Read Western Highland Purepecha San Lucas 16 Bible Online

San Lucas 16 - Western Highland Purepecha bible

San Lucas 16

¹[46] Jesusi jurhengorheri jémbechani aianguasptijtu: “Jarhaspti ma acheti jatsikorheri enga imeri jántspiricheri juramutini ma kámempka; ka nirasptiksï aianguni eska ima jántspiri jatsikorhekuani nósesi úrakuxapka.

²Jatsikorheri ióarhispti jántspiricheri juramutini ka arhini: ‘¿Ambeski ima ambe engani chéti ambe aiangunhantani jaka? Aianguntsïrini nénari ánchekorhexaki, jimbokakini kénditaakia; nóteruri jucheti jántspiricheri juramutiuakia.’

³Jántspiricheri juramuti eratsentani uénaspti: ‘¿Néna jámaia engarini jucheti ánchetpiri ánchekorheta euantaakia? Nóteruni jurhenaska echeri ánchetani, ka k'uratsesïnga intsïmbetkorheni jámani jarhani.

⁴Míteskia néna engani jámaaka eskani jatsiaka nérini jiókaa chénjembo jiájkani engani ísku pakaraaka nóteru ánchekorheni.’

⁵Mándani arhispti ióarhiani imechani engaksï imeri ánchetpirini kánguni jápka. Imani enga urheta niárapka kurhamarhespti ‘¿Andi náxaniri kánguxaki juchari ánchetpirini?’

⁶Ka ima arhispti: ‘Iúmu ekuatse k'uísï olibueri tamakua kánguxaka.’ Jántspiricheri juramuti arhispti: ‘Inde kókuani chéti sïranda; uaxaka ka máteru úntani enga tsimani ekuatse témbeniterkueriuakia.’

⁷Tátsekua máteruni kurhamarhespti: ‘Ka t'u, ¿Na xániri kánguxaki?’ Ima arhispti: ‘Iúmu ekuatse xúndi tríju.’ Imani arhispti: ‘Inde chéti sïranda; máteru úntsï, t'ámu ekuatserijku.’”

⁸“Imeri ánchetpiri sési xéspti enga jántspiricheri juramuti sïpajkurha na eratsepka jimboka sési eratsekuntaspka néna uérakuni. Jimbokaksï parhakpeni anapuecha sánderu xékuntasïnga néna pájperani máteruechani jinguni eskaksï ima engaksï t'íntskuani mítetika.”

⁹“Ka arhistachexakaksïni eskajtsï parhakpeni anapu jatsikorhekua nósesi andakatani, p'íchpirichani andakorhetarauaka, eska jiájkani enga jatsikorhekua ambe k'amakurhiaaka, méntku ísï anapu irekuarhujtsï sési eronhaaka.”

¹⁰“Ne enga mintsinharhikueka sáni ambe patsani, ístu mintsinharhikuesti uánekua ambe patsani; ka ima enga no újka sántku ambe patsani, uánekua ambe sánderu no úsïndi patsani.

¹¹Ka ekajtsï ixu parhakpeni anapu jatsikorhekua no mintsinharhikueka patsaranhani, ¿Néksïni jiájkutaa ambakiti jatsikorhekuani patsarani?

¹²Ka ekajtsï no mintsinharhikueka máteruecheri ambe patsani, ¿Néksïni íntskuntaa imani enga chárika?”

¹³“Nóma jántspiri úsïndi tsimani ánchetpirichani marhuakuaani; jimboka ma echakuani ikiakuaka ka máteruni sési kámani, o ma echakuani sési pakarakuati ka máteruni no jaiapanhentaati. No úkorhesti Diósïni ka jatsikorhekuani márku marhuakuani.”

¹⁴Fariseouecha engaksï tumina kánhchempka, kurhasptiksï iámu indeni ambe ka Jesusinksï teresmarhuspti.

¹⁵Ka Jesusi arhiaspti: “Chájtsïsï k'uiripuni jinguni kaxumbiti eratakorhejka, k'óru Diósï mítesti chári mintsitani; jimboka Diósï imani no xénhchasïnga enga sánderu k'éri eratanhajka.”

¹⁶“Juramukua karakata ka Diósïri uandaricha jíani jamberi marhuasti enga jamberi Juánueka. Jiájkani uératinitki jimbanhe ambakiti aiangperakua Diósïri irechekueri ambe uandanhantaxati, ka iámenduecha inchandimenhantaxati jima inchakuekanhani.”

¹⁷“Sánderu no úkua jukasti eska auanda ka parhakpeni k'amakurhiaka, eska ambema no ísï úkorheni eska juramukuarhu námendu karakata jaka.”

¹⁸[47] “Eka ma acheti jurajkuska témbani ka máteruni tembuntani, ísku jándixati; ka ne enga uarhiti jurajkukatani tembuntaska imajtu ísku jándixati.”

¹⁹“Acheti jatsikorheri ma jarhaspti, enga ambakiti takusï xukuparhempka ka enga pauanipauani ambakiti t'irekua intsïmpempka.

²⁰Jarhasptijtu no jatsikorheri ma enga Lásaru arhinhempka, enga iámu xúta jukarhekorhepkia ka enga méntkisï jatsikorherio uaxamukuempka.

²¹Ima ántasïrempti ambe enga jatsikorheri uéjkuempka; ka uíchuecha jamberiksï andarherasïrempti iuani kuenamakuni.

²²Enga ima no jatsikorheri uarhipkia, ánjelichaksï Abrani jinguni páspti uaxastani. Jatsikorherijtu uarhispti ka jatsinhantasptia.”

²³“Ka enga jatsikorheri nósesi nitamakorheni jápka jima engaksï uarhiricha niárajka, eranchespti ka iauani uératini Abranini exeni, ka Lásaruni ma akandani uaxatani jarhani.

²⁴Jimajkani uinhachakuspti: ‘¡Táte Abrani p'amojkurini! Arhi Lásaruni eska munchujkurhakua kuakarhutaaka ka eskarini juuaka kuakachatantani, jimbokani íni chpírirhu kánekua nósesi p'ikuarheraxaka.’

²⁵K'óru Abrani arhispti: ‘Jucheti uátsï, míantsï eskari t'u intsïnhaskia ambakiti ambe engari nótki uarhimpka, ka Lásaru enga parhakpeni nósesi jásï ambe p'ika. Iásï ixu inde karhoanhantaxati, ka t'úri jimini nósesi p'ikuarheraxaka.

²⁶Támtu axu urhepani kánekuamendu jauanhesti; ka nónema úsïndi parhikuni jiniani nirani ka nójtu úsïndi jiniani uératini ixueni junhani.’”

²⁷“Ka jatsikorheri arhispti: ‘Táte Abrani kómarhixakakini ménderu eskari sáni Lásaruni jucheti táteo axaaka,

²⁸jima engaksï iúmu jucheti erachiecha jaka, eska xukauaka ka nóksï imajtu ixu nósesi p'ikuarherakuarhu janoni.’

²⁹Abrani uandaspti: ‘Imaksï karakatechani jatsikorheastia engaksï Moisesi ka Diósïri uandaricha karaka: ¡Kurhajchaueksï!’

³⁰Jimajkani jatsikorheri arhispti: ‘Nóchka ambe Táte Abrani, xántku ísïksï no úati; k'óru enga nema xarhakuapiringa tsíntatini, imaksï Diósïni andarhentapirindi.’

³¹Ka Abrani arhispti: ‘Engaksï Moisesini ka Diósïri uandarichani no kurhajchajka, nóksï kurhanguati náuejki nema tsíntani.’ ”