Read Western Highland Purepecha Hechos 1 Bible Online

Hechos 1 - Western Highland Purepecha bible

Hechos 1

¹¡Áke t'u Teófilu! Máteru jucheti urhetku karakatarhukini karachespka[1] ambe enga Jesusi uénapka úni ka jurhentpeni.

²Ka jiájkani jamberi enga auandarhu p'íkunhantaka, ka enga Espiritu Sántu jimbo juramukuapka imeri uandakua párichani enga erantaatini jápka.

³Ísï tátsekua enga xáni nósesi kánhapka ka uándikunhani, tsípiti xarhakuantaaspti ka sési exeraaspti eska tsípiti jámaxapka, ka tsimani ekuatse jurhiatekuaksï exentaspti, ka ima Diósïri irechakueri ambe uandaxekuasïrempti.

⁴Jesusi juramukuaspti jurhengorheri jémbechani enga imechani jinguni t'ireni jápka: — Ásï jama je uéakuntani Jerusaleni. Erokorhe je Táteri aiatsperakuani, imani engajtsïni cha jíndeni kurhajchakorheka.

⁵Sési jimbo, Juánu itsï jimbo itsï atajtsïkpesti, ka chájtsï nóteru ióndani Espiritu Sántuni atajtsïkunhaaka.

⁶Ima engaksï Jesusi jinguni jápka, kurhamarhesptiksï: — Tata, ¿Iásïri Israeli anapuechani irecheni ma péraakuaua?

⁷Ka Jesusi arhiaspti: — Chájtsï no p'itaranchasïnga míteni ambe jándueua o na jatiniua, ambe enga Táte imeri juramukua jimbo juramutini jaka,

⁸k'óru jiájkani engajtsï p'iuaka Espiritu Sántueri uinhapekua, engaksïni andajtsïkueraaka, Jerusaleni ka iápuru Judea ka Samaria ka ma parhakpentsï uandantaaka ambe engajtsï jucheti ambe exeka.

⁹Jesusi íni ambe undarini, auandarhu p'íkunhantaspti imechani jáparini, jánikua ma ónharhikuaspti ka nóteruksï úsptiia exeni.

¹⁰Engaksï erancheni jápka, enga Jesusi karhanchentani jápka, ma akandanksï niárakuaspti tsimani acheticha urapiti xukuparhatini,

¹¹engaksï arhiapka: — Galilea anapuecha, ¿Andijtsïsï ísku pakarera erancheni? Inde Jesusi enga auandarhu p'íkunhantani jáka, májkueni junguaati eskajtsï na eranguntani jaka.

¹²Olibusïrhu juátarhu uératinksï, Jesusiri uandakua páricha Jerusaleni k'uanhatsentaspti, no iauanesti, xántku eska sábadu nájku jiáretperanhempka xanharani.

¹³Ka iretarhu niáratinksï, k'umanchekuarhu iótakuarhuksï karhantaspti, jima engaksï Pédru ka Santiagu jájkorheni jápka, ka ístu Juánu ka Andresï ka Felipe ka Tomasï ka Bartolome ka Mateo ka Santiagu Alfeo uájpa, ka Simoni Selota ka Júdasï; Santiagu uájpa.

¹⁴Imaksï nanecha máru jinguni méntku tángorhentani jarhasïrempti uandamukukorheni, Maria Jesusiri amamba jinguni ka erachi jémbecha jinguni.

¹⁵Imani jurhiatekua ma jimbo, Pédru, erachichani japarini jauarasti ka uandaspti. Ka ima engaksï tángorhetini jápka kuímu ekuatse ísïptiksï:

¹⁶“Tatecha ka nanecha, k'uanisïrempti eska úkorhepiringa eska karakata na arhijka, enga Espiritu Sántu Dabini jimbo, Júdasïri ambe uandapka. Ima enga urhekupaapka imechani engaksï Jesusini jupikapka.

¹⁷Júdasï jucha jingunispti ka jucha jinguni ánchekorhesïrempti.

¹⁸Ima, tumina nósesi andakata jimbo, echeri ma piántaspti, ka tátsekua éjpu urhetatapaspti ka charerani ka sïturhi uéarheraspti.

¹⁹I ambe Jerusaleni iámu mítekorhespti ka echerinksï jamberi Aseldama jakangurhitaspti, (enga ‘Iurhiri jáakurhakuarhu’ arhikuekajka imecheri uandakua jimbo.)

²⁰Nóchka jakajkuticheri pirekuecharhu ísï karakata jarhasti andi: Chéni jémbo pínandente, ka ásteru nema jima ireke.” Ka eska máteru jupintaaka imeri ánchekorhetani.

²¹“Sésiuati eska ma engajtsïni méntkisï pámbetakiia, enga Acha Jesusi juchantsïni jinguni jámani jápka;

²²jiáni uératini enga Juánu itsï atajtsïkpeka, ka enga jamberi ima auandarhu p'íkunhantaka. K'uanisïndi eska ma jucha jinguni jámaaka uandantani eska Jesusi tsíntaska.”

²³Ka tsimanksï achetichani erauantaaspti: Joseni, engaksï Bársabasï arhimpka ka ístuksï Jústu arhisïrempti, ka Matiasïni.

²⁴Ka ísïksï uandamukukorhespti: “Acha, cha engajtsï iámenduechani mintsita mítekuaka, exerajtsïni nákiri i tsimani tatani erakusïnki,

²⁵enga jupintaaka uandakua páni, enga Júdasï jurarkuka jiájkani enga k'amanharhintapka, ka enga nika jini enga ima jakuepka.”

²⁶Ka engaksï erakuani jápka, Matiasïni niárakueraspti, ka ima témbeni ma Jesusiri uandakua páricha jinguniranhasptia.