Read Western Highland Purepecha San Lucas 20 Bible Online

San Lucas 20 - Western Highland Purepecha bible

San Lucas 20

¹Ma xanhari, enga jamberi Jesusi k'éri tiósïo jurhentpeni jápka ka ambakiti aiangperakua aiangpentani jarhani; tátecheri urhejtsïkuricha ka juramukua jurhentpiricha ka achamasïchaksï niáraspti,

²ka arhisptiksï: — ¿Náki juramukua jimbori indeni ambe úsïni? ¿Indeni juramukuakini ne íntskuski?

³Jesusi arhiaspti: — Jíjtuksïni kurhamarheaka ma ambe, arhijtsïni je:

⁴Enga Juánu itsï atajtsïkpempka ¿Auandarhu anapu ambespki, o parhakpeni anapu ambespki?

⁵Ka imaksï uénaspti arhijperani: “Engachi arhiska eska auandarhu anapueska, arhiatijtsïni: ‘¿Ka andisïjtsïsï no jakajkukupkia?’

⁶Ka nóchi úaka arhini eska parhakpeni anapu ambeska, jimbokajtsïni k'uiripu tsakapkueraaka uándikuni, jimboka iámendu inchajtsïnhatixaka eska Juánu Diósïri uandarispka.”

⁷Ka ísï jimboksï no míteni uandaspti.

⁸Jimajkani Jesusi arhiaspti: — Jíjtuchkaksïni no aianguakia náki juramukua jimbo íni ambe úsïnki.

⁹Tátsekua Jesusi uénaspti aiangpeni ka terukutarantskua ma uandantaspti: — “Acheti ma uba jatsiatakorhespti, ka tarherichani máru kuanetaaspti ka iauani isï niraspti.

¹⁰Enga na jurhiata niárapka, jántspirini ma axaspti tarherichani p'ikuntskata kurhakuantani; ka imaksï ataspti ka nómbemaksï íntskuspti ka ískuksï axantaspti.

¹¹Ka echeri kándi máteru jántspirini axaspti, ka indentuksï nósesi arhispti, atasptiksï ka ískuksï axantaspti.

¹²Ménderu máteruni axaspti, ka imantuksï ataspti ka petaatantaanksï.”

¹³“Tátsekua ima enga echeri kángorhempka eratsentaspti uandaparini: ‘¿Néna jámaa? Jucheti uátsïni axaaka imani engani ji xáni xénhchajka; nándikaksï indeni kurhandirakuaka.’

¹⁴K'óru engaksï tarhericha exepka, arhijperasptiksï: ‘I pakatamenhaati echerini; ju je atani uándikuni, ísï jámanchi echeri jucha jurajkumenhaaka’

¹⁵Ka petaatantasptiksï jima enga uba jukapka ka atasptiksï uándikuni.” “¿Ambejtsï eranhaskasïnki eska echeri kángorheri úkuauaka?

¹⁶Niántaati ka tarherichani uándikuauati, ka echerini enga uba jukajka máteruechani íntsauati.” Ísï kurhanhatini uandanhaspti: — ¡Nómeni ísïuati!

¹⁷Ka Jesusi erateaspti ka uandani: — Ka jimajkani ¿Ambe arhikuekasïnki? Enga karakata arhijka: Tsakapu engaksï k'umanchekua úricha no jaiapanhentaka iásï kasïpenharhikurhaxatiia.

¹⁸Ne uéjki, enga imani tsakapurhu andajtsïkueraska, kachundurhikorheati; ka néni enga ima tsakapu jatajchakuska, putsïndurhiati.

¹⁹Tátecheri urhejtsïkuricha ka juramukua jurhentpirichaksï uékaspti jimajku jupirkorheni, jimbokaksï jánhaskaspka eska imani uandantskuani jimbo imechanisï arhiani jápka, ka nóksï úspti, jimbokaksï chérhpespka.

²⁰Ka máruksï axaaspti eskaksï sïpatapiringa, engaksï kaxumbiti eratakorheparini úpiringa Jesusini uandarani ambe ma enga marhuakuapiringa Jesusini jupirkorhetarani ka Roma anapu juramutini íntsïnharhitani.

²¹Imaksï axakatecha kurhamarhespti: — Jurhentpiri, míteskachi eska sésimendu jarhaska iámendu ambe engari jurhentpejka, ka eskari iámenduechani xénhchaasïnga ka sési jimbori Diósïri xanharini jurhentpesïnga.

