Read Western Highland Purepecha San Lucas 19 Bible Online

San Lucas 19 - Western Highland Purepecha bible

San Lucas 19

¹Jesusi Jeriko niáraspti ka iretarhu inchaakuspti.

²Jima irekaspti acheti jatsikorheri ma enga Sakeo arhinhempka, ima tumina tánaticheri urhejtsïkurispti.

³Ka uéksïrempti Jesusini míteni, ka no úsïrempti andarherani jimboka uánekua jánhasïrempka ka Sakeo no iójtarhaspti

⁴Jimbosï uiriapti urhepani, ka p'ukutapurhu ma karharaspti Jesusini exekuekani, enga jimesï nitamapiringa.

⁵Enga Jesusi nitamani jápkia, erarhutaspti ka arhini: — Sakeo, sóntku kétsentsï, jimbokani iásï chéni jájkorheaka.

⁶Sakeo sóntku kétsentaspti ka Jesusini tsípekua jinguni chénjembo paspti.

⁷Ísïksï exerini, iámenduecha uénaspti Jesusini arhinhchani, uandaparini eska Jesusi k'amanharhintatio ma niraspka jájkorheni.

⁸Sakeo jauaraspti ka Achani arhispti: — Acha exe, no jatsikorherichani íntsauaka jima terujkani eskani xáni ambe jatsikorheka; ka ekani nemani méni isï euakorheka, jima t'ámu xanhari k'uanhaskukuntaaka.

⁹Jesusi uandaspti: — Íni k'umanchekuarhu p'ímutantskua iásï janosti, jimboka i achetijtu Abraniri sïrukueska.

¹⁰Jimboka acheti Uájpa imanisï juka jirinhantani ka p'ímutantani enga tsînchetini jápka.

¹¹Kurhanhaxapti ambe enga Jesusi uandani jápka, ka uandantskua terukutarantskua ma aianguaspti, jimbokaksï niáraxapkia Jerusaleni ka ima engaksï kurhani jápka eratsepaxaptiksï eska Diósïri irechekua xarharapiringia.

¹²Arhiaspti: “Jarhaspti acheti ma enga irechecheri sïrukuepka, enga iauani nípka máteru k'éri iretarhu irechekua p'irani, ka eska irecha úkata k'uanhatsentapiringa.

¹³Uérani jámani, témbeni imeri ánchekorherichani uandajpaaspti, mándani arhispti uánhachani tumina íntsaani ka arhiani: ‘Kánera je íni tuminani engani jamberi junguaska’

¹⁴Enga úpka, imeri iretarhu anapuechaksï no xénhchasïrempti, ka chúngutaramasptiksï axaani máru eskaksï uandapiringa: ‘Nóchi uéksïnga eskajtsïni inde juramucheaka.’”

¹⁵“Ka náuejki ísï, ima irecha únhaspti, ka imeri iretarhu k'uanhatsentaspti. Enga na niántapka, ánchekorherichani uandajpatarkorheaspti, imechani enga tumina íntsaapka, mítekuekani tuminaksï náxannhachani andaraspi.

¹⁶Ma uénaspti niárani ka uandani: ‘Tata, chéti tumina témbeni xanhari jukari andasti.’

¹⁷Irecha arhispti: ‘Kánekua sési, ambakiti ánchekorheriskari; ka jimbokari sapichu ambe no sïpaska, juramutikini úxaka témbeni iretecharhu.’

¹⁸Máteru janospti ka uandani: ‘Tata, chéti tumina iúmu xanhari sánderu andasti.’

¹⁹Imantu arhispti: ‘T'úri iúmu iretecheri juramutiuaka.’”

²⁰“Ka máteru junguaspti uandaparini: ‘Tata, indeia chéti tumina. Sési jatsiakutini patsaska;

²¹chérheskakini, jimbokari uinhamarhetspesïnga, ka jukari jamberiri euajpentasïga, ka jimari p'ikuntasïnga engari no t'u ánchekorhejka.’

²²Jimajkani irecha arhispti: ‘Ánchekorheri nómbemaru, chéti uandakuechani jimbojkukini útacheaka. Engari mítepka eskani uinhamarhetspesïnga, ka eskani jukari euajpentasïnga ka eskani jima p'ikuntasïnga engani no ánchekorhejka,

²³¿Andirisï no jima patsapi tuminani enga andani japiringa, ka andakua jingunirini íntskuntani engani janonguapiringa?’

