Read Western Highland Purepecha San Lucas 24 Bible Online

San Lucas 24 - Western Highland Purepecha bible

San Lucas 24

¹Ka sábaduksï mintsikorhespti eska juramukua na arhijka, ka ménderu domingu jurhiatekuaksï uarhiticha xarhentku niraspti ka p'untsumekuaksï páspti engaksï tánapka.

²Engaksï niárapka, tsakapu t'uíni kénditakata jarhasptia.

³Ka inchasptiksï ka Jesusi t'uíni nóteru jarhania.

⁴Ka ískuksï pakareraspti ísï exerini; ka jimajkuksï xarhakuaspti tsimani acheticha, anhaxurhitinksï jarhani ma akandani, meremerekjasï ambeksï xukuparharini.

⁵Kánekua chéparinksï tinguixurhispti iámu kápatserani; ka imaksï acheticha arhiaspti: — ¿Ima tsípiti jarhasti, andijtsïsï uarhiriricha jinguni jirinhantani jaki?

⁶Nóteru ixu jarhastia, tsíntastia. Míantsï je ambe engaksïni arhika enga útasï Galilea jámani jápka;

⁷arhistiksïni eska acheti Uájpa jatsipiringa k'amanharhintstichani intsïnharhitanhani, eskaksï krúsirhu cháparhatapiringa ka eska tanimu jurhia jimbo tsíntapiringa.

⁸Imaksï jiájkani míantaspti ambe enga Jesusi uandapka,

⁹ka uarhitichaksï uarhiri jatsintskuarhu uératini k'uanhatsentaspti témbeni ma jurhengorherichani ka iámenduechani iámu ambe aianguani.

¹⁰Maria Magdalena ka Juana, ka Maria enga Santiagueri nánde jémbepka ka máteru uarhitichaksï jurhengorherichani aianguaspti.

¹¹Ka jurhengorherichaksï no jakajkukuasïrempti, ka arhiasïremptiksï eskaksï ísku ambemasï uandani jápka.

¹²Pédru k'óru uiriapaspti jima enga jatsinhantapka; ka enga eranhapka, takusïterkusï jima jáptia. Ka níntaspti ísku pakareratini enga ísï úkorhepka.

¹³Ima jurhiatekuajtuksï tsimani jurhengorhericha Emausi iretarhu niraxapti, imani iretarhu enga Jerusalenini témbeni ka ma kilometru jarharetini jaka.

¹⁴Imani ambeksï uandaxepaxapti enga úkorhepka.

¹⁵Engaksï uandaxeni ka uinhamarhetsperapani jápka, Jesusi andarheraaspti ka márkuksï xanharapaxaptia.

¹⁶Ka náuejkiksï exeni jápka ambe ma no jiáretaasïrempti eskaksï mítentapiringa.

¹⁷Ka Jesusi kurhamarheaspti: — ¿Ambejtsï uandaxepaxaki? Ka imaksï kánekua kómu ninharhiparini anhaxurhispti,

¹⁸ka ima ma isï enga Kleofasi arhinhempka kurhakorhespti: — ¿Péka t'újku uérakua ireti no mítetini jaka ambe enga arini jurhiatekuechani Jerusaleni úkorheka?

¹⁹Ka ima kurhamarheaspti: — ¿Andi ambe úkorheski? Ka imaksï arhispti: — Nasareti anapu Jesusiri ambe, ima k'éri ma Diósïri uandarispti ka iretani japarini ka úkua jimbo ka uandakua jimbo Diósïni xarhatasïrempti;

²⁰ka engaksï tátecha ka juchari juramuticha intsïnharhitpeka uandikutarkorheni ka eskaksï krúsirhu cháparhatapiringa.

²¹Jucha mintsikaxapka eska ima Israelichani p'ímutantaapiringa. Enga úka, tanimu jurhiauestia enga ísï ambe úkorheka.

²²Nájkirukajtsïni máru uarhiticha chéraka, jimbokaksï xarhentku niraska jima enga jatsinhantaka,

²³ka ískuksï k'uanhatsentasti jimboka Jesusi nóteru jima jarhaspkia. Ka uandantastiksï eskaksï ánjelicha máru xarhakuaska ka eskaksïnha arhiaska eska Jesusi tsípiti jámaxaka.

²⁴Máruksï juchari pámbetpiricha nirasti jima enga jatsinhantapka ka ísïnha jarhasti eskaksï uarhiticha na uandantaka, ka Jesusinksïnha nóteru xéntasptia.

²⁵Jimajkani Jesusi arhiaspti: — ¡Na engajtsï xáni no kurhangujka ka na engajtsï xáni ióndajka jakajkuni imani ambe engaksï xáni Diósïri uandaricha uandaka!

