Read Western Highland Purepecha San Lucas 9 Bible Online

San Lucas 9 - Western Highland Purepecha bible

San Lucas 9

¹Jesusi imeri témbeni tsimani jurhengorherichani tánaaspti, ka uinhapekua ka juramukua íntsaspti, eskaksï iámendu járhati nóambakitichani úpiringa juramukuani, ka eskajtuksï úpiringa p'amenchakuechani ambakerpentani.

²Axaaspti Diósïri irechekuani uandantani ka p'amenchatichani ambakerantaani.

³Arhiaspti: Ásï ambe ma pákorhe je: — Tenhexkorhekua ásï pa je, ka sutupujtu ásï pa je, ka t'irekuajtu ásï pa je, ka tuminajtu ásï pa je, ka mórhekuajtu ásï pa je.

⁴Mápurku pakara je k'umanchekuarhu engajtsï niárka, eskajtsï xáni ióni jima jarhajka.

⁵Ekaksïni ma iretarhu no jiókaska, uéakuntsï je ka t'upuri sési uauanduntsï je, eska ísï jámani marhuakuauaka míani jarhani eskaksï aiangukata jarhaspkia.

⁶Nirasptiksï ka iámendu iretecharhuksï niáraspti, ambakiti aiangperakuani aiangpepani ka ambakerpentapani.

⁷Juramuti Erodesi mítespti ambe enga xáni úkorheni jápka; ka no jánhaskasïrempti andisï ísï úkorheni jápi, jimbokaksï máru uandasïrempka eska Juánu itsï atajtsïkpiri tsíntaspka;

⁸máteruksï uandasïrempti eska Diósïri uandari Eliasïsï xarhantapka; ka máteruksï uandasïrempti, eska ióntki anapu ma Diósïri uandarisï tsíntapka.

⁹Ka Erodesi uandaspti: — Ji juramuspka eskaksï Juánuni kachujchakupiringa. ¿Andi néski ima engajtsïni xáni ambe aianguni jaka? Jimbosï Erodesi jángorhentani jápti Jesusini míteni.

¹⁰[36] Engaksï jurhengorhericha k'uanhatsentapka, Jesusinksï aianguntaspti ambe engaksï úpka. Ima támu páaspti iretarhu ma enga Betsaida arhinhajka.

¹¹K'óru enga mítenhapka, chúxapasptiksï, ka Jesusi sési eroaspti, Diósïri irechekueri ambe uandaxekuaspti ka p'amenchatichani ambakerantaaspti.

¹²Enga xatinini jápkia, Jesusinksï andarheraspti témbeni tsimani jurhengorhericha ka arhisptiksï: — Axajpentsï iretecharhu engaksï ixu no iauani jaka, mintsikorheni ka t'irekua jirinhani, jimboka ixuesï nómbema akua jarhaska.

¹³Jesusi arhiaspti: — Cháchka t'ireraa je. Imaksï arhispti: — Iúmu kurhindajkuchisï kámani jaka ka tsimani kurucha, juchachkani nirania t'irekua p'ikuani.

¹⁴Jimboka iúmu míli (5,000) ísïnhaspka. K'óru Jesusi jurhengorheri jémbechani arhiaspti: — Tsimani ekuatse témbenichani isï uaxastpe je.

¹⁵Imaksï kurhajchaspti ka iámenduechanksï uaxastaaspti.

¹⁶Jimajku Jesusi iúmu kurhindechani ka tsimani kuruchechani p'íkuaspti, ka auandarhu erancheparini újchakuraaspti, arhukuaspti ka jurhengorheri jémbechani íntsaaspti eskaksï etsakupiringa.

¹⁷Sési t'irenhaspti uiniarhanhantani, ka pakarataksï témbeni tsimani tsïkiata tánantaspti.

¹⁸Ma jurhiatekua enga Jesusi uandamukukorheni jápka, enga jurhengorheri jémbecha jinguni jámani jápka, kurhamarheaspti: — ¿Néna uandanhaxaki, eskani ji néska?

¹⁹Imaksï arhispti: — Máruksï uandasïndi eskari Juánu itsï atajtsïkpiriska, ka máruksï uandasïndi eskari ióntki anapu Diósïri uandari méska enga tsíntaka.

