Read Western Highland Purepecha San Lucas 1 Bible Online

San Lucas 1 - Western Highland Purepecha bible

San Lucas 1

¹[1] Uánekuaksï jángorhentasti karantani imani ambe enga Acha Diósï juchantsïni jinguni úka,

²ísï eskajtsïni na aianguka ima engaksï exekorheka uénani jámani, ka engaksï tátsekua uandakuani aiangpentani ánchekorheni p'ika.

³Acha Teófilu,[2] jíjtuni sésimenduni iámendu ambe iatsitakuarhu kurhangorheska néna uénakorhespi, ka sési péntaska ka exeska eska marhuauaka iámendu íni ambe karachentanikini,

⁴eskari sésimendu míteaka eska ísïskamendu ima ambe engari xáni aiangunhakia.

⁵Jimajkani isï enga Erodesi[3] Judea irecheni jápka, jarhaspti táta ma enga Sakariasï arhinhempka, enga Abiásïcha[4] jingunipka. Imeri uarhiti Aaroniri[5] sïrukuespti ka Isabeli arhinhasïrempti.

⁶Ka tsimarhenksï nóma ambe arhikua jukaspti Diósïni japarini, ka Acheri uandakuani ka juramukuechanksï kurhandirakusïrempti ka nómbemaksï nósesi jásï ambe exemenhantasïrempti.

⁷Ka nóksï ma sapini kóndenhaspti, jimboka Isabeli no úsïrempka sapi káani; ka jimbokajtuksï tsimarheni kánekua k'érispkia.[6]

⁸Ma xanhari, jimajkani engaksï Sakariasïri tátecha p'itarapka k'éri tiósïo marhuani,

⁹ka ísï eskaksï tátecha na p'indekua jatsipka, Sakariasïni niárakueraspti k'éri tiósïo xunhanda jatsikuni.[7]

¹⁰Ka eka na xunhanda kurhiranhani jápka, iámu jima anapuecha uérakua janhaspti uandamukukorhenhani.

¹¹Ka enga ísï úkorheni jápka, Sakariasïni ánjeli ma xarhakuspti, xunhanda kurhiratarakuarhu t'irerkandani anhaxurhitini jarhani.

¹²Ka ánjelini exerini, Sakariasï kánekua ísku pakareraspti ka kánekua chérakorhespti.

¹³Ka ánjeli arhispti: — Sakariasï, ásï jáma chéni, jimboka Diósï kurhaskia chéti uandamukukorhekua, ka chéti uarhiti Isabeli sapini ma kángorheatia; ka Juánuri arhiratarkorheaka,

¹⁴t'úri kánekua tsípeaka, ka uánekua tsípenhaati enga ima andajpenuaka,

¹⁵jimboka chéti uátsï Achani jinguni k'éri ambeuaka. Nóma jásï ka nómeni kauikua ts'émuati,[8] ka nótki jamberi kángorhenhani janhaati enga t'uíni Espiritu Sántuni[9] iámu incharhekorhetini jauakia.

¹⁶Ka uánekua Israeli anapuecha Acha Diósïni jinguni péntauati.

¹⁷Inde Juánu Eliasïri uinhapekua ka espiritu jinguni Achani urhekupaati, ka tátjembechani uájpechani[10] jinguni sési arhijpetarantauati, ka no kurhandirechani jurhendauati eskaksï míakua jukaaka. Ka ísï jámaparini iretani miátaati eskaksï Achani sési erokaaka.

¹⁸Ka Sakariasï ánjelini kurhamarhespti: — ¿Ka andi ji néna sésimenduni míteaia eskarini no ískusï ísï arhini jaka? Jimbokani jucha kánekua k'ératiskia.

¹⁹Ka ánjeli arhispti: Ji Gabrieliska[11] ka Diósïni marhuakusïnga, ka imarini axasti t'úngeni jinguni uandontskorheni, ka íni ambakiti aiangperakuakini juácheni.

²⁰Ka engarini ísï no jakajkucheka indeni ambe engakini ji arhika, nunuxiri úkorheaka; nóri úaka uandani imani jurhiatekua jamberi, enga jamberi iámu ambe ísï úkorheaka.

²¹Ka enga incharini ísï úkorheni jápka, Sakariasï uérakua eronhantaxapti ka iámenduechaksï kurhamarhekorhesïrempti andisï xáni ióndani jápi k'éri tiósïo uéntani.

²²Ka enga na ióni jimbo uéntapkia, no úsïrempti uandaxetspeni; ka sóntku jánhaskanheraspti eska k'éri tiósïo incharini ambe ma xarhakuspka, jimboka no úsïrempka uandani ka jimboka manajkurhaparinderku aiangpexapkia; ka nunuxi pakaraspti.