²⁴Ka arhiaspti imechani engaksï jima jápka: ‘Euantsï je tumina ka imani íntsku je enga témbeni xanhari sánderu andaka.’

²⁵Imaksï arhispti: ‘Tata, ¡Inde témbeni tumina kámaxatia!’

²⁶Irecha arhiaspti: ‘Arhixakachkaksïni, eska ima enga jatsika, sánderu intsïnhaaka; ka ima enga no jatsika, imani jamberi euanhantaati enga sánisï jatsika.

²⁷Ka imechani engajtsïni ikiachejka, engajtsïni no jiókorhempka eskani imecheri irechepiringa, axu júaa je ka uándikuani je.’ ”

²⁸Ísï uandarini, xanhari jatantaspti Jerusaleni nirani.

²⁹Enga Betfage ka Betania niárani jápkia, juátarhu ísï enga Olibu arhinhajka, tsimani jurhengorherichani axaaspti,

³⁰arhiaparini: — Ni je imani ireta sapichurhu enga ixu jurhimbitku jaka, niáratinku, jima jauati ch'anchaki ma jótakata, enga nótki nema jatani jaka, kuerata je ka jua je.

³¹Ka ekaksïni nema kurhamarheska ¿Andijtsïsï kueratani jaki? Arhi je eska Acha úrakuekaxaka.

³²Jurhengorherichaksï niraspti ka iámu ambe ísï jarhaspti eska Jesusi na arhiapka

³³Engaksï ch'anchakini kueratani jápka, kurhamarheasptiksï ima engaksï ch'anchakini kángorhempka: — ¿Andijtsïsï kueratani jaki?

³⁴Imaksï uandaspti: — Jimboka Acha úrakuekaxaka.

³⁵Ka pákusptiksï, ka imecheri chereparhakuechanksï tatsuparhakutini Jesusini jatsiraspti.

³⁶Eska na Jesusi xanharapempka, ísïksï imecheri xukuparhakua xanhari jimbo tatsuntskakupasïrempti.

³⁷Ka enga na úndapka Olibu juátani sáni kétsentani, iámendu imeri chúngumatichaksï uénaspti jiuakorheni xáni tsípeni ka Diósïnksï k'éri ambe arhini iámendu milagruechani exearini.

³⁸Ka uandasïremptiksï: — ¡Újchakurakate irecha enga Achani jimbo jurhani jaka! ¡Sési jarhasti iámendu ambe auandarhu ka auandarhu k'éri arhinhasïndi!

³⁹Jimajkanksï máru fariseouecha engaksï jima jápka arhisptiksï: — Jurhentpiri, xukaa chéti chúngumatichani.

⁴⁰Enga úpka Jesusi arhiaspti: — Arhixakaksïni, engaksï i pínasku jauaka tsakapuechaksï uinhachaati.

⁴¹Enga Jerusaleni niárani jápka, ka k'éri iretani exeni, Jesusi iretani uekuspti

⁴²uandaparini: “¡Ekari iásï íni jurhiatekua t'újtu sési jakuani kurhangupiringa! Enga úka imaniri iásï no sésekua intsïnhaska kurhanguni.

⁴³Jimbokaksïni nósesi járhati jurhiatekuecha janocheaka, engaksïni chéti ikiatspiricha ópandaaka, ka uirhipkurhaatiksïni ka iápuru ísïksïni k'uaniraati,

⁴⁴ka xerentskantaatiksïni. Iámendu jimini anapuechanksïni uándikucheati, ka nóksï ma tsakapu tsïntsikata jurajkuati, jimbokari no kurhanguska imani jurhiatekuani engari juka p'urhembenhani.”

⁴⁵Ka jimajku Jesusi k'éri tiósïo inchaspti, ka petantaani uénaspti imechani engaksï ambe atarantani jápka,

⁴⁶ka arhiaspti: — “Karakatarhu arhisïndi: ‘Jucheti k'umanchekua uandamukukorhetarakueuati’, ka chájtsï sïpajkurhecheri jirikorhekua úntaska.”

⁴⁷Jesusi k'éri tiósïo mándani pauani jurhentpesïrempti, ka tátecheri urhejtsïkuricha ka juramukua jurhentpiricha ka ireteri achechajtuksï jirinhakuntaxapti nénaksï uándikuni.

⁴⁸Ka nóksï ambe ma xékuntasïrempti jimboka iámendu jinguntku janhaspka kurhanhani enga ima uandempka.