Read Western Highland Purepecha San Juan 8 Bible Online

San Juan 8 - Western Highland Purepecha bible

San Juan 8

²ka pauandekuarhu, ambamantku, tiósïo niántaspti ménderu. Andarherasptiksï, ka ima uaxakaspti ka uénani jurhentpeni.

³Jimajkanksï juramukua jurhentpiricha ka fariseouecha péraspti uarhitini ma engaksï ísku ambe ma niátani p'iárapka nema jinguni. Terujkanksï péraspti,

⁴ka Jesusinksï arhispti: — Jurhentpiri, íni uarhitinksï jima p'iárasti enga ísku ambe ma niátani jápka nema jinguni.

⁵Ka Moisesiri juramukuarhu arhisïndi eskachi indeni járhati uarhitichani tsakapkuerauaka. ¿T'u na uandasïnki?

⁶Imaksï ts'éjkunisï kurhamarhepti, eskaksï ísï jámani xékuntapiringa néna jimbo ambe ma arhiparhatani. Ka Jesusi sánderu arhisïrempti munchujkurhakua jimbo kuiruntskarani.

⁷Ka jimbokaksï inchajtsïmantani jápka kurhamarheni, jauaraspti ka arhiani: — Ne enga cha ma isï no k'amanharhintstika, ima urheta k'uanire.

⁸Ka ménderu uéntaspti ch'úndentani ka karantskarani.

⁹Isïksï kurharini, mándani arhisptiksï kéndikuni, ka sánderu k'ératichaksï uénaspti jarharentani. Enga Jesusi na uarhiti jinguniterku pakarapkia,

¹⁰Jauaraspti ka kurhamarheni: — Nana, ¿Na úskiksïa andi? ¿Nónemakini k'amanharhirantaski?

¹¹Ka ima uarhiti arhispti: — Nónema Tata. Ka ménderu Jesusi arhispti: — Jíjtukini no k'amanharhirantaxaka; ni kókuani níntani ka ásteru jáma k'amanharhintani.

¹²Tátsekua Jesusi ménderu uéntaspti arhijpeni: — Parhakpeni anapuecha jinguni jísïni t'íntskueka, ne engarini chúxapuska, intsïnhati t'íntskua enga tsípekua íntskuaka, ka nómeni p'ájpakandu jámaati.

¹³Fariseouechaksï uandaspti: — T'úri uandakorhexaka: Ka inde isï nómbemesti.

¹⁴Jesusi arhiaspti: — Engani uandantani jaka isïsti, náuejkini uandakorhentani jarhani, jimbokani míteska ji nani jutiski, ka nani niraxamki; ka chájtsï no míteska ji nani jutiski, ka nani niraxamki.

¹⁵Chájtsï parhakpeni anapueni eranguntasïnga ambe. Ji nónemani arhimarhesïnga;

¹⁶ka engani ambe arhinharhipejka, imanisïni arhijpejka enga isïjka, jimbokani no jandiojkusïni arhijpejka, jucheti Táte jingunisïni arhijpejka, ima engarini axaka.

¹⁷Chári juramukuarhu karakata jarhasti eska imasï jukaparharanhaaka engaksï tsimani méntkueni uandantaaka.

¹⁸Ka xéchka je, ji máeskia engani uandakorhentani jaka, ka Táte engarini axaka ima máteru uandantstisti.

¹⁹Ka kurhamarhesptiksï: — ¿Andi chéti táte nani jarhaski? Jesusi arhiaspti: — Chájtsïni no míteska, níjtujtsï jucheti Táteni míte; engajtsïni mítepiringa jíndeni, jucheti Tátenijtujtsï mítepiringa.

²⁰Ísï ambe uandaspti Jesusi Tióstarhu jurhentpeni jatini, jima engaksï k'éjtsïtatarakuecha jápka. Ka nónema jámaspti jupikakuekani, jimboka nótki niaranchasïrempka.

