Read Western Highland Purepecha San Mateo 8 Bible Online

San Mateo 8 - Western Highland Purepecha bible

San Mateo 8

¹Enga Jesusi juátarhu uératini kétsentapka, uánekuaksï chúxapaxati.

²Ka jima andarheraspti xúta jukari ma ka tinguixurhikuspti arhiparini: — Acha, engari uéjka, úakarini ambakerantani.

³Ka Jesusi p'árheparini arhispti: — ¡Uéksïnga, ambakentsïa! Ka xúta jimajku nónespti ka p'amenchati ambakentapaspti.

⁴Ka Jesusi arhispti: — Exe, ásï nemani jáma aianguni, imantkukinisï arhijka eskari táta jinguni niuaka ka pa kéjtsïtakua eska Moisesiri juramukua na arhijka ka ísïksï ima mítetini jauatia.

⁵Enga Jesusi Kafarnaumi inchaakupka, p'urhejkuti Róma anapu urhejtsïkuri ma andarheraspti ísï

⁶kómarhiparini. — Acha, jucheti jántspiri juchenio apondikusti, ka no úsïndi manakorheni ka kánekua arhiraxati p'amerani.

⁷Ka Jesusi arhintaspti: — Ji niuaka ka ambakerantaaka.

⁸Ka p'urhejkuti urhejtsïkuri arhispti: — Tata, ji no nitatarheska eskari t'u juchenio inchaaka, májku uanda ka jucheti jántspiri ambakentaati.

⁹Ka nóchkani jíjtuni jamberi juramumenhasïni andi, ka jíjtuni p'urhejkutichani juramukuasïnga, ekani ima ma ísïni arhiaka: Ni arhini, ima nirasïndi, ka ekani máteruni arhiaka: Ju axu arhini, ima jurhasïndi, ka ekani jucheti jántspirini arhiaka: Arini ambe u, ima úsïndi.

¹⁰Jesusi ísï kurharini ísku pakareraspti ka arhiaspti imechani engaksï chúxapani jápka: — Sési jimboksïni arhixaka, eskani nónani Israeli xéska nemani, xáni mintsikani eska i acheti na mintsikajka.

¹¹Arhixakaksïni eskaksï uánekua juuaka tata jurhiata andarakuarhu uératini ka tata jurhiata inchajtsïkuarhu isï jamberi uératini, ka Abrani, ka Isaaki ka Jakobu jingunksï, auandarhu anapu irechekuarhu márku uaxakaati t'ireni.

¹²Ka irechekuarhu anapuechaksï uérakua pájpakandu petanhaati; ka jimaksïsï ueraati ka sïnichanksï kirisïmeantaati.

¹³Ka Jesusi p'urhejkuti urhejtsïkurini arhispti: — Níntsa ka úkorhe eskari na mintsikaka. Ka p'urhejkutiri jántspiri ambakentapaspti.

¹⁴Jesusi Pédruo niraspti ka jima xéntaspti Pédrueri tarhampirini apondikuni jarhani xáni tinharani.

¹⁵Ka Jesusi jupijkuspti ka ima tinharakuani jupinaspti ka jauaraspti ka sóntku ambe k'éndaaxaptia.

¹⁶Tirimarhandu, Jesusinksï uánekua nósesi jásï incharhetichani pákuaspti ka ima májku uandakua jimbo petarheantaaspti, ka iámendu p'amenchatichani ambakerantaaspti,

¹⁷ka ísï úkorhenia ima enga Diósïri uandari Isaiasi uandaka; “Ima p'iuasti juchari p'ikuarherakuechani ka juchari p'amenchakuechani.”

¹⁸Engaksï Jesusini xáni uánekua uirhipkurhatini jápka, Jesusi juramukuaspti jurhengorheri jémbechani eskaksï japundarhu parhimepiringa.

¹⁹Ka juramukua jurhentpiri ma andarheraspti ka arhispti: — Jurhentpiri, chúxapaakakini nani uéjki engari niuaka.

²⁰Ka Jesusi arhispti: — Jiuatsïchaksï irekorhekua jatsikorhesti ka kuínichaksï xerekua jatsikorheasti, k'óru Acheti Uájpa no jamberi jatsikorhesti nani mintsikorheni.

²¹Ka máteru jurhengorheri jémba ma arhispti: — Acha, sésikuarini íntsku nirani jucheti táteni urheta jatsintani.

²²Ka Jesusi arhispti: — Chúxapurini, uarhirichaksï niue uarhirichani jatsikorheantaani.

²³Jesusi icharhutarhu jataspti ka jurhengorherichaksï chúngumaspti.

²⁴Ka japundarhu kánekua nósesi tarhiaspti, xáni ísï engaksï jenguerakuecha icharhutani ójchakurani jápkia. Ka Jesusi k'uípaxapti.

²⁵Jimajkanksï jurhengorheri jémbecha tsínharhitaspti ka arhinksï: — ¡Acha, p'ímantsïjtsïni, uarhimexakachia!

²⁶Ka ima arhiaspti: — ¿Andijtsïsï chéjki? ¡Nójtsï mintsikasïnga! Ísï uandarini, jauaraspti ka xukaspti tarhiatani ka japundani ka iámendu ambe sési niántaspti.

²⁷Imaksï xáni ísï ambe exerini uandasïrempti: — ¿Néxamue i acheti enga tarhiata ka japunda jamberi kurhajchajka?

²⁸Enga Jesusi japundarhu parhimepka, Gadarecheri echeri jimboksï tsimani nóambakiti incharheticha kúmaspti, engaksï uarhiri jántskuarhu uéndikupka. Kánekuaksï ikimenharhispti, xáni ísï enga jamberi no únhempka jimesï isï nitamanhani.

²⁹Ka uinhachaparinksï uandaspti: — Diósï Uájpa ¿Amberisï úejki juchantsïni jinguni? ¿Urhetkujtsïni jurhaski nósesi kántani?

³⁰No iauani jarhareatini uánekuaksï kúchicha jámaxapti,

³¹ka nóambakitichaksï Jesusini kómarhispti, arhiparini: — Ekajtsïni petarhentaska, sésikuajtsïni íntsku amani kúchichani incharheani.

³²Ka Jesusi arhiaspti: — Ni je. Imaksï uérhpentatini kúchichanksï incharheantaaspti ka kúchichaksï kétsemani isï uiriaspti ka japundarhuksï uékameraspti ka jimaksï uarhimespti.

³³Ka kúchi erangutichaksï sïpakorhespti ka iretarhuksï iámu ambe uandantaspti engaksï xáni nóambakiti incharheticha úkorhenchapka.

³⁴Jiájkani iretarhu anapuechaksï niraspti Jesusini kúmani, ka engaksï exepka kómarhisptiksï eska uéakukuantaapiringa.