Read Western Highland Purepecha San Lucas 7 Bible Online

San Lucas 7 - Western Highland Purepecha bible

San Lucas 7

¹Enga na Jesusi k'amarapkia uandaxetspeni, Kafarnaumi niraspti.

²P'urhejkuticheri urhejtsïkuri ma jima irekaxapti enga jántspirini ma kámempka enga kánekua xénhchempka, uinhamu p'amenchataxapti ka uarhixaptia.

³Ka enga mítepka eska Jesusi jimesï jámaxapka, judiouecheri achamasïchani máru axaaspti eskaksï kómarhipiringa eska nipiringa jántspiri jémbani ambakerantani.

⁴Imaksï Jesusini andarheraspti ka kánekuaksï kómarhispti, arhiparini: — Sési jarhasti eskari indeni p'urhejkuticheri urhejtsïkurini jarhuataaka,

⁵jimboka inde juchari iretani xénhchasïnga ka jimbokajtsïni juchari k'umanchekua tángorhentskuani úcheska.

⁶Jesusi imecha jinguni niraxapti, ka enga na k'umanchekuarhu niárani jápkia, p'urhejkuticheri urhejtsïkuri imeri mítekatechani máru axaaspti, eskaksï Jesusini arhipiringa: “Acha, ásï ójkutakorhe, jimbokani ji no nitatarheska eskari t'u jucheni inchaaka;

⁷ísï jimbokinisï no jamberi tekaaka nitsïkorheni jirinhantani. T'u engari uandaska, jucheti jántspiri ambakentaati.

⁸Jimbokajtsïni jíndentu jucheti k'ératicha juramuchesïnga, ka májkueni jíjtuni káasïnga p'urhejkutichani engani ji juramukuajka, Ekani imani ma ísïni, ni jini arhijka, ima nirasïndi; ka ekani arhiaka máteruni eska juuaka, ima jurhasïndi; ka ekani jucheti jántspirini ambe ma úrajka, ima úsïndi.”

⁹Jesusi ísku pakareraspti ísï kurharini, ka imechani erauaparini engaksï chúxapani jápka, ísï uandaspti: — Sési jimbo iápuru Israeli nónemani míteska enga xáni jakajkujka eska i acheti na jakakujka.

¹⁰Engaksï ánchperata úricha niántapka, jántspiri t'uíni ambakentasptia.

¹¹[34] Tátsekua enga na i ambe úkorhepkia, Jesusi iretarhu ma niraspti enga Naini arhinhajka. Jurhengorheri jémbecha jinguni niraxapti ka uánekuateru ninhaxapti.

¹²Enga na iretarhu andamukuerani jápka, erangpespti eska uarhiri ma pánhantaxapka jatsinhantani, ka uarhiriri amamba imantku sapini kámasïrempti ka tsîndispti. Uánekua iretarhu anapuechaksï pámbetapaxapti.

¹³Enga Jesusi exepka, imani uarhitini p'amojkuspti ka arhispti: — Ásï uera.

¹⁴No ióndaspti uarhirini andarherani ka uarhiriri jatantskuani p'árheni, ka ima engaksï pántani jápka p'íngukukorhesptiksï. Jesusi uarhirini arhispti: — Tumbi, t'úngenisï arhijka: ¡Jauara!

¹⁵Ka uarhiri uaxakantaspti ka uénani uandaxentani, ka Jesusi amambani íntskuntaspti.

¹⁶Ísï exerini, iámendu chérakorhenhaspti ka uénanksï Diósïni k'éri ambe arhini uandaparini: — K'éri Diósïri uandari ma juchantsïni jinguni jámaxati. Ka uandasïremptijtuksï: — Diósï imeri iretani jurhasti jarhuani.

¹⁷Ka imani ambe enga Jesusi úpka iápuru Judea ka iápuru jima uanondani isï mítekorhespti.

¹⁸Juánu itsï atajtsïkpiri iámendu indeni ambe mítespti, jimbokaksï jurhengorheri jémbecha aianguspka. Ka Juánu imani tsimani erakuaspti ka uandajpaani

¹⁹ka axaaspti, eskaksï Jesusini kurhamarhepiringa: ¿Imespia sési jimbo enga jupiringa, óksï máteruni erokorhepirinki?

²⁰Juánueri ánchperata úrichaksï andarheraspti Jesusini ka arhinksï: — Juánu itsï atajtsïkpirijtsïni axasti eskaksïni kurhamarheaka t'úeskia enga juuaka, óchi máteruni erokani jauateru.

²¹Jesusi uánekua jimajku ambakerantaaspti ka sési p'ikuastantaani, ka nósesi jásï espirituechani ambe ambakerpentaspti, ka uánekua pátenharhichani eskatarantaaspti.

²²Ka ánchperata úrichani arhiantaaspti: — Ni je ka Juánuni aianguntsï je ambe engajtsï exejka ka kurhani. Aiangu je eskaksï pátenharhicha exesïnga, eskaksï chkéjchuecha xánharasïnga, eskaksï xúta jukaricha ambakentasïnga, eskaksï kándicha kurhasïnga, eskaksï uarhiricha tsíntasïnga ka eskaksï nómbema jatsikorhericha ambakiti aiangperakua aiangunhantaxakaia.

²³¡Ka tsípe ima engarini méntku isï mintsikajka!

²⁴Engaksï Juánueri ánchperata úricha níntapkia, Jesusi uénaspti Juánueri ambe aiangpentani uandaparini: “¿Ambejtsï exeni uéraski jimesï enga nónema irekaka? ¿Sïmba kórheatakatani ma?