²¹Jesusi ménderu fariseouechani arhiaspti: — Ji niraxamka, ka chájtsïni jirinhantaaka, ka chári k'amanharhintskua jinguntsï uarhiaka. Chájtsï no úaka jini nirani engani ji nirani jámka.

²²Judiouechajtuksï támu arhijperaxapti: — ¿O i uándikukorheni eratsexaki? ¿Ka jimbo ísï uandaxaki eskachi no úaka inde jinguni nirani?

²³Ka Jesusi arhiaspti: — Chájtsï ixu kétsekua anapueska, ka ji jini karhakua anapueska; chájtsï íni parhakpeni anapueska, ka ji no íni parhakpeni anapueska.

²⁴Jimboksïnisï arhijka eskajtsï chári k'amanharhitskuechani jinguni uarhiaka; jimboka ekajtsï no jakajkuska eskani Jíska, chári k'amanharhitskuechani jingunijtsï uarhiaka.

²⁵Jimajkanksï arhispti: — ¿T'u néski andi? Jesusi arhiaspti: — Sési xéntaparini, nájkichkaksïni uénanitki aiangia andi.

²⁶Uánekua ambe uandakua ka arhinharhikukuaksïni patsachexaka, ka ima engarini axaka imani ambe uandasïndi enga ísïka, ka engani ji parhakpeni anapuechani xáni ambe arhiani jaka, imesti engani imani kurhajchaka.

²⁷Ka imaksï no kurhanguspti eska Tátjemberisï arhiani jápka.

²⁸Jimbosï Jesusi arhiapti: — Jiájkani engajtsï Acha Uájpani tarhatatini jauakia, míteakajtsï eskani Jíska, ka eskani nómbema juramukorhesïnga úni; imankusïni uandajka engarini Táte jurhendaka.

²⁹Jimboka ima engarini axaka, jíndeni jinguni jarhasti; nórini méni jandiojku jurarkusti, jimbokani ji méntku isï imani ambe úsïnga enga imani sési p'ikuastajka.

³⁰Uánekuaksï jakajkukuspti enga ísï uandapka.

³¹Ka tátsekua Jesusi arhiaspti judiouechani engaksï jakajkukupkia: — Eka cha méntkisï kurhandirakuska jucheti uandakuani, sési jimbojtsï jucheti jurhengorheriuaka;

³²míteakajtsï imani ambe enga ísïka, ka jimbokajtsï míteaka imani ambe enga ísïka, nóteru ambemerijtsï jántspiriuaka.

³³Imaksï [fariseuecha] mókuntaspti: — Jucha Abraniri sïrukueska, ka nónemerichi jántspiriska; ¿Néna jimborisï arhijkia eskachi nóteru némeri jántspiriuakia?

³⁴Jesusi [fariseuechani] arhiaspti: — Sésiksïnisï arhini jaka eskajtsï iámendu ima engaksï k'amanharhintajka, k'amanharhintskueriksï jántspiristi.

³⁵Jántspiri ma no méntku isï ánchetpirio anapuesïndi; ka enga uájpeuaka, ima k'óru méntkisï imao anapuesïndi.

³⁶Ísï jimbo, engaksïni Uájpa maiampecheska, chájtsï sési jimbo nóteru jántspiriuakia.

³⁷Míteska eskajtsï Abraniri sïrukueska; ka k'órujtsïni uéksïnga atani uándikuni jimbokajtsï jucheti uandakuani no jiókorhesïnga.

³⁸Ji imani ambesïni uandajka engarini Táte jucheti exeraka; chájtu méntkueni imani ambe u je engajtsï chári táteni kurhajchaka.

³⁹Imaksï arhispti: — ¡Abranichkasï juchari táteti! Ka Jesusi arhiantaspti: — Engajtsï sési jimbo Abrani uájpepiringa, imentsï jámapiringa.

⁴⁰K'óru, náuejkiksïni aiangunia engarini Diósï jurhendaka enga ísïka, chájtsïni uéksïnga atani uándikuni. ¡Abrani nómeni ísï jámasti!

