Read Western Highland Purepecha San Marcos 5 Bible Online

San Marcos 5 - Western Highland Purepecha bible

San Marcos 5

¹Niárasptiksï jiniani japundarhu parhimetini, Jerasa uanondani.

²Enga Jesusi icharhutarhu kétsepkia, kúmaspti acheti ma enga nóambakiti incharhetini jápka, enga uarhiri jatsintskuarhu uéndikupka,

³jimboka jima irekaspka. Ka nónema úsïrempti p'ínguni, náuejki tiámu tepekata jimbo.

⁴Mémechaniksï tiámu tepekata jimbo jótaspti, ka ima kachundurhiasïrempti tiámuechani, nónema úsïrempti p'ínguni.

⁵Juátarhu ka uarhiri jatsintskuarhu isï, méntkisï jiuakorheparini jámsïrempti ka tsakapu jimbo atakorheparini.

⁶Ka enga Jesusini iauani jatini erapka, uiriaspti kúmani ka tinguixurhikuspti,

⁷ka uinhachaparini arhini: — ¡Jesusi, auandarhu anapu Diósï Uájpa! ¡Ásïrini inchaakuche, kómarhixakakini, ásïrini nósesi p'ikuasta![64]

⁸Ísï uandakorhesïrempti jimboka Jesusi arhispka: — ¡Nósesi jásï espiritu, uérhentsï íni achetini!

⁹Ka ístu kurhamarhespti: — ¿Nénari arhinhasïnki? Ka ima arhispti: — ¿Andi nóri míteski na engani arhinhajka ji? Ji Lejioniska,[65] ka no jíjkueska jimbokani jucha uáneska.

¹⁰Ka Jesusiniksï kánekua kómu arhispti eska no kénditaapiringa.

¹¹Ka no iauani jarharetini, juátarhu jandukutiniksï uánekua kúchicha jámaxapti t'ireni,

¹²ka nósesi jarhati espirituechaksï kómu arhispti Jesusini arhiparini: — Kúchiachani jinguntsïni axa ka íntskujtsïni sésekua eskani jucha imechani incharheauaka.

¹³Jesusi jiáretaaspti, ka nósesi járhati espirituechaksï achetini uérhentaspti, ka iúmu irepeta[66] ísïsptiksï engakï kúchichani incharheapka, ka ísku úndasptiksï nósesi jándu ka kétsemandu isï uiriani. Japundarhuksï inchameraspti ka jimaksï uarhimespti.

¹⁴Ka kúchi erangutichaksï uiriaspti sïpakorheni ka iretarhu ka juátecharhu isïksï uandantaspti. Ka uánekua ninhaspti exenhani ambesï úkorheni japi.

¹⁵Eka niáranhapka jima enga Jesusi jápka, ima acheti engaksï nósesi járhati espirituecha incharhetini jápka, uaxakatixaptia xukuparhantatini ka míakua jinguni. Ka chérakorhenhatixapti.

¹⁶Ka ima engaksï Jesusini exepka, néna enga ambakerantapka imani achetini, engaksï nósesi járhaticha incharhetini jápka, ka engajtuksï exepka nénaksï jámaspki kúchicha, imaksï aianguaspti máteruechani.

¹⁷Ka arhisptiksï Jesusini eska uéakuntapiringa imani iretarhu.

¹⁸Enga Jesusi jatantani jápka icharhutarhu, ima acheti enga Jesusi ambakerantapka, kómu arhisïrempti eska jiáretapiringa chúxapani.

¹⁹Ka Jesusi ménderu arhispti: — Ni níntani, ka aiangpe eskakini Acha ambakerantaska[67] ka eskakini kóndentaska.

²⁰Ima acheti níntaspti, ka uandantaspti eska Jesusi ambakerantaspka; ka ísku pakareranhaspti.

²¹Enga Jesusi icharhutani jatarini ménderu parhimentapka, uanamukutini pakaraspti ka uánekua tángorhenhantaspti.

