Read Western Highland Purepecha San Juan 2 Bible Online

San Juan 2 - Western Highland Purepecha bible

San Juan 2

¹Tanimu jurhia jimbo, Kana, jini Galilea anapu ma iretarhu, tembuchaku ma úkorhespti. Jesusiri nánde jémba jima jámaxapti,

²ka Jesusintuksï imani tembuchakuarhu imeri jurhengorherichani jinguni ióarhiantaaspti.

³Ka enga na kauikua xántkuepkia, Jesusiri amamba Jesusini arhispti: — Kauikuaksï xántkuerastia.

⁴Jesusi arhispti: — Nana, ¿Andirinisï ísï arhijki? Jucheti jurhiata nótki niárasïndi.

⁵Amamba arhiaspti imechani engaksï jatsiratspeni jápka: — Kurhajcha je néna engaksïni inde arhijka.

⁶Kuímu erhakua k'uísï tsakapuerichaksï jima jarhaspti, itsï jatakua, engaksï judiouecha pímbinhaxetarantani arhimetaparini úrempka. Táchani k'uísï, itsï kuímu k'amukuachani isï jatasïrempti.

⁷Jesusi arhiaspti jántspirichani: — Indeni k'uísïchani uinirantaa je. Píptsïtaasptiksï,

⁸ka Jesusi arhiaspti: — Iásï p'ita jeia sáni, ka páku je tembuchakua úrini

⁹Tembuchakua úri ts'émuspti itsïni enga kauikua úntskatepka, no mítetini nani uéraspi, járhojpirichajkuksï mítespti, jimbokaksï imasï itsïni p'itapka. Jimbosï tembuchakua úri tembuchani uandajpapti

¹⁰ka arhini: — Iápuru isï kauikua ambakiti urheta íntsperanhasïndi ka enga na kauinhajkia, arisku jásï kauikua jiájkani ínstperanhasïndia. Ka t'úri ambakiti kauikua tátsekua intspexakaia.

¹¹Indeni jimbo, enga jini Kana Galilea Jesusi úpka, uénaspti milagru xarhatani enga jimbo k'érikua xérpepka ka engaksï jimbo jurhengorheri jémbecha mintsinharhipka.

¹²Jimajku, nánde jémba ka erachi jémbecha ka jurhengorheri jémbechani jinguni, Kafarnaumi niraspti ka namoni jurhiaksï jima jarhaspti.

¹³Ka jimboka janoxapkia páskua, enga judiouecheri k'uínchekueka, Jesusi Jerusaleni niraspti.

¹⁴Ka k'éri tiósïo exeaspti úakasï ka karichi ka jipunhi atarantstichani, ka imechani engaksï jima uaxakatini jápka enga tumina mójtakutsperanhantajka.

¹⁵Ísï exerini, Jesusi sïndariri k'uikirhpetarakua ma úkorhespti, ka tiósïo iámendu petantaaspti, imani ambe jinguni engaksï atarantani jápka. Tumina mójtakutspitichani píjtsïtakua k'uanindurhikuaspti ka tumina k'uanintskakuani.

¹⁶Jipunhi atarantstichani arhiaspti: — ¡Petantsï je indeni ambe ixu! ¡Ásï jucheti Táteri k'umanchekuani maiaperakua úntsï je!

¹⁷Jimajkanksï jurhengorhericha miántaspti karakatani enga arhijka: “Kurhunhentaaka chéti k'umanchekuani kuajpenhchani.”

¹⁸Judiouechaksï kurhamarhespti: — Xérajtsïni, ¿Andi náki juramukua jimbori ísï ambe úsïnki?

¹⁹Jesusi arhiaspti: — Xerentsï je íni tiósïoni, ka ji tanimu jurhia jimbo úntaaka.

²⁰Judiouechaksï arhispti: — I tiósta Tsimani ekuatse ka kuímu uéxurhini jimbo únhasti ¿Nénajturi tanimu jurhia jimbo úntaa?

²¹K'óru, tiósta enga Jesusi arhikuekani jápka; imeri anhanhatakuanisï arhini jápti.

²²Jimboksïsï jurhengorheri jémbecha jiájkani enga tsíntapka, indeni uandakuani miántapti, ka Karakatani ka Jesusiri uandakuechanksï jakajkuspti.

²³Enga Jesusi, páskueri k'uínchekuarhu Jerusaleni jámani jápka, milagruechanksï exearini uánekua jakajkukuspti.

²⁴K'óru Jesusi, imechani no mintsinharhiasïrempti jimboka iámendu míteaspka

²⁵No uétarhesïrempti eska nema aiangupiringa néna járhanhaspi, jimboka ima mintsitechani sési mítekuaspka.