Read Western Highland Purepecha San Lucas 15 Bible Online

San Lucas 15 - Western Highland Purepecha bible

San Lucas 15

¹[45] Iámendu ima engaksï Roma axakua tumina tánempka, ka máteru engaksï nósesi úrini mítekatepka andarherasïremptiksï Jesusini kurhajchani.

²Indeni ambe jimboksï fariseoecha ka juramukua jurhentpiricha arhinhchasïrempti, arhiparini: — I k'amanharhintstichani sési eroasïndi ka imecha jinguni t'iresïndi.

³Jimajkani Jesusi íni uandantskua terukutarantskua uandaspti:

⁴“¿Ne cha ma ísï enga iúmu ekuatse (100) karichichani káajka ka enga ma kuátajka, no máteru t'ámu ekuatse témbeni iúmu t'ámu (99) juátarhu jurarkuasïnki, ka nirani jirinhantani karichini enga kuátaka, ka no níntasïndi eka no xéntani jarhajka?

⁵Ka enga exentajkia, tsípeparini ichandisïndi

⁶ka enga chénjembo niántajka, p'íchpiri jémbechani ka irengutichani tánantaasïndi ka arhiasïndi: ‘Ju je jíndeni jinguni tsípeni, jimbokani xéntaskia karichini engani kuátapka.’

⁷Aianguxakaksïni eska májkueni tsípekua jarhasïnga auandarhu enga k'amanharhintsti ma Diósïni andarhentajka, eska t'ámu ekuatse témbeni iúmu t'ámu (99) engaksï no uétarhenchajka Diósïni andarhentani.”

⁸“O máteria: ¿Náki uarhiti enga témbeni tumina kámani jauaka ka ma tsîtani no erajkutarakua ma étskusïnki ka iámu k'umanchekuarhu iatsitakuarhu k'arhatani? ¿Ka no jurajkuntani jirinhantani enga no xéntani jauaka?

⁹Ka enga na xéntajka, tánantaasïndi imeri p'íchpirichani ka irengutichani ka arhiani: ‘Tsípe je jíndeni jinguni, jimbokani xéntaskiia tumina engani tsîtapka.’

¹⁰Arhixakaksïni eskaksï méntkueni tsípesïnga Diósïri ánjelicha enga k'amanharhintsti ma Diósïni andarhentajka.”

¹¹Jesusi uandantasptijtu: “Acheti ma tsimani sapichani kásïrempti,

¹²ka ima enga sánderu sapichuepka tátjembani arhispti: ‘Táte, íntskurini enga xáni juchetika, imani ambe engarini jíndeni pakatacheaka.’

¹³Namoni jurhia tátsekua, uájpa sapichu atarantaspti enga xáni imeripka, ka imani tumina jimbo iauani máteru k'éri iretarhu niraspti, ka jima nánditerkueni irekaparini tumina iámu ambendarhespti.

¹⁴Ka enga na k'amajkutapkia, ka imani k'éri iretarhu kánekua nómbe t'irekua jarhani ima uénaspti k'arhimaparini jámani.

¹⁵Niraspti jima anapu achetini ma ánchekorheta kurhakuni, ka ima uéramani axaspti kúchi erangutaraani.

¹⁶Uarhisïrempti k'arhimani ka kúchicheri t'irekua jamberi uéksïremptia arhani, ka nónema intsïmbesïrempti.

¹⁷Enga jamberi sési eratsentapka: ‘¡Uáni ánchekorherichaksï jucheti táteo t'irekua jukari jamberi jatsikorhesti, ka ji ixu uarhixaka k'arhimani!

¹⁸K'uanhatsentaaka jucheti táteo ka arhiaka: Jucheti Táte, Diósïni ka t'úngenikini k'amanharhichentaska;

¹⁹nóteruni nitatarheska chéti uájpeni; chéti ánchekorheri ménirini káma.’

²⁰Ísï jimbo xanhari jatantaspti ka tátjemberi k'umanchekuarhu k'uanhatsentaspti.” “Enga útasï iauaniteru jápka, tátjemba exespti ka p'amojkuspti. Uiriaspti kúntani ka kamakamataspti ka putinharhikuni erontatini.

²¹Ima arhispti: ‘Jucheti Táte, Diósïni ka t'úngenikini k'amanharhichentaska; ka nóteruni nitatarheska chéti uájpeni.’

²²Ka tátjemba jántspiri jémbechani juramukuaspti: ‘Kókuani, takusï sánderu ambakiti peta je, ka xukutantsï je; jukajkurhakua tiripitiri ma inchajkurhata je, ka kuarhachijtu jatsikuntani je.

²³Jua je úakasï sapichuni enga sánderu p'ukuka ka ata je. ¡K'uínchekuachi úaka ka k'éri máchi t'ireaka!

²⁴Jimboka i jucheti sapi uarhirixapka ka tsíntasti; tsînchespti ka xéntaskachia.’ Ka k'uínchekuaksï uénaspti.”

²⁵“Enga ísï úkorheni jápka, uájpa urheti juátarhu jámaxapti. Enga niántani jápka, kústakua kurhaspti ka eska uarhanhaxapka.

²⁶Jimajkani jántspirini ma ióarhispti ka kurhamarhespti ambe úkorhexapi.

²⁷‘Chéti erachi junguasti ka chéti táte úakasï sapichu sánderu p'ukurakatani atarkorhesti, jimboka sési janonguaska nómbema úkorhenchatini.’

²⁸Ka uájpa urheti xáni ikiaspti enga jamberi no uékempka inchantani, ísï jimbo, tátjemba nitsïkorhespti kómarhini eska ichantapiringa.

²⁹Ka ima tátjembani arhispti: ‘Míteskari namoni uéxurhinikini marhuacheskia, ka nómenirini íntskuska náuejki karichi sapichu ma eskani jucheti p'íchpirichani jinguni t'irekua ma úntapiringa.

³⁰Ka iásï k'ória enga i chéti sapi janonguaka enga chéti tumina uarhiti ísku jándichani jinguni ambendarheka, ka t'u indeni úakasï sánderu p'ukurakatani atakuni.’

³¹Tátjemba arhispti: ‘Jucheti uátsï, t'úri méntku jíndeni jinguni jarhaska, ka iámu ambe eskani xáni jatsika chétisti.

³²K'óru uétarhexapti k'uíchekua úni k'éri t'irekua ma jinguni ka tsípeni, jimboka chéti erachi enga uarhirini jápka, tsíntasti; tsînchespti ka xéntaskachia.’ ”