajka tsïtsïki juátarhu, nóksï ánchekorhesïndi ka nóksï p'arhasïndi.

²⁹K'óruksïni ji arhixaka eska Salomoni, iámendu imeri jatsikorhekua jinguni, no ísï kasïpentaspti eskaksï tsïtsïkicha na kasïpejka.

³⁰Ka enga Diósï tsïtsïki juátarhu anapuechani ísï kasïperajka, enga iásï jukarini jaka ka enga tátsekua kurhiatanhajka, ¿Andi no sánderu ambe ua chánksïni jimbo, sántku jakajkuticha?

³¹Ásïchka uandanhea je uandaparini: ‘¿Ambechisï t'irea o ambechisï itsïmaa o ambechisï xukuparhaa?’

³²Jimbokaksï no jakajkuticha iámendu íni ambe jimbo uandanheasïnga, ka chájtsï Táte auandarhu anapuni ma kángorhesïnga, enga mítetini jaka eskajtsï iámendu íni ambe uétarhenchasïnga.

³³Jirinhantsï je urheta Diósïri irechekuani ka ísï jáma je eska Diósï na uéjka ka máteru ambejtsï ísku kúndamenhaaka.

³⁴Ísï jimbo, pauani anapu ambe ásï uandanhea je, jimboka mándani pauani jutsïkorheaka uandanheata jinguni. Sésku jarhasïndi mándani pauani anapujku uandanheata.”