²²Jima andarheraspti Jáiru, enga k'umanchekua tángorhentskuarhu urhejtsïkuripka, ka Jesusini exerini, tinguikuatsekuspti.

²³Ka kánekua kómu arhiparini arhispti: — Jucheti uátsï nanaka uarhixati; ju p'ájtsïkuni[68] eska ambakentaaka ka eska sánderu irekaaka.

²⁴Jesusi niraspti ima jinguni, ka uánekuaksï chúxapaxapti, katsinhperapanhaxapti.

²⁵Jima niraxapti ma uarhiti enga témbeni tsimani uéxurhinipkia enga p'amenchaparini jámani jápka, iurhiri késkuparini.[69]

²⁶Kánekua ka ióni mískorhesptia, ka uánekua tsinajpirichani maiamuasptia, ka nómbema marhuakuspti, sánderu kánerapaxapti p'amenchakuani.

²⁷Enga kurhajchpepka eska Jesusi jimesï jámaxapka, ima uarhiti tátsepani isï inchaakurhaparini andanguspti Jesusini, ka xukuparhakua jupirhukukuspti.

²⁸Jimboka ísï eratsentaspka: “Xukuparhakuajkuni engani jupirhukukuska, ji ambakentaaka.”

²⁹Ka iurhiri anhakuataspti, ka ambakentani p'ikuarheraspti.

³⁰Ka Jesusi p'irhipakurhispti enga p'ikuarherapka eska uinhapekua uérhespka, ka kurhamarhpespti: — ¿Nérinisï xukuparhakua jupirhukuche?

³¹Ka imeri jurhengorherichaksï arhispti: — Exexakari eskajtsïni katsinhaxaka, ka útasteruri kurhangorhesïnga, ¿Nérini xukuparhakua jupirhukucheski?

³²Ka Jesusi p'irhip'irhinharhixapti, uékani exeni nésï xukuparhakua jupirhukukupki.

³³Ka jimboka ima uarhiti míakorhexapka ambe enga úpka, Jesusini chéparini ka manaraparini andarheraspti ka tinguixurhikuspti, ka aianguntaspti.

³⁴Ka Jesusi arhispti: — Jucheti uátsï, chéti jakajkukua jimbori ambakentaskia, ni níntani ka Diósïkini urhechepante.

³⁵Enga Jesusi útasï uandani jápka, jimaksï niáraspti máru k'umanchekua tángorhentskua urhejtsïkurio uératini, ka arhisptiksï nanaka sapichueri tátjembani: — Chéti uátsï uarhistia, ¿Ambeteruri úni ójkutaxaki jurhentpirini?

³⁶Ka Jesusi ísku kurhajchaaspti ka Jáiruni arhini: — T'u ásï jáma chéni, mintsikarini.

³⁷Pédru ka Santiagu ka Juánuni, taniperantku jiáretaaspti eskaksï pámbetapiringa.

³⁸Ka engaksï niárapka Jáiruo, exejpespti eska mískorhenhaxapka, ka eskaksï máru uinhamendu ueraxapka,

³⁹inchaspti ka arhiani: — ¿Andisï xáni uenhajki ka mískorhenhani? Nanaka sapichu k'uíxati, inde no uarhirixati.[70]

⁴⁰Ka Jesusiniksï teresmarhuspti, ka ima iámenduechani petarkorheantaspti, ka inchaspti jima enga nanaka sapichu ka tátjemba jápka, amamba ka imeri pámpirichani jinguntku.

⁴¹Ka nanaka sapichuni jupijkuspti ka arhini: — ¡Talita kumi![71] (Enga arhikuekajka: “¡Nanaka sapichu, t'úngenisï arhijka, jauara!”)

⁴²Ka nanaka sapichu jauarapaspti ka xanharantaspti, jimboka témbeni tsimani uéxurhini jatirispkia. Ka kánekua ísku pakareranhaspti ísï exerini.

⁴³Ka Jesusi arhiaspti eskaksï nónemani aiangupiringa ka arhiasptijtu eskaksï nanaka sapichuni t'irerapiringa.