Read Western Highland Purepecha San Marcos 12 Bible Online

San Marcos 12 - Western Highland Purepecha bible

San Marcos 12

¹Jesusi uénaspti terukutantskuechani jimbo arhijtsïkuani, ka arhiaspti: “Acheti ma úba ikaraspti,[174] ka uatsotaspti; ka kuákua ma úspti jima enga úba tsitaranhapiringa, ka iótati ma kuaritarakua úspti enga úempka iápuru isï erajpatarani, tátsekua tarherichani máru kuánetaaspti echerini enga úba ikarakata jápka, ka uéakuspti.

²Ka enga na niárapka jurhiata, imeri jántspirini ma axaspti tarherichani andakua kurhakuantaani.

³Ka imaksï jupikaspti, ka atasptiksï, ka ískuksï axantaspti.

⁴Ka acheti úba ikarati máteru jántspirini axaspti, ka indeniksï arhajtsïkuspti, ka nósesi arhisptiksï.

⁵Máteru axaspti, ka indeniksï ataspti uándikuni. Tátsekua Uánekuateru axaaspti; máruksï ísku ataaspti, ka máruksï ataaspti uándikuani.”

⁶“Máterkuni nótki axaxapti: Uájpani, enga ima xáni xénhchempka. Ka k'amarani jámani imani axaspti, ísï eratseparini: ‘Jucheti uátsïni k'óruksï janhanharhiati.’

⁷Ka tarherichaksï arhijperaspti: ‘Iámendu ambe i jurajkumenhaati; ju je uándikuni ka iámu ambechi jucha míngorheaka.’

⁸Ka ísï jámani, jupikasptiksï, ka uándikusptiksï, ka k'uanitamantasptiksï.”[175]

⁹“¿Cha néna arhijki eska jámaaka ima acheti enga úba ikaratika? Niántatini tarherichani atauati uándikuani, ka echerini enga úba ikarakata jaka máteruechani íntsauati.”

¹⁰“¿Andi nójtsï méni arhitaski karakatani? Jima enga arhijka: ‘Ima tsakapu engaksï k'umanchekua úricha no jaiapanhentaka, iásï tsumbindikua kasïperakuarhu jatsikunhastia.

¹¹Ka íni ambe Diósï ísï ústi, ka ísku pakareratixakachi.’ ”[176]

¹²Jimajkaniksï Jesusini jupikani uékaspti, jimbokaksï p'íkukorhetaspka eska imechanisï arhiani jápka. Ka nóksï tekaaspti jimbokaksï chérhpespka, ískuksï jarharentasptiksï ka níntaniksï.

¹³Tátsekuaksï Jesusini máru fariseuechani axakuaspti ka erodesiri eratsekua chúngumatichani, uandakua p'itachakuniksï uékani engaksï jimbo úpiringa k'amanharhirantani.

¹⁴Ka niáratinksï arhispti: — Jurhentpiri, míteskachi eskari imani ambe uandasïnga enga ísïka, náuejkiri ménderueni uandamenhantani, jimbokari t'u nónemani sési pakarakuxamka. T'úri sési jimbo jurhentpesïnga Diósïri xanhari. Ka arhijtsïni sáni: ¿Sési jarhaski eskani jucha maiampeaka engajtsïni Roma anapu juramuticha kurhachejka? ¿Íntspeachi ochi ua no íntspeni?[177]

¹⁵Jesusi p'ikuarhetsespti imecheri uandakuechani eskaksï ískusï ísï arhini jápka, eskaksï ts'éjkunisï uékempka, ka arhiaspti: — ¿Andijtsïnisï ts'éjkuni uéjki? Exerajtsïni je ma taiakata.

¹⁶Íntskusptiksï ma, ka Jesusi kurhamarheaspti: — ¿Nésï ixu jukanhari ka nériski i karakata enga ixu jukanharhika? Ka arhisptiksï: — Sésariri.

¹⁷Ka Jesusi arhiaspti: — Sésarini íntsku je, ambe enga Sésaririka; ka Diósïni íntsku je, ambe enga Diósïrika. Imaksï ísku pakareraspti engaksï ísï arhinhapka.[178]

¹⁸Tátsekuaksï Jesusini saduseuecha máru andarheraspti,[179] engaksï ima engaksï uandajka eskaksï uarhiricha no tsíntasïnga ka arhisptiksï:

¹⁹— Jurhentpiri, Moisesijtsïni karakata jimbo jurhengaua jurajkuchcesti, enga arhijka eska enga acheti ma uarhiaka ka témbani nóma uájpani jurajkukuni, eska erachi jémba jatsiaka uarhiti tsîndini tembuntani, ka erachi jémbani sïrukua jurajkukuni.[180]

²⁰Ka jarhasptiksï ma xanhari, iúmu tsimani erachicha, ka ima enga urhetipka tembuchaspti, ka uarhispti ka nóma uájpani jurajkuni.

²¹Ka uarhiriri erachi enga chúxapempka tembuntaspti uarhiti tsîndini ka imajtu uarhispti ka no ma uájpani jurajkukuni. Ka méntkueni jámaspti tanimu úni jámani,

²²ka méntkueniksï k'amandespti iúmu tsimani erachicha; ka nónema sapini jurajkuspti. Ísï tátsekua uarhitijtu uarhispti.

