Read Western Highland Purepecha San Lucas 18 Bible Online

San Lucas 18 - Western Highland Purepecha bible

San Lucas 18

¹Kájtu Jesusi uandantskua terukutarantskua ma aianguaspti; jurhendaani uékani eskaksï no kuatantaparini méntku ísï uandamukukorheni.

²Ka arhiaspti: “Iretarhu ma, kuájpiri ma irekaspti enga Diósïni no chérhempka ka enga nójtu janhanharhpempka.

³Imani iretarhujtu uarhiti tsîndi ma irekaxapti enga arhirperata ma kámani jápka, ka niraspti kuájpiri arhini eska jarhuatapiringa imani jinguni engaksï arhirperani jápka.

⁴Kuájpiri ióni ísku kurhajchasptia, kóru tátsekua ísï eratsespti: ‘Na uéjkini Diósïni no chérhejka ka nójtuni kaxumbitini,

⁵ka jimbokarini inde uarhiti tsîndi méntku ájchakuxaka, kuájpeaka, eska nóteru méntku junguani jauaka ka tekantskuarini k'amajkutacheni.’ ”

⁶Ka Acha ísï uandasptiteru: “Kuájpiri nómbemaru arisïsï arhini jápti.

⁷¿Ka andi jíani Diósï imeri erakukatechantu no kuajpeaua, imechani engaksï chúrekua ka jurhiakua uekujka? ¿Andi erokataraua?

⁸Jíksïni arhisïnga eska no erokatarauaka, eska kuájpeauaka. Ka k'óru enga jamberi acheti Uájpa parhakpeni junguaaka ¿Arhijkijtsï eska jakajkunhani janhaakateru?”

⁹Jesusi máteru uandantskua aianguaspti imechani engaksï sési ambe úni uandakorhejka ka jiniksï máteruechani no xénhchaani:

¹⁰“Tsimanksï niraspti tiósïo uandamukukorheni, ma fariseo, ka máteru tumina Roma axakua tánati.

¹¹Fariseo, anhandetini, ísï uandamukukorhexapti: ‘Diósï, diósmaiamukuakini arhixaka engani ji no indeni jáxeka, engaksï sïpajkurheka, ka nósesi kámpitini, ka ísku jándini, ka nójtuni inde tumina tánatini jásïska.

¹²Ji tsimani jurhia k'arhinda jarhasïnga iúmu tsimani jurhia jimbo ka témbeni jima iámueri íntspentasïnga engani xáni andajka.’

¹³Ka tumina tánati iauani tátsepani uératini no jamberi tekaasïrempti erancheni, sánderu uánhesïrempti, ka uandasïrempti: ‘¡Tata Diósï, p'amojkurini jíndeni engani k'amanharhintstika!’

¹⁴Arhixakaksïni eska inde tumina tánati kaxumbentatini niántaskia, ka fariseo májkueni pakarasti. Jimboka ne enga k'éramakorheaka, ísku ambeni exenhaaka; ka ima enga kétsekua uérajka, ima k'éri amberanhaati.”

¹⁵Ístuksï Jesusini tataka ka nanaka sapirhatichani pákuasïrempti, eska ima p'ájtsïkuapiringa; ka engaksï jurhengorhericha exepka, xukaasptiksï imechani engaksï sapichani páani jápka.

¹⁶Jimajkani Jesusi arhiaspti: “Jurajkujtsïni sapirhaticha andarherani, ásï p'íngua je, jimboka Diósïri irechekua imecheriska ne engaksï indeni járhaka.

¹⁷Sési jimboksïni arhixaka eska ne enga Diósïri irechekuani no ísï jiókorhejka eska sapi ma na jiókorhejka ima Diósïri irechekuarhu no jatanheati.”

¹⁸Ka tátsekua ireteri urhejtsïkuri ma Jesusini kurhamarhespti arhiparini: “Ambakiti jurhentpiri ¿Néna uétarhesïnki eskani jámaaka, eskani ísï jámani jíjtuni méntkisï anapu irekua intsïnhaaka?”

¹⁹Jesusi arhispti: “¿Andirinisï arhijki eskani ambakitiska? Diósïjkusï ambakititi.

