Read Western Highland Purepecha San Marcos 10 Bible Online

San Marcos 10 - Western Highland Purepecha bible

San Marcos 10

¹Ísï tátsekua, Jesusi Kafarnaumi uéakuntaspti ka Judea isï niraspti, ka iurhekuarhu parhikutini. Jimajtu uánekua tángorhenhantaspti, ka ima ménderu uénaspti jurhentpeni.

²Máruksï fariseuecha andarheraspti, ka ts'éjkukuekaniksï arisï kurhamarhespti, ¿Sésiski o nósesiski nema témbani jurajkuni?

³Ka Jesusi arhiaspti: — ¿Andi Moisesiksïni néna juramucheski?

⁴Ka imaksï arhispti: — Moisesi sésekua íntspesti, eska karakata ma úkuparini úaka uarhiti jurajkunhani.[155]

⁵Jimajkani Jesusi arhiaspti: — Moisesiksïni chári inchandimekua jimbosï indeni juramukuani íntskupti.

⁶Uénani jámani no ísïspti, Tata K'uerajpiri márku kueraaspti tatakani ka nanakani,[156]

⁷jimbosï tataka, tátjembani ka amambani jurajkuati ka témba jinguniuatia,

⁸ka tsimarheniksï májkuentaatia. Ka ísï jimboksï nóteru tsimaniuatia, máterkuksï úkorhentaatia.[157]

⁹Ka jimbo, enga xáni ambe Diósï kúndaka ásï nema parhakpeni anapu jurajkutarpe.

¹⁰Ka engaksï k'umanchekuarhu niántapka, jurhengorherichaksï ménderu jurajperakueri ambe kurhamarhespti.

¹¹Ka Jesusi arhiaspti: — Ne enga jurajkuaka imeri uarhitini ka máteru jinguni tembuchantani, ísku jándikuxati imani enga urheta témbepka;

¹²ka eka uarhiti jurajkuska uámbani ka máteru jinguni uambuchantani, imajtu májkueni ísku jándixati.[158]

¹³Jesusiniksï sapichani máru újchakuraani pákuaspti; ka jurhengorherichaksï xukajpesïrempti.

¹⁴Enga Jesusi exeapka eskaksï xukaaxapka, ikiatintku arhiaspti jurhengorherichani: — Jurajkua je sapichani, ásï p'íngua je engajtsïni andarherajka, jimboka Diósïri juramukua imecheriska engaksï indeni járhaka.

¹⁵Sési jimboksïni arhisïnga eska, ne enga Diósïri juramukuani no ísï mintsikajka eska sapi ma, eska ima no inchaaka Diósïri juramukuarhu.

¹⁶Ka kamanharhiaspti sapichani, ka p'ájtsïkuaparini újchakuraaspti.

¹⁷Enga Jesusi ménderu xanhari jatantani jámempkia, acheti ma uiriaparini niáraspti ka tinguixurhikuspti ka kurhamarheni: — Ambakiti jurhentpiri, ¿Néna jámaa? Ji uéksïnga méntku isï tsípekua jatsini.

¹⁸Ka Jesusi arhispti: — ¿Andirinisï arhijki eskani ji ambakitiska? Diósïjkusï ambakititi.

¹⁹Mítetixakaria juramukuechani: Ásï uándikpe, ásï ísku jándi úkorhe, ásï sïpatspe, ásï chkuándiratspe ka ásï ámeratpe; ka janhanharhi chéti táteni ka chéti nándeni.[159]

²⁰Ka acheti arhispti: — Jurhentpiri, sapirintkisïni uénaka indeni ambe ísï jámani.

²¹Ka Jesusi p'amojkuparini eratespti ka arhini: — Ma ambeterkuri no ísï jámaxaka: Níntsï, ka chéti jatsikorhekuani atarantsï, ka tumina no jatsikorherichani íntsaa. Ísïri jámani jatsikorhekuani auandarhu káneraaka. Ka ísï k'órurini juia chúxapuni.

²²Ka ima acheti ísï kurharini, nósesi p'ikuarherapantaspti; ka mískorhepantaspti, jimboka kánekua jatsikorherispka.

²³Ka Jesusi k'uiripuni eraaspti ka jurhengorherichani arhiaspti: — ¡Kánekua úkua jukaati eska jatsikorheri ma Diósïri juramukuarhu inchaaka![160]

²⁴Ka jurhengorherichaksï ísï kurhajchatini eratsentani pakareraspti, ka Jesusi ménderu uéntaspti arhiani: Jucheti uátsïcha, ¡Kánekua úkua jukasti Diósïri juramukuarhu inchani!

²⁵Kameiu, p'ikukueri p'orhojchakuarhu ma, sánderu sóntku parhijchakuati, eska jatsikorheri ma, Diósïri juramukuarhu inchani.

²⁶Ka imaksï sánderu ísku pakareraspti, ka kurhamarhperasïremptiksï: — ¿Ka néjkusï p'ímutanhantaia andi?

²⁷Jesusi erateaspti ka arhiani: — Nónema úati jandiojku p'ímutakorhentani, Diósïjkusï újti, jimboka ima iámendu ambe úsïnga.[161]

²⁸Ka Pédru arhispti: — Jucha iámu jatsikorhekua jurajkuska, t'úngeni uékani chúxapani.

