Read Western Highland Purepecha San Mateo 7 Bible Online

San Mateo 7 - Western Highland Purepecha bible

San Mateo 7

¹“Ásï jáma je arhinhchpeni ka chájtujtsï no arhinhchanhantaaka,

²jimboka ambe engajtsï cha arhinhchpeaka, májkuentsï arhinhchanhantaaka ka ambe engari útspeaka méntkuendi k'uanhaskumenhantaaka.

³¿Nénari chéti erachini tekaasïni jarhuatani enga echenharhitini jaka, ka t'úri no exekorheni kostiasïni engari jukanharhitini jaka?

⁴¿Nénari jimbosï tekaajki chéti erachini arhini? ‘Jurajkukini p'ínharhikuntani ambe engakini echenharhitaka’ ka jiniri t'u kostiasïni jukanharhitini jarhani.

⁵¡Ískuri ísï uandasïnga! Kostiasïni urheta p'ínharhikorhentsï ka jiájkaniri sési éskaaka ka úakari chéti erachini p'ikunharhikuntani ambe enga echenharhitaka.”

⁶“Ásï jáma je pímbinhasï ambe uíchuechani íntsaani o tsakapu mereari jukaparharini kúchichani k'uanitskakuaani, ásïksï inde t'auajchakue ka ásïksïni uíchuecha k'uanhajpatse katsarheni.”

⁷“Kurhajkorhe ka intsïnhaakari, jirinhantsï ka xéntaakari, uámuta ka mítamenhaakari,

⁸jimboka ne enga kurhajkorhejka intsïnhasïndi, ka ne nema enga jirinhantajka xéntasïndi ka ne nema enga uámutatspejka mítamenhasïndi.”

⁹“¿Jaki cha ma ísï ixu, engaksïni chári uátsïti ma kurhinda ma kurhacheaka ka t'u tsakapu ma íntskuni?

¹⁰¿O ekakini kurucha ma kurhacheaka ka t'u akuitse ma p'akarhkurhatani?

¹¹Ekachkajtsï cha nóambakeparini, jurhenaka chári uátsïtichani ambakiti ambe íntsaani, ¡Náxanderu ambakiti ambe íntsaua chári Táte enga auandarhu jaka imechani engaksï kurhakuaka!”

¹²“Ísï jimbo néna engajtsï uéjka eskajtsï kánhaaka, ísï kámpe je, jimboka ísïska juramukuani kurhajchani ka Diósïri uandarichani kurhajchaani.”

¹³“Jimesï incha enga no kómukurhaka, jimboka uanhenhaska engaksï jimesï inchajka enga kómukuarhaka, ka engaksï ima xanhari kóstini jatajka enga tsînchetpejka;

¹⁴k'óru no kómukurhasti ka no kórurhasti ima xanhari enga tsípekuarhu pérpejka ka namuntkuksïsï xéntajti.”

¹⁵“Jinguntku jáma je diósïri uandari eratakorherichani jinguni, engaksïni karichini járhantatini janochejka ka k'óruksï incharini jiuatsïni apejpentspitini.

¹⁶Imecheri jángua jimbojtsï míteantaauaka. ¿Andi tsïtunirhu úba p'ikunhantasïnki o tsurhumurhu jígusï p'ikunhantasïnki?

¹⁷Ísï jimbo, jarhasti ambakiti anhatapu enga ambakiti amanhejchakua jukajka, ka ístu jarhasti anhatapu enga no ambakiti amanhejchakua jukajka.

¹⁸No úati anhatapu ambakiti no ambakiti amanhejchakua jukani, ka nójtu úati no ambakiti anhatapu ambakiti amanhejchakua jukani.

¹⁹Náki uéjki anhatapu ma enga no áspiti amanhejchakua jukajka, ch'apanhasïndi ka kurhinhantani.

²⁰Ísï jimbojtsïsï imecheri jángua jimbo míteantauaka.”

²¹“Nóksï iámendu ima engajtsïni ‘¡Acha, Acha arhijka!’ Inchaati auandarhu anapu irechekuarhu, imajkuksïsï inchaati engaksï ísï jámka eska jucheti Táte enga auandarhu jaka na uéjka.

²²Uánekuajtsïni imani jurhiatekua arhiati: ‘Acha, Acha, ¿Andi nóchi chéti jakangurhikua jimbo arhijtsïkpeski, ka chéti jakangurhikua jimbochi nóambakitichani petarhpeantaani ka uánekua milagruechanchi úani?’

²³Ka jiájkani ji arhiauaka: ‘Nóksïni míteska ¡Kéndikuchejtsïni nósesi ambe úricha!’”

²⁴“Ima engarini kurhajka ka jucheti uandakuechani marhuataani, acheti míakua jukari ma jinguni terukutantasïnga enga k'umanchekua úni jámani tsakapurhu karhakua píjtsïtaka.

²⁵Ka janispti, ka iurhentpeni ka kánekua tarhiani, ka méntku k'umanchekuani nósesi kántani, ka k'umanchekua no xerekorhentaspti jimboka tsakapu pítsetixapka.

²⁶K'óru ima engarini íni uandakuechani kurhajchani jaka ka no marhuataani, acheti no míakua jukari ma jinguni terukutantasïnga enga k'umanchekuani kutsarindu úpka.

²⁷Janispti ka iurhentpeni ka kánekua tarhiani, ka méntku k'umanchekuani nósesi kántani, ka kuáskuspti ka xerendurhikorhentaspti.”

²⁸Enga Jesusi k'amarapka uandani, ísku pakareranhatixapti imeri arhijtsïkperakuani kurharini,

²⁹jimboka jarhamekua jinguni jurhentpesïrempka ka no ísï eskaksï juramukua jurhentpiricha na jurhentpejka.