²⁰Míteaskaria juramukuechani: ‘Ásï ísku jándi úkorhe, ásï uándikpe, ásï sïpa, ásï nemani chkuándirakua jimbo nósesi úku, ka chéti táteni ka chéti nándeni janhanharhi.’ ”[50]

²¹Ka ima urhejtsïkuri arhispti: “Tumbirinitkini iámu indeni ambe ísï úxaka.”

²²Enga Jesusi ísï kurhajchapka, arhispti: “Ma ambeterkuri no úxaka: Atarantsï iámu ambe engari xáni jatsikorheka ka no jatsikorherichani íntsaa. Ísïri jámani auandarhu jatsikorhekua p'iuaka. Ka jimajkani k'órurini ju chúxapunia.”

²³K'óru enga ísï kurhajchapka, kánekua mískorhespti, jimboka kánekua jatsikorherispka.

²⁴Enga Jesusi ísï exepka, uandaspti: “¡Kánekua ts'unhapesti eskaksï jatsikorhericha Diósïri irechekuarhu inchaaka!

²⁵Kameiu ma, p'ikukueri p'orhojchakuarhu sánderu no ts'unhapekua jimbo parhijchakuaati, eska jatsikorheri ma Diósïri irechekuarhu inchani.”

²⁶Ima engaksï kurhajchani jápka, kurhangorhesptiksï: “¿Ka jimajkani néchkasï p'ímutakorhentaia?”

²⁷Jesusi arhiaspti: “Ima ambe engaksï parhakpeni anapuecha no újka úni, Diósï k'óru úsïndi.”

²⁸Pédru arhispti: “Acha, jucha iámendu ambe jurajkuska, ka chúxapuskaksïni.”

²⁹Ima arhiaspti: “Sési jimboksïni arhixaka eska ne enga Diósïri irechekua jimbo k'umanchekua jurajkuka o témbani o erachi jémbechani o tátjembani ka amambani, o uájpechani jurajkuaka,

³⁰íni jurhiatekuechani sánderu uánekua ambe p'iuati, ka imani jurhiatekuechani jimbo engaksï jurhani jaka méntku ísï anapu tsípekua p'iuati.”

³¹Tátsekua Jesusi témbeni tsimani jurhengorherichani támu páaspti, ka arhiaspti: “Jerusalenichi niraxaka, jima enga iámu ambe úkorheaka eskaksï Diósïri uandaricha acheti Uájperi ambe na karaka.

³²Jimbokaksï uérakua iretichani intsïnharhitantaaka, ka teresmarhuatiksï, útakuatiksï ka t'uánharhikuatiksï.

³³K'uikirheatiksï ka uándikuatiksï; k'óru tanimu jurhia jimbo tsíntaati.”

³⁴Imaksï nómbema kurhanguspti, ka nójtuksï mítespti ambesï arhiani jápi, jimbokaksï imani ambe no kurhangusïrempka.

³⁵Enga Jesusi Jeriko niárani jápkia, pátenharhi ma xanhari jimbo uaxakatini tumina kurhajkorhexapti,

³⁶ka enga kurhapka eska uánekua nitamanhaxapka, kurhangorhespti ambesï úkorheni jápi,

³⁷ka aiangunhaspti eska Jesusi Nasareti anapusï jimesï nitamani jápka,

³⁸Ka ima uinhachaparini uandaspti: — ¡Jesusi, Dabidi Uájpa, p'amojkurini!

³⁹Ima engaksï urhepani jápka xukasïremptiksï eska ísku japiringa, ka ima sánderu uinhachasïrempti: — ¡Dabidi Uájpa, p'amojkurini!

⁴⁰Jesusi p'íngukorhespti ka arhiaspti eskaksï andarheterapiringa. Enga na andarherani jápka kurhamarhespti:

⁴¹— ¿Amberi uéksïnki? Ka pátenharhi arhispti: — Acha, éskantani uéksïnga.

⁴²Jesusi arhispti: — ¡Éskantsïchkia! Chéti jakajkukua jimbori ambakeranhantaskia.

⁴³Pátenharhi éskantapaspti, ka Diósïni k'éri ambe arhiparini chúxapaspti. Ka iámendu engaksï xáni exepka, imajtuksï uénaspti Diósïni k'éri ambe arhini.