Read Western Highland Purepecha San Lucas 21 Bible Online

San Lucas 21 - Western Highland Purepecha bible

San Lucas 21

¹Jesusi exeaxapti jatsikorherichani engaksï tumina jatakuarhu tumina jatsirani jápka,

²kájtu exespti uarhiti tsïndini ma enga tsimani taiakata sapirhati jatsirapka.

³Jimajkani uandaspti: — Sési jimboksïni arhixaka eska iámenduecha jinguni inde uarhiti tsîndi sánderu jatsiraska;

⁴jimboka iámenduecha imani íntspenhasïnga enga pakajkunhajka, ka inde, nájkiruka no jatsikorheka, iámu jatsirasti enga nitamakorherapiringa.

⁵Máruksï k'éri tiósteri ambe uandaxexapti, enga xáni sési járhati tsakapu jimbo tsïntsïnhapka, ka máruksï sési pirirantskata jarhani. Jesusi arhiaspti:

⁶— Janoati jurhiata enga iámendu i ambe engajtsï exeni jaka k'amandeaka. Iámu xerenhantaati.

⁷Jimajkanksï kurhamarhespti: — Jurhentpiri, ¿Na jatini ísï úkorhea? ¿Néna jimbochi jánhaskaa eska i ambe úkorhexamka?

⁸Jesusi uandaspti: “Xéparini jáma je nóksïni tandojchani. Jimbokaksï uánekua juuaka uandakorheparini eskaksï jíiska. Uandaatiksï: ‘Jíiska’ ka ‘Iásïstia.’ K'óru cha ásï chúxapaa je.

⁹Ka ekajtsï kurhauaka uarhiperakua úkorheni jarhani, ásï che je, jimboka inde ambe jatsiska eska urheta úkorheaka, ka náuejki ísï, nótki k'amarhuxamti.”

¹⁰Ka arhiasptiteru: “Iretechaksï kúngorhentaati máteru iretechani jinguni uarhiperani ka ma irechekua máteru irechekua jinguni uarhipeati.

¹¹K'érati jéncheati, ka nósesi jásï p'amenchakua ka k'arhimakua japuati, ka auandarhu nósesi jásï chérhekua ambe xarhancheati.”

¹²“K'óruksïni urheta chánksïni jupikaati ka atanksïni kámaati. K'umanchekua tángorhentskuecharhuksïni páti útacheni, ónhaatiksïni ka juramutichani jingunksïni páati, imani jimbo engajtsïni jíndeni chúxapajka.

¹³Ísï jámantsï úaka uandantani jucheti ambe.

¹⁴Ásï uandanhea je úskuni ambe engajtsï uandakorheaka,

¹⁵jimbokaksïni ji uandakua ka jurhengua íntskuaka enga nóma chári ikiatspiri úaka mókuntani ka nójtuksïni ambe ma úati arhintani.

¹⁶Ka chári táte jamberiksïni p'irhijkamacheati, o chári erachicha, o chári márkuecha o chári p'íchpiricha jamberiksïni p'irhijkamacheati. Ka márujtsï atanhaaka uandikunhani,

¹⁷ka ma parhakpenksïni ikiacheati engajtsïni chúxapaaka;

¹⁸k'órujtsï nóma jauiri tsîtaaka.

¹⁹¡Méntkisï tekaantsï je, ísï jámantsï p'ímutantskorhentaaka!”

²⁰“Na engajtsï jatini p'urhejkutichani exeauaka Jerusaleninksï uirhipandatini jatsini, jánhaska je eska no ióndani k'amajkunhaakia.

²¹Imani jurhia, ne engaksï Judea jámani jauaka, juátecharhuksï niue sïpakorheni; ka ne engaksï Jerusaleni jauaka, uéakueksï, ka engaksï tarhetarhu jámani jauaka, ásïksï k'uanhatsente iretarhu.

²²Jimbokari imani jurhiatechani k'amanharhiranhantaaka eska karakatarhu námendu arhijka.

²³¡Jarhonheni uarhiticha engaksï jíani isï sapi jinguni jámani jauaka o engaksï sapichani etsukua íntsani jauaka! Jimboka parhakpeni kánekua nósesi úkorheaka, ka inde ireta kánekua nósesi jásï maiampetaranhaati.

²⁴Máruksï tiámu jimbo uándikunhaati ka máteruksï iretecharhu pánhaati; ka no jakajkutichaksï Jerusaleni uanarurhaati, jiájkani jamberi enga jurhiatekua míndakata jaka.”

²⁵“Tata jurhiatarhu ka nana kutsirhu ka jóskuecharhu mínda xarharaati; ka k'érati iretecha parhakpenirhu kakonhaskanhaati ka chérakorheatiskï enga k'éri japunda kánekua nósesi kúskaaka.

²⁶Ka mirikurhinhaati xáni chénhani imani eratseparini enga parhakpeni úkorheaka; jimbokaksï auandarhu anapu uinhapekuecha jamberi xamatanhaaka.

²⁷Jiájkani acheti Uájpa janikuarhu ma xarharaati kánekua juramukua ka t'íntskua jinguni jurhani jarhani.

²⁸Enga na uénaakia i ambe úkorheni, jurhimbentsï je ka kánharhikua tarhatani je, jimbokajtsï p'ímutanhantaxamkia.”

²⁹Arini terukutarantskuajtu arhiaspti: “Exeatkiru je ígusïchani o náki uéjki ma p'ukurini.

³⁰Ekajtsï exejka eska xunhuperhukurhantani jarhasïngia, jánhaskasïngajtsï eska janintaxamkia.

³¹Ístu, engajtsï exejka inde ambe úkorheni jarhaniia, jánhaska je eska Diósïri irechekua janoxakaia.”

³²“Sési jimboksïnisï arhijka eska inde ambe úkorheaka, enga iásï anapuecha útasteru nótki uarhinhani janhaaka.

³³Auanda ka parhakpenksï k'amakurhiaati, k'óru jucheti uandakuechaksï nómeni nitamaati.”

³⁴“Xéparini je, ásïksï chári míntsitecha uéne akua ka kauikua ambe ka i parhakpeni anapu ambe kánhchani, eskaksïni no mátirku ima jurhiatekua jupindukpitini jásï ma

³⁵janocheaka, jimboka íni parhakpeni iámendusï janokuauaka.

³⁶Cha jinguntku ja je, méntku isï uandamukukorheparini, eskajtsï úaka sïpakorhekuni enga xáni ambe úkorheaka, ka eskajtsï úaka acheti Uájpani sési xarhakuntani.”

³⁷Jesusi k'éri tiósïo jurhiakua jurhentpesïrempti, ka chúrekuechani olibu juátarhu nirasïrempti.

³⁸Ka iámu ireta, xarhentku ninhasïrempti k'éri tiósïo kurhajchanhani.