²⁹Ka Jesusi uandaspti: — Sésiksïnisï arhijka, ne engarini chúxapaaka ka ambakiti aiangpekuani jakajkuni, ka jurajkuani erachichani o pirenchichani, nándeni o táteni, o uájpechani, k'umanchekuani o echerichani ambe;

³⁰Iásï íni tsípekua jimbo, iúmu ekuatse sánderu uánekua erachichani ka pirenchichani, nándechani ka uájpechani ka k'umanchekuechani ka echerichani íntsïnhauati; ka ístu jupinhani kánhaati ka enga uarhikua niáranchaaka, tsípekua méntkisï anapu intsïnhaati.

³¹Ka uánekua ima engaksï iásï k'éri ambeka, tátsekuaksï ísku nemeuati, ka uánekua engaksï iásï nómbemeka, tátsekuaksï sánderu k'éri ambeuati.[162]

³²Engaksï Jerusaleni karhamani jápka, Jesusi jurhengorherichani urhekupaaxapti. Ka ima engaksï tátsepani jápka, chépaxaptiksï. Jesusi ménderu ióarhiaspti témbeni tsimani jurhengorherichani, ka imechantku aianguaspti eska ísï úkorhenchapiringa:

³³“Kurha je, Jerusalenichi niraxaka, jima Acheti Uájpa[163] jupinhaati ka tátecheri urhejtsïkurichani, ka juramukua jurhentpirichani jinguni pánhaati, ka imaksï uérakua anapuechani pákuati ka uándikutarkorhenksï.

³⁴Jimaksï teresmarhuati ka t'úanharhikuatiksï ka ataatiksï ka uándikuatiksï; ka ima tanimu jurhia jimbo tsíntaati.”

³⁵Santiagu ka Juánu, Sebedeu uájpecha, andarherasptiksï Jesusini ka arhisptiksï: — Jurhentpiri, kóndejtsïni engaksïni kurhacheni jaka.

³⁶Ka Jesusi kurhamarheaspti: — ¿Ambejtsïsï kurhajkorheni jaki?

³⁷Ka imaksï arhispti: — Íntskujtsïni jurhimbekua eskaksïni jucha uaxataaka, ma chéti jurhijkandani ka máteru chéti uikixkandani, jiájkani ekari na t'íntskua jinguni juramuni jauakia.

³⁸Ka Jesusi arhiaspti: — Nójtsï míteska ambejtsïsï kurhajkorheni jaki. ¿Andi úajtsï chájtu májkueni k'ameri itsïmani eskani ji? ¿Ka andi úajtsï chájtu uérakuni imeni jásï ts'éjperata eskani ji na ts'éjkunhaaka?[164]

³⁹Ka imaksï arhispti: — Jucha úaka. Ka Jesusi arhiaspti: — Sési jimboksïni arhixaka, eskajtsï chájtu k'ameri itsïmaaka, ka nósesijtsï kánhaaka májkueni eskani ji.

⁴⁰K'óru no jucheti jimbo jarhasti jucheti jurhijkandani o uikixkandani uaxastpeni, jimbokaksï míndakata jarhaskia, ima engaksï jima uaxakaaka.

⁴¹Ka máteru témbeni jurhengorherichaksï Santiaguni ka Juánuni ikiakuaspti, engaksï ísï kurhajchaapka.

⁴²Ka Jesusi uandajpaaspti, ka arhiaspti: — Eskajtsï na mítpeka, máruksï juramuticha kurhunhekua jinguni juramutspesïndi, ka máruksï k'éri p'ikuarherasïndi ka juramukuanksï nósesi úrasïndi.

⁴³Ka chánksïni jinguni no ísïuati. Ne enga cha jinguni uékaaka k'érini, urheta máteruechani marhuakuauati.

⁴⁴Ka ne enga cha jinguni uékaaka k'érini, jatsiati eska iámenduechani marhuakuauaka.[165]

⁴⁵Jimboka Acheti Uájpa[166] marhuatspenisï juka, ka imeri tsípekua jimbo uánekua p'ímutantaanisï juti; ka no eska marhuamenhaaka.[167]

⁴⁶Engaksï Jeriko niárapka ka tátsekuaksï uéakuntani, Jesusi jurhengorheri jémbechani jinguni niraxapti ka uánekuaksï chúxapaaxapti. Ka Timeo uájpa xanharu uaxaruspti, enga Bartimeo arhinhajka, enga pátenharhika ka no jatsikorherini.

⁴⁷Enga kurhapka eska Jesusi Nasareti anapu jimesï nitamaxapka, uinhachaspti, arhini: — ¡Jesusi, Dabidi Uájpa! ¡P'amojkurini!

⁴⁸Ka uánekuaksï xukasïrempti eska pínasku japiringa, ka ima sánderu nósesi uinhachasïrempti mintsitani: — ¡Dabidi Uájpa! ¡P'amojkurini!

⁴⁹Ka jiájkani k'óru Jesusi anhaxurhispti, ka uandaspti: — Arhi je eska juuaka. Ka pátenharhinksï ióarhispti: — Jauara; uandajpaxatikini.

⁵⁰Ka pátenharhi sóntku jauraspti ka k'uanikuspti chereparhani enga kángorheni jápka, ka ma jimbojku méntku Jesusini andarhereraspti.

⁵¹Ka Jesusi kurhamarhespti: — ¿Ambekinisï marhuachea? Ka pátenharhi arhispti: — Jurhentpiri, uéksïnga éskantani.

⁵²Ka Jesusi arhispti: — Chéti jakajkukua jimbori éskantaskia, níia níntani. Ka pátenharhi éskantaspti, ka chúxapaspti Jesusini.