Read Western Highland Purepecha San Lucas 13 Bible Online

San Lucas 13 - Western Highland Purepecha bible

San Lucas 13

¹Ístuksï imani jurhiatekuechani niraspti máru Jesusini uandaxekuni, ka aiangusptiksï eska Pilatu Galilea anapuechani uándikuaspka, ka eskaksï imecheri iurhiri, karichi kéjtsïtakatecheri iurhiri jinguni jeuetaspka.

²Jesusi arhiaspti: “¿Andi cha eratsentasïnki eskaksï Galilea anapuecha xáni k'amanharhintskua jimbosï ísï úkorhencha; jimbokaksï jini anapuecha jinguni ima sánderu k'amanharhintstiska?

³Aianguxakaksïni eska no ísïska; ka ekajtsï chájtu Diósïni no andarhentaska, chájtujtsï uarhiaka.

⁴¿O cha jakajkuxaki eskaksï Jerusaleni ima témbeni iúmu tanimu sánderu k'amanharhintaspka enga ísï Siloeri k'umanchekua iótati jatajchakuapka?

⁵Aianguxakaksïni eska no ísïska ka ekajtsï chájtu Diósïni no andarhentaska, chájtujtsï uarhiaka.”

⁶[37] Jesusi íni uandantskua terukutarantskuani aianguaspti: “Acheti ma uba jukanchaspti ka jígusï ma jima anhaakuspti, ka niraspti erarhutani, ka nóma jukarhukurhaspti.

⁷Ísï jimbo arhispti imani achetini enga ubecheri kuáripka: ‘Exe, tanimu uéxurhini jurhaskia indeni jígusïni erarhutani, ka nómeni jukarhukurhastia. Ch'apaia; ¿Ambe úni ísku echeri úrani jaua?’

⁸Ka kuári arhispti: ‘Tata, íni uéxurhinterku jurajkia; jurajkuni ji ambandukuni ka terendapu jatsindukuni.

⁹Nándika ambe ísï jámani úakia jukani; ka eka nómbe, ch'apaakaria.’ ”

¹⁰[38] Sábadu ma jimbo, Jesusi k'umanchekua tángorhentskuarhu ma jurhentpeni uénaspti;

¹¹ka jima jarhaspti uarhiti ma enga témbeni iúmu tanimu uéxurhini p'amenchani jápkia. Nósesi jásï espiritu ma juruparhataspti, ka nónena jásï jimbo úsïrempti jurhimbeparhantani.

¹²Enga Jesusi exepka, ióarhispti ka arhini: — Nana, chéti p'amenchakuakini jurajkustia.

¹³Ka p'ájtsïkuspti, ka uarhiti jimajku jurhimbeparhantaspti, ka Diósïni uénaspti k'éri ambe arhini.

¹⁴Ka k'umanchekua tángorhentskuerhu juramuti ikiaspti, jimboka Jesusi sábadu jurhiatekua ambakerantaspka, ka arhijpespti: — Kuímu jurhia ánchekorhekuesti; imani jurhiatekuechani ju je eskajtsï ambakeranhantaaka, ásï sábadu jurhiatekua ju je.

¹⁵Ka Acha arhispti: — ¡Ísku ísï uandari! ¿Andi no cha iámenduecha sábadujtu chári ch'anchakini o úakasïni pásïni itsïmatani?

¹⁶Ka ísï jimbo, íni uarhitini enga Abraniri sïrukueka ka enga nóambakiti íni p'amenchakua jimbo témbeni iúmu tanimu uéxurhini jótatini jápka, ¿Andi no uetarhexapi náuejki sábadueni eska kueratanhapiringa?

¹⁷Enga Jesusi ísï uandapka, ima engaksï ikiakuempka k'uratsenksï pakaraspti; ka máteruecha tsípenhasïrempti exeparini enga Jesusi xáni k'éri ambe úempka.

¹⁸Ka ístu Jesusi uandaspti: “¿Ambeni jáxeski Diósïri irechekua ka ambe jingunichi úpirini terukutantani?

¹⁹Mostaseni jáxesti enga nema ikarakorhejka, ka enga p'ukutapueni k'éjka, xáni k'éni engaksï jamberi kuínicha újka jima xerekua úkorheni.”[39]

²⁰Ka ístu Jesusi uandaspti: “Irechekua Diósïrini ¿Ambe jinguni terukutasïnki?

²¹Xarhipitini jáxesti enga uarhiti ma újka tanimu ts'éretakua jarina jimbojku iámu tsïrerini xarhiperani.”[40]

²²Xanhari jimbo Jerusaleni nirani jámani, Jesusi iámendu iretecharhu enga nitamempka jurhentpemaspti.

²³Ka nema kurhamarhespti: — Acha, ¿Namoniksï p'ímutanhantaa? Ka ima arhispti:

²⁴— Jángorhentsi je jimesï inchani enga no kómukurhaka, jimbokaksïni arhixaka eskaksï uánekua inchakuekaaka, ka nóksï úati.

²⁵Tátsekua enga jima anapu jauaraaka ka míkani, cha engajtsï uérakua jaka, uámutaakajtsï ka uandaakajtsï: Tata, mítachejtsïni. Ka imaksïni arhiati: No míteska cha nani anapueski.

²⁶Jimajkanijtsï uénaaka cha arhini: T'úngeni jingunichi t'ireska ka itsïmani ka t'úri juchari iretecharhu jurhentpeska.

²⁷Ka imaksïni arhiati: No míteska cha nani anapueski. ¡Nósesi ambe úricha, kéndikuchejtsïni![41]

²⁸Jimajkantsï uenhejchaaka ka no sésijtsï p'ikuarheraaka exeparini enga Abrani ka Isaaki ka Jacobu ka iámendu Diósïri uandakua páricha Diósïri irechekuarhu jarhaska, ka eskajtsï cha uérakua pakatanhaska.

²⁹Jimboka karhamani ka kétsemani ísï uératini junhaaka, tata jurhiata andarakuarhu ka tata jurhiata inchajtsïkukuarhu uératini isï junhaati, ka Diósïri irechekuarhu uaxakanhaati t'irenhani.

³⁰Jiánksï urheteuati máru engaksï iásï k'amarhunika, ka ima engaksï iásï urheteka, imaksï k'amarhuni jámaniuaati.

³¹Jimajkanksï máru fariseouechajtu niáraspti, ka Jesusinksï arhispti: — Uéakuntsï iretarhu jimbokakini Erodesi uándikukuekaxaka.

³²Ka ima arhiaspti: — Ni je arhini imani tandojchpirini: Exe, iásï ka pauani nóambakitichani petarhejpeantauaka ka p'amenchatichani ambakerantauaka, ka ísï pauani k'amaraaka.

³³K'óru uétarhesïndi eskani xanharaakateruni, pauani ka ísï pauantu, jimboka nósesiska eska Diósïri uandakua pári ma no Jerusaleni uarhiaka.

³⁴“¡Ákeru t'u Jerusaleni, engari Diósïri uandakua párichani uándikuajka, ka engari Diósïri ánchperata úrichani tsakapkueraajka! ¡Namoni xanhari uékaski chéti sapichani ísï kúndantaani eska tsíkata pipichu sapirhatichani na ójchakurantaajka, ka nóri uékaska!

³⁵Exechka je ia, chári ireta jurarkunhaati ka arhixakaksïni eskajtsïni nóteru xéntaaka jiájkani jamberi enga niáraaka jurhiata enga cha uandaaka: ‘¡K'éri ambe arhikuesti ima enga Acheri jakangurhikua jimbo jurhani jaka!’ ”[42]