²³Ka enga na k'amarapkia k'éri tiósïo marhuani, Sakariasï chénjembo níntaspti.[12]

²⁴Ka tátsekua enga na i ambe úkorhepkia, imeri uarhiti Isabeli sapini ma erokorhexaptia, ka iúmu kutsï no uéraspti, ísï eratseparini:

²⁵“Acharini kóndentastia, ka ísï jámani nóteruni arhinhchanhaakia.”[13]

²⁶Kuímu kutsï nitamatini,[14] Diósï axaspti ánjeli Gabrielini Galilea anapu iretarhu ma enga Nasareti[15] arhinhajka,

²⁷jima irekaspti uátsï ma enga Maria arhinhempka; no p'árhekatespti, k'óru kurhajkorhekata jarhasptia[16] eska tataka ma jinguni uambuchapiringa enga Jose arhinhempka, enga irecha Dabiri sïrukuepka.

²⁸Ánjeli jima inchaspti enga uátsï jápka, ka arhispti: — ¡Tsípe t'u, kánekuamenduri xénhchakateska! Acha t'úngeni jingunisti.

²⁹Ka Maria ísku pakareraspti ísï kurharini, ka kurhamarhekorhesirempti, ¿Ambe arhikuekempki enga ísï uandajpapka?

³⁰Ka ánjeli arhispti: — Maria ásï jáma chéni, jimboka Diósï t'úngenimendu jinguniska.

³¹Iásïri uératini sapini erokorheni jauaka: Sapiniri ma kángorheaka, ka Jesusi arhiratarkorheakari.

³²Ka ima k'éri ambeuati, ka arhiatiksï eska ima uájpeska enga K'érika, ka Acha Diósï k'érikuarhu péraati, májkueni eska tátjemba Dabini na pérapka,

³³ka eska méntku ísï Jakobueri sïrukuechani juramuakuauaka. Ka imeri juramukua nómeni k'amakurhiati.

³⁴Ka Maria ánjelini arhispti: — ¿Ka inde ambe néna ísï úkorhea? Engarini nótki ma tataka píreni jaka.

³⁵Ka ánjeli mókuntani arhispti: — Espiritu Sántukini andarheraati, ka Diósïri uinhapekuakini t'úngeni andajtsïkueraati, ísï jimbo, sapi enga andajpenuaka Sántuesti ka Diósï Uájpesti.

³⁶Isabelijtu sapini ma kámaati, ima enga t'úngeni jinguni márkueka, nájkiruka k'érikia, ka engaksï arhimpka eska no úsïrempka sapi káani, kuímu kutsïstia enga sapi jinguni jámani jakaia.

³⁷Jimboka Diósï nómbema no úsïnga úni.

³⁸Jimajkani Maria arhispti: “Ji Acheri jántspiriska; Diósïrini káme eskamendurini t'u na arhika.” Enga na ísï úkorhepka, ánjeli níntaspti.

³⁹Ka ima jurhiatekuechani jimbo Maria sóntku iretarhu ma karhamaspti enga Judea jaka,

⁴⁰ka enga Sakariasïo inchapka, Isabelini uandajpaspti.

⁴¹Ka enga Isabeli kurhapka eska Maria uandajpaspka, sapi Isabelini uinhamu manaakuspti, ka Espiritu Sántuni iámu incharhekorhespti.

⁴²Ka jimajkani Isabeli uinhachaparini uandaspti: — ¡Diósïkini újchakurasti, sánderu eska iámendu nanechani ka chéti uátsïni újchakurasti!

⁴³¿Andi ji ambe xániski engarini ísï juka jucheti Acheri amamba jíndeni exeni?

⁴⁴Engachkakini ji kurhaka janoni, jucheti uátsïtirini manaakusti xáni tsípeni.

⁴⁵¡T'u k'ória engari jakajkuka eska iámendu ambe engakini Acha arhijka úkorheaka!

⁴⁶Jimajkani Maria uénhekorhespti: “Jucheti mintsita k'éri ambe arhisïndi Acheri k'érikuani.

⁴⁷Jucheti mintsita tsípexati Diósï jinguni, enga jucheti p'ímutantspirika.

⁴⁸Jimbokarini Diósï jíndeni erakuska, engani imeri jántsipiri sapichu méka, ka iásï uératini méntkisïjtsïni arhiati eskani újchakurakateska,

⁴⁹jimboka ima enga iámu uinhapekua jatsika, jíndenirini kánekua sési ambe úcheska. ¡Pímbinhaxetisti imeri jakangurhikua!

⁵⁰Ka méntku ísï p'amojkuasïndi imechani engaksï chénharhijka.

⁵¹Ka imeri uinhapxurhakua jimbo k'éramakorherichani eratsekua xerekuantasti.

⁵²Ka jarhamekua jinguni uandarichani juramukua euantaasti, ka k'érikuarhu pérasti imechani engaksï kétsekua uérajka.

