Read Western Highland Purepecha San Marcos 8 Bible Online

San Marcos 8 - Western Highland Purepecha bible

San Marcos 8

¹Ma jurhiatekua uánekua tángorhenhantaspti ka nónema kámsïrempti t'irekua. Jesusi ióarhispti imeri jurhengorherichani ka arhiaspti:

²— P'amojkpexaka, jíndeni jinguni jámbarini tanimu jurhia no t'irenhastia.

³Ka ekani nómbema atini axajpentaska, indeksï xanhari jimbo chkéati, jimbokaksï máru iauani uératini jurhaska.

⁴Ka imaksï arhispti: — ¿Ka ixuchi nénasï t'irerpeaia, enga nónema irekaka?

⁵Ka Jesusi kurhamarheaspti: — ¿Andi kurhindajtsï namoni kámaxaki? Ka arhisptiksï: — Iúmu tsimani echakua.

⁶Ka arhijpespti eska uaxakanhapiringa, ka kurhinda jupikatini, ka diósïmaiamukua arhintatini, ústatspespti ka imeri jurhengorherichani íntsaaspti, ka imaksï íntspespti.

⁷Ka ístuksï máru kuruchechani káaxapti, ka Jesusi újchakuraaspti, ka juramuspti eskajtuksï imantu intspepiringa.

⁸Ka niáchanhantaspti anhani, ka pakarakataksï iúmu tsimani tsïkiata uiniri tánantaspti.

⁹Ka témbeni irepeta (4,000) isï t'irenhaspti. Tátsekua Jesusi axajpentaspti,

¹⁰ka Jesusi imeri jurhengorherichani jinguni icharhutarhu jatantaspti, ka Dalmanuta[109] uanondani isïksï niraspti.

¹¹[110] Jimaksï niáraspti fariseuecha ka Jesusini jingunksï arhinharhikperani; arhisïremptiksï eska milagru ma exeraapiringa, eska xarhatapiringa eska Diósï axaspka, jimbokaksï ts'éjkuni uéksïrempka.[111]

¹²Jesusi k'éri ma k'arhanguntaspti ka uandaspti: “¿Andijtsïsï méntku milagru kurhajkorheni jaki?[112] Sési jimboksïni arhixaka eskajtsï cha nóma milagru exeranhaaka.”

¹³Ka kéndikukuaspti ka k'uanhatsentaspti icharhutarhu ka japundarhu parhimentaspti.

¹⁴Jurhengorherichaksï mirikurhispti icharhutarhu t'irekua jatsirani, ka ma echukua kurhindajkuksï kámaxapti.

¹⁵Jimajkani Jesusi arhiaspti: — Xéparini jáma je fariseuecheri ka erodesicheri xarhiperakua jinguni.[113]

¹⁶Ka jurhengorherichaksï arhijperaspti eska ísï arhiaspka jimbokaksï t'irekua mirikurhispka jatsirani.

¹⁷Ka Jesusi mítespti ambe engaksï arhijperani jápka ka arhiaspti: — ¿Andijtsïsï kurhinda uandanheani jaki? ¿Útasïjtsï no jánhaskasïnki? ¿Andi xántsï chupejtsïski?

¹⁸¿Andi nójtsï exexaki nájkirukajtsï eskani jaka? ¿Ka andi nójtsï kurhangusïnki nájkirukajtsï kurhani jaka?[114] ¿Andi nójtsï míasïnki

¹⁹engani iúmu echakua kurhinda jimbojkuni iumu míli t'irerpeka? ¿Nójtsï míasïnki namonijtsï tsïkiata uiniri tánantaspki pakarata? Ka imaksï arhispti: — Témbeni tsimani.[115]

²⁰— Ka ekani iúmu tsimani kurhinda jimbojku, témbeni irepeta (4,000) t'irerpepka ¿Namontsï tsïkiata uinirantaspki pakarata? Ka imaksï arhispti: — Iúmu tsimani.[116]

²¹Ka arhiaspti: — ¿Andi útasïjtsï no úsïnki jánhaskani?

