Read Western Highland Purepecha San Juan 10 Bible Online

San Juan 10 - Western Highland Purepecha bible

San Juan 10

¹Ka jimajkani Jesusi uandaspti: “Sési jimboksïni arhixaka eska, ne enga no karichi incharantskuarhu isï niárajka karichichani exeani, inchatspiristi ka sïpajkurheni.

²Ka ima enga karichi incharantskuarhu isï inchajka karichi erangutisti.

³Mítati mítakusïndi, ka karichi eranguti mándani arhisïndi táchani jakangurhikua jimbo uandajpaani, ka karichichaksï míchakusïndi, ka petaataasïndi,

⁴ka engaksï na iámendu uérajkia, urhekupaasïndi, ka karichichaksï chúngumasïndi jimbokaksï michakusïnga.

⁵Ka enga nema nónemani mítejka, nónema chúxapasïndi, jamberiksï sïpakorhekusïndi, jimbokaksï no míchakusïnga.”

⁶Jesusi indeni terukutarantskua arhiaspti, ka imaksï no kurhanguspti ambesï uékani japi arhiaani.

⁷Jesusi ménderu arhiaspti: “Sési jimboksïni arhixaka: Ji inchakueska, engaksï isï karichicha inchajka.

⁸Iámendu engajtsïni urhechepuka inchatspiristiksï ka kuárhukpitistiksï; enga úka, karichichaksï ísku kurhauasti.

⁹Ji inchakueska: Ne enga ixuesï inchaska, kuájchakukateuati. Inchaati ka uéraati ka t'irekua xéntaati.”

¹⁰“Inchatspiri sïpantkusï jurhajti ka uándikpeni ka ambe k'amantskani; ka ji jurhaska eskajtsï cha ambakiti tsípekua jatsiaka, ka eskajtsï kánekuamendu sési irekorheaka.

¹¹Ji ambakiti karichi erangutiska. Ambakiti karichi eranguti, karichichani jimbo tsípekua intspesïndi.

¹²K'óru ima enga tumina jimbojku ánchekorhejka, enga exejka eska jiuatsï jurhani jarhasïnga, jurarkuasïndi karichichani ka sïpakorhesïndi, jimboka ima nómendu karichi erangutiska ka jimbokaksï karichicha no imeriska. Ka jiuatsï karichichani katsarheasïndi ka etsandurhiani.

¹³Ima acheti sïpakorhesïndi jimboka tuminajkusï erarhukujka, ka karichichani no uandanheauani.”

¹⁴“Ji ambakiti karichi erangutiska; ka jucheti karichichani míteaska ka imajtujtsïni jíndeni mítesti,

¹⁵eskarini jucheti Táte na míteka jíndeni, jíjtuni ísï míteska jucheti Táteni ka jucheti karichichani jimbo tsípekua íntspesïnga.

¹⁶Máteru káasïnga karichichani engaksï no íni karichi jatakuarhu anapueka ka imechantuni juánguauaka. Imajtsïni michakuati, ka májkuentaatiksï, ka karichi eranguti májkueuati.”

¹⁷“Táterini xénhchasïndi jimbokani ji jucheti tsípekuani íntspesïnga ka ménderu tsípekua p'íntasïnga.

¹⁸Nónemarini euantasïndi tsípekuani, jísïni íntspejka. Jatsïska juramukua tsípekua íntspeni ka ménderu p'íntani. Jucheti Táterini indeni úni axasti.”

¹⁹Engaksï judiouecha ísï kurhapka, ménderuksï uéntaspti arhukurhini.

²⁰Uánesptiksï engaksï uandempka: — ¿Andijtsïsï jaki indeni kurhajchani? ¿Nójtsï exesïnki eska inde nóambakitini incharhekorhetini kámaxaka ka eska xerejtsïskia?

²¹Ka máteruksï uandasïrempti: — Nónema nóambakitini kámani jarhasïndi ka úni ísï uandani. ¿Andi újki nóambakiti nemani éskatarantani?

²²Iauantskuarhuesptia, enga Jerusaleni Tiosïo Míndantskueri k'uínchekua únhantani jápka.

²³Jesusi tiósïo jarhaspti, ka Salomoniri jájchukurini isï jámaxapti.

²⁴Jimaksï judiouecha jópkurhaspti ka kurhamarhenksï: — ¿Na jatini jamberijtsïni tsimanitsimanhearhataa? Méntkujtsïni aiangu eskari t'u Krístueska.

²⁵Jesusi arhiaspti: — Chánksïni aianguskia, ka nójtsïni jakajkucheska. Ambantku xarharasïndi, imani ambe jimbo engani újka, eska jucheti táteri juramukua jimboesïnga;

²⁶enga úka, chájtsï no jakajkusïnga, jimbokajtsï no jucheti karichiska.

²⁷Jucheti karichichajtsïni míchakusïndi, ka ji míteska imechani ka imajtsïni chúxapasïndi.

²⁸Ji tsípekua méntku isï anapu íntsaasïnga, ka nómenksï uarhiaati ka nójturini nema euajkuauati.

²⁹Táterini íntsaasti, ka ima sánderu k'éristi ka nónema úati euajkuani.

³⁰Táte ka ji májkueskachi.

³¹Judiouechaksï ménderu uéntaspti tsakapu k'arhantani Jesusini k'uanirakuekani,

³²k'óru Jesusi arhiaspti: — Táte juchetiri juramukua jimbo uánekua sési ambe úskia chánksïni japarini; arhijtsïni ¿Náki ima úkua jimbojtsïni tsakapkueraa?

³³Judiouechaksï arhispti: — Nóksïni imani jimbosï tsakapkueraaka engari xáni sési ambe úka, imani jimboksïnisï ataaka engari chéti uandakua jimbo Diósïni útakuni jaka. T'úri ísku acheti méska, ka jandiojkuri Diósï eratakorhexaka.

³⁴Jesusi arhiaspti: — ¿Andi no chári juramukua arhisïni? “Uandaska eskajtsï cha diósïcheska.

³⁵Enga Diósï, diósï arhiajka imechani enga Uandajpaaka, ka karakata iámu ambe ísï úkorhesïndi.

³⁶Ka ekarini Diósï jíndeni arhutaka ka parhakpenirini axani, ¿Andijtsïsï uandajki eskani útakuska engani uandajka eskani Diósï Uájpeska?

³⁷Engani ji no imani ambe úska enga jucheti Táte újka, ásïjtsïni jakajkuche je.

³⁸Ka ji náuejki engani irekajka, ásïjtsïni jíndeni jakajkuche je, imani ambe jakajku je engani újka, ísïjtsï méntku míteaka eska Táte jíndeni jinguni jarhaska ka eskani ji Táte jinguni jarhaska.”

³⁹Ménderuksï jupikani uékaspti, ka Jesusi uéjkuaspti.

⁴⁰Jesusi iurhekua Jordanini parhimentaspti, ka jima pakaraspti, jima enga Juánu itsï atajtsïkpepka.

⁴¹Uánekuaksï andarheraspti ka uandasïremptiksï: — Sési jimbo, náuejki Juánu nóma milagru úka, eska xáni íni achetiri ambe uandantapka, ísïspti.

⁴²Ka uánekuaksï jima anapuecha Jesusini jakajkukuspti.