Read Western Highland Purepecha San Marcos 13 Bible Online

San Marcos 13 - Western Highland Purepecha bible

San Marcos 13

¹Enga Jesusi tiósïo uéntapka, jurhengorheri ma arhispti: — ¡Jurhentpiri, exea xáni k'érati tsakapuechani ka xáni k'érati k'umanchekuechani!

²Ka Jesusi arhispti: — ¿K'érastiksï ano k'umanchekuecha? Ka iámenduksï xerendurhinhantaati, méntku nóma erhakua tsakapu máterurhu píjtsïkutini pakaraati.[190]

³Tátsekuaksï Olibusï juátarhu niraspti, enga tiósïo erangurhini jaka. Ka Jesusi uaxakaspti, ka Pédru ka Santiagu ka Juánu ka Andresï sïpatekuarhkuksï kurhamarhespti:

⁴— Aiangujtsïni. ¿Andi i ambe na jatini ísï úkorhea? Ka ¿Ambe jimbochi jánhaskaa eska ísï úkorheni jámaakia?

⁵Ka Jesusi arhiaspti: “Xéparinijtsï jámaaka ásïksïni nema tandojche.

⁶Jimbokaksï uánekua juuaka jucheti jakangurhikua uandaparini ka arhiatiksïni: ‘Jíska’ arhini[191] ka uánekuaksï tandojchpeati.

⁷Ásï che je engajtsï míteska eska iápuru k'érati uarhiperata úkorhexaka. Ísï jatsisti eska úkorheaka, k'óru nótki k'amakurhixamti.

⁸Jimboka uarhiperanhaaka ka ístuksï jupiperaati k'éri ireta, máteru k'éri iretani jinguni; ka uápuru isï jencheati, ka kánekua k'arhimakua japoati. Indeni jimbo xarharaati eska uénaskia p'amekua, eska uarhiti na uénajka k'uparhata p'amerani.”[192]

⁹“Cha jinguntku ja je k'óru: Jimbokajtsï tángorhentskuarhu, ka ístu k'umanchekua tángorhentskuarhu pánhaaka ka nósesijtsï kánhaaka atanhani. Ka jucheti jimbojtsï juramuti sapirhati ka juramuti k'ératichani jinguni pánhaaka, ka jimajtsï imechani jucheti ambe aianguauaka.[193]

¹⁰Jimboka k'uanisïnga eska urheta iámendu iretecharhu uandanhantaaka ambakiti aiangperakua.[194]

¹¹Engajtsï jupinhaaka, ásï uandanhea je ambejtsïsï uandaa juramutichani japarini. Jimajtsï jánhastanhaaka ambe engajtsï uandaaka, jimbokajtsï no chásï uandani jauaka, Espiritu Sántusï uandaati.

¹²Uarhikuarhu pájperanhaati erachicha ka tátjembajtu uájpani uarhikuarhu péraati; ka sapichaksï tátjembani ka amambani anhaxurhikuauati ka atauatiksï uándikuani.

¹³Jucheti jimboksïni iápuru ikimchaati, k'óru ima enga no kuatantaaka jakajkuni jarhani, p'ímutanhantaati.”[195]

¹⁴“Engajtsï exeaka nósesi jásï kéjtsïtakua jima kéjtsïtanhani janhani enga no kéjtsïtakueka, cha engajtsï arhintani jaka kurhandira je,[196] ekajtsï Judea jauaka, sóntku sïpakorhe je, juátecharhu karhanharhiku je sïpakorheni;

¹⁵engajtsï k'umanchekuarhu karhakua jámani jauaka, ásï kétsentsï je inchantani ambe petakorheni;

¹⁶ka ima enga tarheni jauaka, ásï jamberi k'uanhatsente chereparhakua p'íntani.[197]

¹⁷¡Kánekuaksï nósesi nitamanchaati uarhiticha engaksï sapini erokorheni jauaka, o engaksï charhakuni etsukua íntskuni jauaka![198]

¹⁸Kómarhi je Diósïni eska i ambe no jiájkani úkorheaka enga iéstani jarhajka,

¹⁹jimboka kánekua nósesi jánhaskorheaka, enga kueraajperakuarhu uératintki nómeni jánhaskorheka, ka enga nóteru méni ísï jánhaskorheaka.[199]

²⁰Enga Acha no sóntku nitamatarapiringa xásï ambe, iámendu uarhinhapirindi; enga úka, no ióni xanhaskorheati jimboka Diósï kuájchakuauaka imechani enga erakuatini jakaia.”

²¹“Ka engaksïni nema arhiska: ‘Exe je, ixu jarhasti Krístu’ o ‘Exe je, jimini jarhasti’, ásï jáma je jakajkukuni.

²²Jimbokaksï juuaka Krístu eratakorhecha ka Diósïri uandari eratakorhecha;[200] ka mámaru ambeksï xarhataparini tandojchpeati ka milagruechanksï jimbojtu tandojchpeati, ka jámaatiksï Diósïri erakukatechani jamberi tandojchaani.

²³¡Xéparini jáma je! Aianguskaksïnia ambe enga jurhani jaka.”

²⁴“Enga na nitamaakia nósesi jásï ambe, tata jurhiata pájpapakanharhiati, ka nana kutsï nóteru t'íntskaati,

²⁵auandarhu uératinksï jóskuecha uekorheati, ka auandarhu anapu uinhapekuechaksï xamatakorheati.

²⁶Jiájkantsï exeaka eska Acha Uájpa[201] kánekua uinhapekua ka t'íntskua jinguni xúmurhu kétseaka.[202]

²⁷Ka imeri ánjelichani axauati t'ápuru isï eraparini anapu erakukatechani tánantaani, náni enga jamberi parhakpeni k'amarhujka ka nani enga auanda k'amarhujka.”[203]

²⁸“Jurhengorhe je enga igusï jámka: Enga tsikixkurhintani jarhajkia, imani jimbochi jánhaskasïnga eska emenda janonguaxakaia.

²⁹Ka chájtu engajtsï exeaka eska inde ambe úkorheni jauakia, indeni jimbo míte je eska Acha Uájpa chéni anhamukuskia.

³⁰Jíksïni sési jimbo arhisïnga, eskaksï iásï anapuecha irekani jauaka útasï, enga inde ambe úkorheaka.

³¹Auanda ka echeri k'ámakurhiati, k'óru jucheti uandakuechaksï méntkisïuati.”

³²“Enga úka, nónema mítesti káni, ka na jatini, níksï ánjelicha auandarhu míte, níjtu Diósï Uájpa míte, Tátejkusï míteti.”[204]

³³“Cha, ísï jimbo tsínharhitini ja je, jimbokajtsï no míteska na jatini ísï jánhaskorhea.

³⁴Cha májkueni jáma je eska nema enga iauani iretarhu nirani jámani jéndajka imeri jántspirichani, eskaksï k'umanchekua patsakuaka, ka táchani úkua jurajkukuasïndi, ka mítatini juramukusïndi eska kuáni jauaka.[205]

³⁵Chájtu ísï tsínharhitini ja je, jimbokajtsï no míteska káni jungua k'umanchekuarhu anapu tata, inchatiru isï, terujkani chúrekua isï, sïuajpentku isï o xárhentku isï;

³⁶ásï ima andajpatante ka cha k'uíni jarhani.

³⁷Ka indeni ambe engaksïni chánksïni arhini jaka, iámenduechanisïni arhiani jaka: ¡Tsínharhitini ja je!”