⁴¹Chájtsï májkueni ambe úsïnga eska chári táte. Imaksï arhispti: — ¡Jucha no ísku jándi uájpeska; Diósïjkusï Táteti!

⁴²Jesusi arhiaspti: — Enga sési jimbo Diósï chári tátepiringa, chájtsïni xénhchapiringa, jimbokani ji Diósïri uéjtateska ka imeri jimbo jurhaska, ji no p'itsïkorheska jurhani, Diósïrinisï axati.

⁴³¿Andijtsïnisï no kurhanguchejki? Jimbokajtsï no úsïnga kurhani jucheti uandakuani.

⁴⁴Chári táte nóambakitisti; chájtsï imeriska, ka jángorhesïngajtsï imani ambe úni enga ima uéjka. Nóambakiti uénani jámantki uandikpitisti. No méni jurhimbekua jingunisti, ka méntkisï chkuándirasïndi. Enga chkuándirajka, imanisï uénhejti enga jatanheka; jimboka chkuándireska ka ima sánderu k'éri chkuadirakuesti.

⁴⁵Ka chájtsïni no jakajkuchesïnga jimbokani ji imani ambe uandasïnga enga ísïka.

⁴⁶¿Ne cha ma ísï ua xarhatani eskani ji k'amanharhintstiska? Ka ekani ji imani ambe uandajka enga ísïka, ¿Andijtsïnisï no jakajkuchejki?

⁴⁷Ne emanga Diósïrika, kurhajtsïtasïndi Diósïri uandakuechani; ka jimbokajtsï cha no Diósïriska, nójtsï uéksïnga kurhani.

⁴⁸Judiouechaksï arhispti: Sési jimbochisï arhijka eskari Samaria anapueska ka eskari nóambakitini ma incharhekorhetixaka.

⁴⁹Jesusi arhiaspti: — Nóma nóambakitini kámaxaka. Jucheti tátenisïni janhanharhijka ka chájtsïni no janhanharhisïnga.

⁵⁰Ji no k'érikua jirinhakorhexamka; jarhasti ma enga jirinhajka, ka imasï arhinharhikpejti.

⁵¹Sési jimboksïni arhixaka, ne enga kurhandirakuska jucheti uandakuani, no uarhiati.

⁵²Judiouechaksï ménderu arhispti: — Iásï k'óruchi sánderu sési jánhaskaskia eskari nóambakitini kámaxaka. Abrani, ka iámenduksï Diósïri uandaricha uarhisti, ka t'úri uandasïnga: “Ne enga kurhandirakuska jucheti uandakuani, no uarhiati”

⁵³¿Andi t'u sánderu ambeski eska juchari táte Abrani? Ima uarhisti, ka Diósïri uandarichajtuksï uarhisti. ¿Andirisï xáni sési xékorhki?

⁵⁴Jesusi arhiaspti: — Engani ji jandiojku k'éri ukorheaka, jucheti k'érikua nómbemesti. Jucheti Táterinisï k'óru k'éri újti, ima enga cha uandajka eskajtu chári Diósïska

⁵⁵Enga úka, chájtsï no míteska. Ji míteska; ka ekani no míteni uandapiringa, jíjtuni májkueni chkuándirapiringa eska cha. Ka sési jimbo ji míteska, ka kurhandirakusïnga imeri uandakuani.

⁵⁶Abrani, chári táte, tsípespti jimboka exepiringa jucheti jurhiani; ka exesti, ka iámu tsípesti.

⁵⁷Judiouechaksï Jesusini arhispti: — Nótkiri jamberi tsimani ekuatse ka témbeni jatiriska ¿Ka Abraniniri xéni uandasïnki?

⁵⁸Jesusi arhiaspti: — Sési jimboksïni arhixaka eskani ji Abrani jinguni t'uínispkia.

⁵⁹Jiájkani k'óruksï tsakapu k'arhantaspti k'uaniranksï uékani; ka Jesusi jirikorhespti ka tiósïo uéntaspti; terujkani isï nitamakuaspti uéntani jámani.