²⁵Ka enga no ísïka ¿Jiántsï ambe uéraski exeni? ¿Nemani ambakiti ambe xukuparhatini? Chájtsï míteska eska ne engaksï ambakiti ambe xukuparhajka ka ambakiti ambeksï jatsikorheni, eskaksï ima irechecho jarhaska.

²⁶Jiáni, ¿Ambejtsï uéraski exeni? ¿Diósïri uandarini ma? Jo, ísïstimendu, ka enga Diósïri uandari ma jinguni sánderu k'éri ambeka.

²⁷Juánu imesti enga karakatarhu arhijka: Exe, jucheti uandakua párinkini urhetatachepaxaka, engakini xanharini ambantskachentaaka.

²⁸Aianguxakaksïni eska iámendu parhakpeni anapuechani jinguni, Juánu jinguni nónema sánderu k'ériska; ka ima enga Diósïri irechekuarhu sánderu sapichueka, Juánu jinguni sánderu k'éristi.”

²⁹Iámendu imechani engaksï Juánuni kurhajchaka, imecha jamberi engaksï Romani tumina tánakujka, Juánu itsï atajtsïkuasti, ísï jámanksï ústi jánhaskani eska Diósïri xanhari sési ambeska;

³⁰Enga úka, fariseouecha ka juramukua jurhentpirichaksï no uékasti itsï atajtsïni, ka ísï jámatinksï no jaiapanhentasti imani sési ambe enga Diósï patsakuaatini jápka.

³¹“¿Iásï anapuechani ambe jinguni terukutpea? ¿Ambeni jáxenhaski?

³²Xárhanhasti eska sapicha engaksï kópekuarhu niárajka ch'anani ka uinhachatsperanksï: ‘Kústacheskaksïni ka chájtsï no uarhaska; ka nójtsï ueraska engaksïni kómu járhati pirecheaka’[35]

³³Jimboka Juánu itsï atajtsïkpiri jurhaska enga no arhajka kurhinda ka enga nójtu kauijka, ka chájtsï uandasïnga: ‘Nóambakitini ma kámasïndi.’

³⁴Jimajku acheti Uájpa jurhasti, enga t'irejka ka kauikua itsïmantani, ka chájtsï arhisïnga: ‘Exe je, jukari t'iresïndi ka kauini, ka nósesi úrichani jinguni sési arhijperasïndi engaksï Roma axakua tumina tánajka.’

³⁵Enga úka, Diósïri mímixekua jánguarhu xarhatanhasïndi.”

³⁶Fariseo ma Jesusini t'ireni p'imarhespti, ka Jesusi imeri k'umanchekuarhu niraspti. Uaxandetixapti t'ireni,

³⁷enga imani iretarhu anapu ma uarhiti ísku jándi ma niárapka, ka enga mítepka eska Jesusi niraspka imani fariseouo t'ireni, ambakiti p'untsumekua sési jásï ma tsúntsu mímukukata uiniratini páspti.

³⁸Ueparini, Jesusini andandukueraspti ka uekua jimbo úndaspti kuakandurhatani, tátsekua jauiri jimbo kutsundukuntaspti, ka no jurajkuntaspti putindukuni ka p'untsumekua atandukuni.

³⁹Ima fariseo enga Jesusini p'imarhepka, ísï exeparini eratsespti: “Enga i tata sési jimbo Diósïri uandaripiringa, mítepirindia eska ísku jándi ma uarhitisï p'árheni jaka.”

⁴⁰Jimajkani Jesusi fariseoni arhispti: — Simoni, ma ambe kámaxaka ka arhiakakini. Fariseo arhispti: — Jurhentpiri, arhirini.

⁴¹Jesusi arhispti: — Tsimanksï acheticha kuánetpirini ma kánguxapti. Ima ma ísï, ma irepeta ka iúmu ekuatse (500) tumina kánguxapti, ka máteru tsimani ekuatse ka témbeni kánguxapti; (50)

⁴²ka jimbokaksï no úni jápka íntskuntani, kuánetkorheri kántsperata tsimarheni jurajkukuaspti. Iásïrini arhiia, ¿Néndi arhijki eska sánderu xénhchaaka kuánetpirini?

⁴³Simoni arhispti: — Ji arhijka eska ima acheti enga sánderu kánguni jápka. Ka Jesusi arhispti: — Ísïsti eskari na uandajka.

⁴⁴Ka uarhitini erateparini, Jesusi Simonini arhispti: — Íni uarhitiniri exeskia; ji chéti k'umanchekuarhu janoska, ka nórini sáni íntskuska itsï engani jupandutarapiringa; ka inde uarhitirini inderi uekua jimbo jupandukusti, ka inderi jauiri jimborini kutsundukuntasti,

⁴⁵ka t'úrini janorintku, no putinharhikuska, ka inde uarhitirini no jurajkuntaxati xáni putindukuni.

⁴⁶Nórini sáni atajtsïkuska tamari ambe ka inde uarhiti k'órurini p'untsumekua atandukusti.

⁴⁷Indeni ambe jimbokinisï arhijka eska k'amanharhintskuechani púamenhantaskia, jimbokarini kánekua xénhchaska; ka ne enga sáni ambejku púamenhantajka, sántkurini xénhchasïndi.

⁴⁸Tátsekua uarhitini arhispti: — T'úri k'amanharhintskuechani púamenhantaskia.

⁴⁹Máteruecha engaksï uandajpanhantapka ka engaksï jima jápka kurhamarhperanksï uénaspti: — ¿Néski i, enga k'amanharhintskuechani jamberi púatspeantajka?

⁵⁰Ka Jesusi uarhitini arhisptiteru: — P'ímutanhantaskaria jimbokarini mintsikaska; sési p'ikuarherapantsï.