²³Ka néna jámaia tsíntskuarhu, ¿Andi ima uarhiti néri tembentaia engaksï iúmu tsimani erachicha tembupka?

²⁴Ka Jesusi arhiaspti: — Támisïjtsï uandantaxaka, nójtsï sési arhitaska ka Diósïri juramukuantujtsï nósesi míteska.

²⁵Engaksï uarhiricha tsíntaaka, nóteru tembuchanhaatia, jimboka Diósïri ánjelini járhanhantaaka, engaksï auandarhu jaka.

²⁶Ka inde uarhiricheri tsíntskueri ambe, ¿Andi nójtsï méni arhintaski Moisesiri karakatarhu? Enga tsïtunirhu[181] Diósï arhipka: Ji Abraaniri, ka Isaakiri, ka Jakobueri Diósïska.

²⁷Ima tsípiticheri Diósïsti, no uarhiricheri. Chájtsï kánekua támu ísï jámaxaka.

²⁸Ka juramukua jurhentpiri ma jima andarheraspti enga kurhajchaapka ka kurhanguntani eska Jesusi sési arhiaspka, ka Jesusini kurhamarhespti: — Iámendu juramukuecha jinguni ¿Náki sánderu k'ériski?

²⁹Ka Jesusi arhispti: — Aristi sánderu k'éri: Kurha Israeli: Juchari Acha Diósï, májku Achesti;

³⁰chéti Acha Diósïni mintsita jinguni xénhcha, jángua jinguni, eratsekua jinguni ka iámendu chéti uinhapekua jinguni xénhcha.[182]

³¹Ka máteru jarhasti enga arhijka: Máteruni ísï xénhcha eskari t'u na xénhchakorhejka.[183] Ka nóteru ma juramukua jarhasti enga sánderu k'érika.

³²Ka ima juramukua jurhentpiri arhispti: — Sésiri uandaska jurhentpiri, ísïsti eskari na uandajka: Eska májkueska Diósï, ka eska nóteru ma jarhaska.[184]

³³Ka eska uétarhesïnga Diósïni mintsita jinguni xénhchani ka eratsekua jinguni ka iámendu uinhapekua jinguni xénhchani; ka eskari máteru nemani ísï xénhchaaka eskari na xénhchakorhejka, inde ambe sánderu jukaparhakuesti eska kéjtsïtakua ambe ka eska ima ambe enga Diósïni aiakuparini kurhiranhajka.[185]

³⁴Enga Jesusi exepka eska juramukua jurhentpiri sési eratsentaparini mókukuspka, arhispti: — Andarheraxakari Diósïri juramukuani. Ka nóteru nema tekaaspti sánderu ambe kurhamarheni.

³⁵Enga Jesusi tiósïo jurhentpeni jápka, arisï kurhamarhpespti: — ¿Andiksïsï juramukua jurhentpiricha uandajki eska Krístu Dabidiri sïrukueska?[186]

³⁶Ka Dabidintu Espiritu Sántu ísï uandaraspti: Acha arhispti jucheti Tatani: Axu t'irerkandani uaxaka, engakini jamberi chéti ikiatspirichani jatandutarantauaka.[187]

³⁷¿Nénajtu Dabidi uájpeua? ¿Nájki Dabidijtu Táte erataparini uandajpajki andi? Uánekuaksï tsípekua jinguni kurhajchaxapti Jesusini.

³⁸Ka Jesusi jurhentpeparini uandasïrempti: “Xéparini je juramukua jurhentpirichani jinguni, jimbokaksï takusï iórhati ambe xukuparhanchasïnga, ka uéksïndiksï eskaksï kópekuarhu isï sési uandajpanhaaka.

³⁹Tángorhekuecharhu ka jimesï enga t'irekua ambe jauaka, jángorhesïndiksï k'érikuarhu uaxakani;

⁴⁰ka uarhiti tsîndichanksï iámendu ambe euakorheasïndi,[188] ka nónentanksï uékantku ióni uandatsekorhesïndi. Imaksï sánderu maiampetaranhantaati.”

⁴¹Tátsekua Jesusi jima erangurhini uaxakaspti enga tumina jatsirakua jápka, ka jima uératini exexapti na enga xáni tumina jatsiranhempka, ka jatsikorherichaksï uánhachani jatsirsïrempti.

⁴²Ka uarhiti tsîndi nómbe jatsikorheri ma niáraspti, ka tsimani sapirhati taiakatajku jatsiraspti, enga no káni jukaparhakuepka.

⁴³Jesusi ióarhiaspti imeri jurhengorherichani, ka arhiaspti: — Sési jimboksïni arhixaka eska inde uarhiti tsîndi, nándi no jatsikorhe, eska inde sánderu kánekua tumina jatsiraska eska iámendu imecha engaksï uánhachani jatsiraka;

⁴⁴jimbokaksï iámenduecha pakajkukatajkusï jatsiraka, ka inde uarhiti no jatsikorheri iámu jatsirasti enga nitamakorhetarapiringa.[189]