²⁰Ka kurhamarheaspti: — ¿Ka cháia, nénajtsï uandasïnki, eskani ji néska? Ka Pédru arhispti: — T'úrisï Diósïri újchakurakateka.

²¹Ka Jesusi uinhamu arhiaspti eskaksï nónemani aiangupiringa.

²²Ka tátsekua Jesusi arhiaspti: — Acheti Uájpa jatsisti kánekua kómu nitamani, ka achamasïcha ka tátecheri urhejtsïkuricha ka juramukua jurhentpirichaksï no xénhchaati. Uándikuatiksï, k'óru tanimu jurhia jimbo tsíntaati.

²³Tátsekua iámenduechani arhiaspti: — Enga nema uéjka jucheti jurhengorherini, ikimchakorhe, mándani pauani krúsini ichandikorhe ka chúxapuerini.

²⁴Jimboka ne enga uékajka tsípekuani patsapatsandakorheni, tsîtakorheati; k'óru ne enga tsípekuani jíndeni jimbo tsîtakorheska, patsakorheati.

²⁵Jimbokachka, ¿Ambe andanhaa iámu i parhakpenini andakorhenhatini enga jandiojku k'amajkukorhenhaaka o tsînchekorhenhani?

²⁶Jimboka ne engarini jíndeni ka jucheti uandakuani k'uratsenharhiska, acheti Uájpajtu k'uratsenharhiati enga imeri t'íntskua jinguni junguaaka ka tátjemberi t'íntskua jinguni ka ánjeli pímbinhaxeticheri t'íntskua jinguni.

²⁷Sési jimboksïnisï arhijka eskaksï máru engajtsï ixu jaka, nótkijtsï uarhini jauaka ka t'uínijtsï exeakia Diósïri irechekuani.

²⁸Iúmu tanimu jurhia ísï tátsekua enga íni ambe uandaxepka, Jesusi, Pédru, Santiagu ka Juánuni jinguni juátarhu máksï karhamaspti uandamukukorheni.

²⁹Ka enga na uandamukukorheni jápka Jesusi ménderueni jánharhintaspti, ka imeri xukuparhakua kánekua urapentaspti ka mereani;

³⁰ka tsimani achetichaksï xarharaspti ima jingunksï uandaxeni jarhani. Moisesispti ka Eliasï,

³¹sésiksï jásï ma t'íntskua uirhipandakorhetixapti ka Jesusiri níntskueri ambeksï uandaxexapti, eska Jerusaleni úkorhepiringa.

³²Náuejkiksï Pédru ka imeri pámpiricha kánekua k'uínchani jápka, ísïksï jarhaspti tsínharhitini, ka exesptiksï Jesusiri t'íntskuani ka tsimani achetichani engaksï ima jinguni jápka.

³³Engaksï ima acheticha na Jesusini jarharentani jápkia, Pédru arhispti: — Jurhentpiri, ¡Sési úska jucha ixu jarhani! Tanimu uapajtsïtakuachi úaka: Ma chéti, máteru Moisesiri ka máteru Eliasïri. K'óru Pédru no mítespti ambesï uandani jápi.

³⁴Enga uandani jápka, janikua ma karhakua niarakuaspti, ka engaksï xúmurhu jápkia chésptiksï.

³⁵Jimajkani xúmurhu uandakua ma kurhakorhespti, enga arhipka: “I jucheti Uátsïtisti, jucheti Erakukata: Kurhajcha je.”

³⁶Enga na pínandepkia, Jesusi jandiojku pakaraspti. Ka imaksï míani pakaraspti indeni ambe ka jiákani ísïksï nónemani aianguspti.

³⁷Pauandekuarhu engaksï na juátarhu kétsentapkia, uánekua ninhaspti Jesusini kúntani.

³⁸Ka acheti ma teruakuni isï uératini uinhachakuarhu arhispti: — Jurhentpiri, jimboatakua sáni, tataka sapichunirini exeche jimbokani íntkusïni kámka;

³⁹nósesi jásï ma jupintasïndi, ka uinhachatarasïndi ka p'íntatarasïndi ka k'uruata uéchatarasïndi. Nósesi kámasïndi ka no uéksïndi jurajkuni.

⁴⁰Kómarhiaskia chéti jurhengorherichani eskaksï imani espirituni petarhetantaaka, ka nóksï ústi.