²²[117] Engaksï Betsaida niárapka, Jesusiniksï pátenharhini ma pákuspti, ka kómarhisptiksï eska p'ájtsïkupiringa ambakerantani.

²³Jesusi pátenharhini jupijkutini iretarhu petaataspti. Ka kuechenda[118] atanharhikuspti eskuarhu, ka p'ájtsïkuspti ka kurhamarheni ¿Exexakiri?

²⁴Ka ima pátenharhi uénaspti exeni, ka uandaspti: — K'uiripuechani xéaxaka, anhatapueni járhatichenksï xanharaxati.

²⁵Jesusi ménderu p'ánharhikuspti, ka pátenharhi, Jesusini exeni pakareraspti, ka sési eskantaspti, ka úspti iámendu ambe sési exeni.

²⁶Ka Jesusi axantaspti chénjembo, ka arhispti: — Ásï jáma k'uanhatsentani iretarhu, [ka ásï nemani jáma aianguni.][119]

²⁷Ísï tátsekua, Jesusi ka imeri jurhengorherichaksï niraspti ireta sapirhaticharhu isï, engaksï Sesarea Filipueri[120] uanondani isï jaka. Ka xanhari jimbo kurhamarheaspti imeri jurhengorherichani: — ¿Na uandanhaxaki, eskani néska?

²⁸Ka imaksï arhispti: — Uandasïndiksï máru eskari Juánu itsï atajtsïkpiriska,[121] ka máteruechaksï uandasïndi eskari Eliasïska,[122] ka máteruksï uandasïndi eskari Diósïri uandariska.

²⁹Ka Jesusi ménderu kurhamarheaspti: — ¿Ka cha néna uandasïnki? Ka Pédru arhispti: — T'úri Krístueska.[123]

³⁰Ka Jesusi arhiaspti eskaksï no jámapiringa imani ambe uandantani.[124]

³¹Ka Jesusi uénaspti uandantani eska Acheti Uájpa[125] kánekua nósesi nitamanchapiringa, ka eskaksï no xénhchapringa k'érati tátecha, níjtu táteri juramuticha, ka níjtu juramukua jurhentpiricha. Uandasïrempti eskaksï atapiringa uándikuni, ka eska tanimu jurhia jimbo tsíntapiringa.

³²Íni ambe aianguaxapti. Ka Pédru támu páspti Jesusini xukani.

³³Ka Jesusi k'uanhatsentaspti, ka jurhengorherichani japarini, Pédruni xukaspti, ísï arhiparini: — ¡Kéndikucherini, Nóambakiti![126] T'úri no kurhangusïnga Diósïri ambe, parhakpeni anapu ambejkurisï exejka.

³⁴Tátsekua Jesusi tánpentaspti ka jurhengorheri jémbechantu uandajpantaaspti, ka arhiaspti: — Eka nema uéjka jucheti jurhengorherini, imeri eratsekuechani ka jánguechani mirikurhiaue, krúsini ichandikorhe ka chúxapuerini.

³⁵Jimboka ne enga tsípekuani patsakorhenhchajka, ima sánderu tsîtaati; Ka tsípekua andakorheati ne enga jíndeni jimbo ka ambakiti aiangperakuani jimbo uarhiaka,[127]

³⁶¿Andi embe marhuasïni iámu parhakpenini andakorheni, ka jini tsípekuani tsîtakorheni?

³⁷Ka ¿Andi ma náxani jimbo úsïni tsípekua piákorheni?[128]

³⁸Jimboka, ekarini nema k'uratsenharhiska ísku jándichani japarini, ka k'amanharhintstichani japarini, ka eka jucheti aiangpekua jimbojtu k'uratsenharhiska, Acheti Uájpajtu[129] k'uratsenharhiati jiájkani enga Tátjemberi t'íntskuani jukarini junguaka, ka enga ánjeli pímbinharhatichani jinguni junguaka.[130]