Read Western Highland Purepecha San Juan 15 Bible Online

San Juan 15 - Western Highland Purepecha bible

San Juan 15

¹Ji ambakiti úbeska, ka jucheti Táte úba jatsikutisti.

²Enga ma ísï axajtata uba no jukarhukurhajka, ima kachundikusïndi, ka iámendu imechani engaksï uba jukarhukurhajka, Ima ambarhutantasïndi, eska sánderu sési jukarhukurhaaka.

³Chájtsï pímbinhasï jarhaskia jimbokaksïni chánksïni Uandakuani aianguskia.

⁴Jíndeni jinguni ja je, eskani ji na cha jinguni jaka. Ísï eska na axajtata ma enga ch'auarhutini jarhajka no újka jandiójku ambe ma jukarhukurhani; chájtujtsï no úaka sési ambe íntspentani engajtsï no jíndeni jinguni jarhaska.

⁵Jísïni ísïka eska úberi tepakua ka chájtsï jucheti axajtateska. Ne enga jíndeni jinguni jarhajka ka ji imani jingunini jarhani, ima kánekua ambe íntspeni jarhasïndi; jimbokajtsïni jíndeni jarharetini nómbema úaka úni.

⁶Enga nema no jíndeni jinguni jaka, axajtateni k'uanikunhaati ka enga na k'arhiakia, tánanhantati ka kurhinhantani.

⁷“Ekajtsï cha méntkisï jíndeni jinguni jarhaska, ka nójtsï jurajkuni engaksïni xáni ambe jurhendaka, kurhajkorhe je ambe engajtsï xáni uéjka ka intsïnhaakajtsï.

⁸Jucheti Táteri k'érikua jimini xárharasïndi engajtsï kánekua ánchekorheta xarhataaka, ka jucheti jurhengorheriuakajtsï.

⁹Eskarini Táte na xénhchaka, jíjtuksïni chánksïni xáni xénhchasïnga; ásï kéndikuku je jucheti xénhchperatani.

¹⁰Ekajtsïni jucheti juramukuechani kurhandiracheska, jíksïni xénhchani jauaka, májkueni eskarini jucheti Táteni na xénhchani jaka jimbokani ji kurhandirakuska.”

¹¹“Ísïksïni arhixaka eskajtsï indeni kurharini chájtu májkueni tsípeaka, ka eskajtsï ísï jámani iámumendu sési tsípeaka.

¹²Ari jucheti juramukuesti: Eskajtsï xénhchperaaka ísï eskaksïni ji na xénhchkaka.

¹³Imasï sánderu xénhchpejti enga imeri p'íchprichani jimbo tsípekua íntspejka.

¹⁴Chájtsï jucheti píchpiriska, ekajtsï ísï jámaska eskaksïni na juramucheni jaka.

¹⁵Nóteruksïni jántspiri arhixakaia, jimboka jántspiri no mítetini jarhasïnga ambe enga ánchetpiri jémba úni jarhajka; chánksïni jucheti p'íchpiri arhisïnga, jimbokaksïni iámendu ambe aianguska engarini jucheti Táte arhika.

¹⁶Jíndentsïni no cha erakuska, jíksïnisï chánksïni erakuka, ka míndaskaksïni eskajtsï niuaka ka kánekua ánchekorhekata íntspentani, ka eska chári ánchekorhekata ióni marhuauaka; ka ísï jámanksïni jucheti Táte iámu ambe íntskuati engajtsï jíndeni uandaparini kurhakuska.

¹⁷Juramuchexakaksïni eskajtsï xénhchperaaka.”

¹⁸Ekaksïni parhakpeni anapuecha kurhunhejka, míte je eskajtsïni jíndeni urhetasï kurhunheka.

¹⁹Ekajtsï cha parhakpeni anapuepiringa, parhakpeni anapuechaksïni xénhchapirindi, eskaksï imajku na xénhchperajka. Eka úka, chájtsï nóteru parhakpeni anapueskia jimbokaksïni ji erakutini p'íjpantaska, jimboksïnisï parhakpeni anapuecha kurhunhejti.

²⁰Mía je engaksïni arhika: Jántspiri no sánderu ambesïndi eska ánchetpiri jémba. Engajtsïni jíndeni atani kámaka, chánksïntuksïni atani kámaati; ka ekajtsïni jíndeni kurhajchajka, chánksïnijtuksïni kurhajchaati.

²¹Eka úka, jíndeni jimboksïnisï ísï kámaati, jimbokaksï no míteska imani engarini axaka.

²²Engani ji no jupiringa ka engani ji no uandaxekuapiringa, nóksï k'amanharhintapirindi; enga úka iásïksï imecheri k'amanharhintskua jimbo nóteru ambe ma úati uandakorheni;

²³Né engarini jíndeni kurhunhejka, jucheti Tátentu kurhunhesïndi.

²⁴Ekani nómbema úpiringa imani ambe engani imechani japari úka, nóksï k'amanharhintapirindi; ka iásïksï exeristia, ka náuejki isï, jíndeni ka jucheti Tátentsïni kurhunhesïndi.

²⁵Eka úka, inde ambe jimboesti eska úkorheaka eska imecheri juramukua na karakata jaka: Ísku jatinijtsïni kurhunhesti.

²⁶Enga uinhaperpentsti na juuakia, engani jucha Táteni jinguni axaaka, Espiritu enga isïkamendu, enga Táteri uéjtateka, ima jucheti ambe uandantaati.

²⁷Ka chájtujtsï xárhataaka, jimbokajtsï uénani jámantki ji jinguni jamaxaka.