⁴¹Jesusi arhispti imechani engaksï chúxapani jápka: — ¡Áke cha engajtsï ísï no jakajkujka ka nójtsï ambarhani! ¿Na jatini jamberi chánksïni jinguni jaua ka tekaachentanksïni jarhani? Juácherini axu chéti sapini.

⁴²Enga tataka sapichu andarherani jápka, nóambakiti tataka sapichuni k'uanintskaraspti ka ménderu p'íntatarani; ka Jesusi nósesi jásïni xukaspti, tataka sapichuni ambakerantaspti ka tátjembani íntskuntani.

⁴³Ka iámenduechaksï Diósïri k'érikuani exerini ísku pakaraspti. Enga jamberi ísku pakareranhatini janhapka xénhani ima ambe enga Jesusi úempka, Jesusi jurhengorheri jémbechani arhiaspti:

⁴⁴— Sési kurha je íni ka ásï mirikurhi je: Acheti Uájpa parhakpeni anapuechani intsïnharhitanhaati.

⁴⁵K'óruksï ima no kurhangusïrempti ima ambesï arhiani jápi, jimbokaksï kurhangukua nótki mítamenhasïrempka engaksï jimbo jánhaskatarapiringa; támtuksï chésïrempti arhini Jesusini eska jánhaskataraapiringa.

⁴⁶Jiájkani isïksï jurhengorhericha uénaspti arhijperani ne imecheri sánderu k'éri ambepirini.

⁴⁷Jesusi mítetini ambe eskaksï eratseni jápka, tataka sapichuni ma antsïtaspti, ima jinguni péraspti,

⁴⁸ka arhiaspti: — Ima enga íni tataka sapichuni jucheti jakangurhikua jimbo sési kámka, jíndendini sési jiókaxati, ka ne engarini jíndeni sési erokajka, imantu sési jiókasïndi engarini axaka. Ísï jimbo, ima enga sánderu nómbemeka cha iámenduecheri, imasï sánderu ambeti.

⁴⁹Juánu arhispti: — Jurhentpiri, exeskachi ma enga chéti jakangurhikua jimbo nóambakitichani pétarhpeantaani jápka; nóchi jiaretaska, jimboka no jucha jinguniska.

⁵⁰Jesusi arhispti: — Ásï no jiáreta je, jimboka ne engajtsïni no ójkutajka, imaksï jucha jingunistiksï.

⁵¹Enga na niárani jápkia jurhiata enga Jesusi auandarhu kénchentapiringa, uinhauinhajtsïparini uéraspti Jerusaleni nirani.

⁵²Uandakua párichani urhetatapaaspti, ka imaksï niraspti Samaria isï, ireta sapichurhu ma, Jesusini jájkorhekua jirinhakuni;

⁵³ka Samaria anapuechaksï no jiókaspti, jimbokaksï mítetixapka eska Jerusaleni niraxamempka.

⁵⁴Engaksï jurhengorheri jémbecha Santiagu ka Juánu ísï exepka, arhisptiksï: — Acha, ¿Uéksïndi eskachi juramuaka eska auandarhu uératini chpíri kétseaka, ka eska indechani k'amajkuauaka?

⁵⁵Ka Jesusi p'irhipakorhespti ka xukaani.

⁵⁶Tátsekuaksï máteru ireta jimbo niraspti.

⁵⁷Xanhari jimbo, acheti ma Jesusini arhispti: — Acha, uéksïngakini chúxapani nani uéjkiri nirani.

⁵⁸Jesusi arhispti: — Jiuatsïchaksï irekua jatsikorhesti ka káratichaksï xerekua jatsikorhesti; ka acheti Uájpa no jatsisti nani uirhundeni.

⁵⁹Jesusi máteruni arhispti: — Chúxapurini. Ka ima arhini: — Acha, jurajkuni urheta nirani táteni jatsintani.

⁶⁰Jesusi arhispti: — Jurajkuksï uarhiricha imecheri uarhirichani jatsikorheantaani; t'u jáma Diósïri irechekuani uandantani.

⁶¹Máteru uandaspti: — Acha, jíkini uéksïnga chúxapani, k'óru erokarini, jurajkuni urheta nirani juchenio uandanukorheni.

⁶²Ka Jesusi arhispti: — Ima enga jupikajka tarherakuani ka útasï eraparhani jarhani, Diósïri irechekuarhu no marhuasïndi.