²²Arhijtsïni, ¿Sésiski engani jucha Roma anapu irechani tumina íntskujka?

²³Jesusi p'ikuarhenheparini eskaksï nósesi jimbosï kurhamarheni jápka, arhiaspti:

²⁴— Taiakata májtsïni exera. ¿Néski i enga ixu jukanharhika ka néri ambe karanharhiski? Ka arhisptiksï: — Irecheristi.

²⁵Jesusi arhiaspti: — Irechani íntskuntsï je, ambe enga irecherika; ka Diósïni íntsku je, ambe enga Diósïrika.

²⁶Ka ambe uéjki arhijpeni, nóksï xékuntaspti ambe arhiparhatapirini jupirkorheni, ísï jimbo ísku pakareratinksï enga ima isï arhiapka, pínamasptiksï.

²⁷Tátsekuaksï saduseouecha máru niraspti Jesusini uandaxekuni. Saduseouechaksï no jakajkusïndi eskaksï uarhiricha tsíntasïnga; jimboksïsï arini uandakua pérakupti,

²⁸uandasptiksï: — Jurhentpiri, Moisesijtsïni karakata jurajkuchesti enga arhijka: Eka nema uarhiaka ka témba nóma uájpa jinguni pakarani, eska imeri erachi ima jinguni tembuchantaaka, ka eska sïrukua jurajkukuaka.

²⁹Ménichkaksï iúmu tsimani erachicha jarhaspti, ka ima enga urhetipka, tembuchaspti, ka no ma sapini kámatini uarhispti.

³⁰Ka enga imani chúxapempka imajtu tembuntaspti ka imajtu uarhini,

³¹ka tanindarhujtu isï, uarhitini tembuntaspti ka májkuenksï jámasti máteruechajtu, ka iúmu tsimanksï uarhisti nóma sapini kámatini.

³²Tátsekua uarhitijtu uarhispti.

³³Ka ia, enga tsínhantaaka ¿Ima uarhiti néri témbentaa, jimboka iúmu tsimarhenicheri témbespka?

³⁴Jesusi arhiaspti: — Íni irekuarhu, nanakecha ka tatakecha tembuchanhasïndi;

³⁵k'óru imechani enga Diósï erakuauaka eskaksï nitatarheska máteru tsípekuarhu tsíntani, tatakeni o nanakeni nóteru tembuchanhasïndia,

³⁶jimbokaksï nóteru uarhiakia, ka jimboka ánjelini járhanhantaakia, ka Diósï uájpenhaati ísï tsínhantatini.

³⁷Moisesi jamberijtsïni tsïtuniri uandantskua jimbo tsíntskueri ambe aiangusti. Enga Acha arhipka eska Abraniri ka Isaakiri ka Jakobueri Diósïska.

³⁸¡Ima tsípiticheri Diósïsti, no uarhiricheri, jimboka Diósïni jimbo iámenduecha tsípiti janhaska!

³⁹Jimajkanksï máru juramukua jurhentpiricha arhispti: — Acha, sésiri arhiska.

⁴⁰Ka nóteruksï tekaaspti sánderu ambe kurhamarheni.

⁴¹Ka Jesusi kurhamarheaspti: — ¿Andijtsïsï uandajki eska Diósïri újchakurakata Dabiri sïrukueska?

⁴²Nájkichka Dabijtu pirekua karakatecharhu uandajki andi: Acha jucheti Achani arhisti: T'irerkandanirini uaxata,

⁴³engakini jamberi chéti ikiatspirichani jatandukueni péracheaska.[51]

⁴⁴¿Nénajtu Diósïri újchakurakata Dabiri sïrukueua, ka Dabijtu Acha arhini?

⁴⁵Iámendu kurhanhaxapti ka Jesusi jurhengorheri jémbechani arhiaspti:

⁴⁶“Xéparini jáma je juramukua jurhentpirichani jinguni, jimbokaksï sési jásï ambe jukarini jánhchasïnga, ka uéksïndiksï eskaksï terupekuecharhu k'éri ambeni uandajpanhaaka, jángorhesïndiksï tángorhentskuecharhu k'érikuarhu uaxakani ka t'ireni jámanksï uéksïndi sési uaxakakorheni;

⁴⁷ka uarhiti tsîndichanksï nómbe akua pakatakuasïndi, ka nónentanksï uékantku iórhati uandatsekorhesïndi. Imaksï sánderu kánekua k'amaharhiranhantaati.”