²⁶¿Andi no jatsipirini Újchakurakata íni ambe urheta úkorhenchani, enga nótki k'érikuarhu pénhantani japiringa?

²⁷Tátsekua úndaspti jánhastaani iámendu ambe enga imeri ambe karakata arhijka, enga Moisesiri karakatarhu uénanitki arhijka ka chúnguramani iámendu karakatecharhu ka enga Diósïri uandaricheri jamberi arhijka.

²⁸Engaksï na niárapka imani iretarhu engaksï eraapani jápka, Jesusi ísï niraspti énajki urhetatakorhepirini.

²⁹Ka imaksï uinhapetarhu p'ínguspti arhiparinksï: — Ixujku pakara jimboka xatiniskia, chúrexatiia. Ka Jesusi imechani jinguni pakaraspti.

³⁰Engaksï na t'ireni jámempkia kurhinda p'íkuspti ka újchakuraspti, arhukuspti ka íntsaani.

³¹Jimaksï jánhaskantaspti ka mítentani eska Jesusipka; kóru ima jimajku nónespti.

³²Ka imaksï arhijperasïrempti: — Jimbochisï mintsitarhu tixanheni jápka engajtsïni uandaxechepunguani jápka, ka jimbojtsïnisï karakata jánhastapunguani jápti ¡Ano!

³³K'uanhajpatsesptiksï Jerusaleni, ka témbeni ma jurhengorherichani ka imecheri pámbetpirichanksï tángorhentatixapti,

³⁴imechanksï arhiaspti: — Sési jimbo Acha tsíntastia, ka Simonini xarhakusti.

³⁵Jimajkanksï ima tsimarheni aianguaspti eskaksï ima na jámapka, ka néna engaksï mítentapka Jesusini enga kurhinda íntsani jápka.

³⁶Útasïksï inderi ambe uandaxexapti, enga Jesusi terujkani niárakuaaka ka arisï arhiaparini uandajpaani: — Sési jakuaksïni janochesti.

³⁷Imaksï kánekua chérakorhespti, uandaparini eskaksï ánimanisï ma exeni jápka.

³⁸Enga úpka Jesusi arhiaspti: — ¿Andijtsïsï chérakorhetini jaki? ¿Andijtsïsï tsimanitsimanheajki?

³⁹Jíska, erajkujtsïni ka erandukujtsïni, p'árhejtsïni ka exejtsïni: Ánima ma k'uiripeta ka únichani no jukaasïndi, eskajtsïni cha jíndeni na xéni jaka.

⁴⁰Enga ísï arhiapka, ima jájki ka jantsiri exeraaspti.

⁴¹Ka engaksï ima útasï no úempka jakajkuni, xáni tsípeni ka xáni nónanimaru p'ikuarheratini, Jesusi kurhamarheaspti: — ¿T'irekuajtsï no sáni jatsiski?

⁴²Kurucha pámakataksï sáni íntskuspti,

⁴³ka ima euaaspti ka arhani ka imaksï eramukuspti.

⁴⁴Tátsekua Jesusi arhiaspti: — Imani ambesïni úkorhenchaka engaksïni aiangupkia engani útasï chánksïni jinguni jámani jápka: Eska iámu ambe jatsipiringa úkorheni eska jima Moisesiri juramukuarhu ka Diósïri uandaricheri karakatecharhu ka pirekuecharhu jucheti ambe na karakata jaka.

⁴⁵Karakatechani jimajkani kurhangutaraaspti

⁴⁶ka arhiaspti: — Karakata jarhasti eska Krístu uarhipiringa, ka eska tanimu jurhia jimbo tsíntapiringa,

⁴⁷ka eska iámendu iretecharhu imeri jakanguarhikua jimbo aiangperanhapiringa eska Diósïni andarheranhantaaka, ka eska k'amanharhintskuechani púakuantauaka. Jerusaleni uénani,

⁴⁸chájtsï íni ambesï uandantaaka.

⁴⁹Ka jíksïni axacheaka imani enga jucheti Táte aiatspeka. K'óru cha ixu Jerusaleni iretarhu pakara je, jiájkani jamberi engajtsï auandarhu anapu uinhapekua intsïnhaaka.

⁵⁰Tátsekua Jesusi jurhengorherichani iretarhu petaataaspti, Betania jamberi páaspti ka jájki tarhatatini újchakuraaspti.

⁵¹Ka enga na újchakuraani jápka jarhareantaaspti ka auandarhu pánhantaspti.

⁵²Engaksï ima na k'éri ambe arhipka, Jerusaleniksï kánekua tsípeparini k'uanhatsentaspti.

⁵³Ka méntkuksï tiósïo jarhasptia, Diósïni k'éri ambe arhini.