⁵³Kánekua jatsikorhekua íntsaasti engaksï t'irekua no jatsijka, ka jatsikorherichani ísku petantaasti.

⁵⁴Imeri jántspiri Israelini jurhasti jarhuatani, p'amojkperakua míaparini.

⁵⁵Eska méntkisï juchari ióntki anapuechani, Abranini ka imeri sïrukuani na aiakuapka.”[17]

⁵⁶Maria Isabelio tanimu kutsï jatsïpespti, ka tátsekua níntasptia.

⁵⁷Enga niárapka jurhiata enga Isabeli sapini kángorhepiringia, tataka sapichuni ma kángorhespti.

⁵⁸Imeri irenguticha ka márkuechaksï niraspti exentani, ka sési ambe uandakuaksï pákuni engaksï mítepka eska Acha kánekua kóndespka,

⁵⁹ka enga sapi na iúmu tanimu jurhia andangutapkia, imaksï niáraspti ts'iuerakuani pasïri p'ikujtsïkukuni. Ka uéksïremptiksï imantu Sakariasï jakangurhitarani, eska tátjemba na arhinhempka.

⁶⁰Enga úpka, amamba ísï uandaspti: — Nómbe, Juánu arhinhaati.

⁶¹Uánekuntasptiksï arhini: — ¿Andi? Chéni nónema ísï arhinhasïndi.

⁶²Ka jimajkanksï tataka sapichueri tátjembani manajkurhaparini kurhamarhespti, néna uéksïrempki eska arhinhapiringa.

⁶³Tátjemba k'ereri ma kurhajkorhespti jimboka jima karanharhikuni uéksïrempka; ka ísï karaspti: “Juánuesti.” Ka iámenduechaksï ísku pakareraspti.

⁶⁴Ka enga na karapka, Sakariasï nunuxikua jupinapaspti, ka uandakua junguakuspti, ka Diósïni k'éri ambe arhispti.

⁶⁵Ka iámendu jimajku ísï anapuecha ísku pakareranhasïrempti, ka iápuru iretecharhu, engaksï Judea juátechani jimbo jaka, uandanhantasïrempti ambe enga úkorhepka.

⁶⁶Iámendu engaksï kurhajchapka mintsitarhuksï patsakorhesïrempti, ka uandasïremptiksï: “¿I sapi náxani k'éri ambeua?” Jimboka sési jimbo Acha Diósïri uinhapekua sapi jinguni xarharasïrempka.

⁶⁷Ka Sakariasï tataka sapichueri tátjemba Espiritu Sántuni incharhekorhetini, ísï uénhekorhespti eska Diósïri uandari ma:

⁶⁸“¡Acha, Israeliri Diósï k'éri ambesti jimboka imeri iretani p'ímutantani jurhaska!

⁶⁹P'ímutantspirini májtsïni axachesti enga iámu juramukua kámka, enga imeri jántspiri Dabiri sïrukueka,

⁷⁰ínisï ióntki aiatspepti, engaksï Diósïri uandari erakukatecha uandempka:

⁷¹Eskajtsïni kuájpentapiringa imechani jinguni engajtsïni kurhunhejka, ka iámendu imechani jinguni engajtsïni ikiachejka,

⁷²eska juchari ióntki anapuechani kóndeantapiringa ka eska imeri ambakiti aiatspekuani no mirikurhipiringa.

⁷³Ka aristi uandakua aiatspekata enga juchari Táte Abranini aiakupka: Eskajtsïni sésekua íntskupiringa

⁷⁴no chéta jinguni irekani jarhani, eskajtsïni nóteru nema ikiacheaka.

⁷⁵Ka ísïchi kaxumbekua ka pímpinhaxekua jinguni marhuakuni, ka ima jingunchi jarhani enga jamberi xáni juchari tsípekueuaka.

⁷⁶Ka t'u, jucheti uátsï, arhinhaakari eskari Diósï k'ériri uandariska, jimbokari Achani imeri xanharichani urhekupaaka ambantskakupaani.

⁷⁷Eskari imeri iretani p'ímutantskua mítetaraaka, ka eskaksï k'amanharhintskuechani púamenhantaaka.

⁷⁸Jimbokajtsïni juchari Diósï, enga xáni p'amojpejka iótakuarhu uératini t'íntskua jimbanhejtsïni juácheska,

⁷⁹enga imechani erajkutauaka engaksï kánekua pájpakandu irekani jaka, ka jupijtapantsïni eskachi jucha sési pájperaaka.”[18]

⁸⁰Ka tataka sapichu k'uiripexapti ka imeri espiritu uinhapexapti. Ka jima irekaspti enga nónema irekaka, jimajkani jamberi enga Israelichani xarhakuantaapka.