Read Western Highland Purepecha Hechos 14 Bible Online

Hechos 14 - Western Highland Purepecha bible

Hechos 14

¹Engaksï Ikonio niárapka, jimajtuksï judiuecheri k'umanchekua tángorhentskuarhu inchaspti, ka xáni sésiksï uandaxetspespti engaksï uánekua judiuecha ka gríeguecha jakajkupka.

²K'óruksï judiuecha engaksï no jakajkupka no judiuechanksï churhurheaspti, ka imaksï jakajkutichani ikiakuaspti.

³Ka sáni iónksï jima pakaraspti ka Achanksï mintsinharhiparini arhijtsïkpesïrempti imeri kónteperateri ambe, jimboka ima íntsaasïrempka uinhapekua eskaksï úpiringa ambe engaksï xáni uandempka.

⁴Iretarhu arhukurhinhaspti, máruksï judiuechani jingunintaspti ka máteruksï Jesukristueri uandakua párichani jingunini.

⁵Jiájkani judiuecha ka no judiuechaksï, imecheri juramutichani jingunksï márku úkorhentaspti ka atakuekaanksï ka tsakapu jimboksï uékasïrempti ataani,

⁶engaksï Páblu Bernabe jinguni mítepka, Likaonia ka Lístra ka Dérbe isïksï jámaspti sïpakorheni.

⁷Ka jimesïksï ambakiti aiangperakuani uandantapaspti.

⁸Ka Lístra jarhaspti acheti ma uaxandetini, enga nómeni xanharapka jimboka ísï andajpenuspka.

⁹Ima Pábluni kurhajchaxapti. Jiájkani Páblu eratetini ka exerini eska ima mintsikaxapka ambakentani,

¹⁰uinhachakuspti: “¡Jauara ka sési anhaxurhi!” Ka ima jauajpatsespti ka xanharaspti.

¹¹K'uiripu Pábluni exerini ambe enga úpka, likaonia uandakua jimboksï uénaspti uinhachani: “¡Diósïchajtsïni k'uiripueni jarhantatini p'urhembesti!”

¹²Bernabenksï arhisïrempti eska diósï séusispka ka Páblunksï diósï Érmesï, jimboka imasï uandempka.

¹³Séusiri tióstarhu anapu táta enga iretarhu ichaakuni jáka, úakasïchani ka tsïtsïki petaspti, ka k'uiripuni jingunksï kéjtsïtakuaksï uékaxapti.

¹⁴Páblu ka Bernabe, Jesusiri uandakua párichaksï, íni ambe kurharini karunhentasptiksï ka inchaakurhasptiksï uinhachaparini:

¹⁵Pámpiricha, ¿Andijtsïsï íni ambe ísï újki? Juchajtuni k'uiripueska eskamendu cha engaksïni arhijtsïkuni jaka eskajtsïni íni ambe enga ísku ambe méka jurajkuaka, ka Diósï jingunintantsï enga auandani ka echerini ka japundani ka ambe engateru jima jaka ambeni kueraaka.

¹⁶Ka enga ióntki anapuechani sésekua intsaapka eska táchani ireta jámapiringa eska na jánhchanhapiringa;

¹⁷ka nájkiruka no jurajkuntaka imeri ambe uandantani, kánekua kóntpeparini, janiracheparinksïni ka sési jásï jurhiakuechani axacheaparini, tsíperastiksïni ka sésiksïni p'ikuarhenhetasti akua íntskutini.

¹⁸Ka nauejkiksï íni ambe arhiarini, kánekua úkua jingunksï andajtsïteraaspti eskaksï nómbe ma uandikupiringa kéjtsïtakuani.

¹⁹Ka jiájkanksï niáraspti máru judiuecha Antiokia ka Ikonio anapuecha engaksï manatpepka; Páblunksï tsakapkueraspti ka antsikupasptiksï pétaatantani, ísï eranhaskaparini eska uarhispkia.

²⁰K'óru Páblu jauaraspti engaksï Jesusiri uandakua paricha uirhipandatini jápka, ka iretarhu inchakuntaspti. Pauandekuaksï Bernabe jinguni niraspti.

²¹Imani iretarhu engaksï ambakiti aiangperakuani aiangpentapka, ka uánekuaksï jurhengorherichani tánaatini, Lístra ka Ikonio ka Antiokiaksï k'uanhatsentaspti,

²²uinhaperantaasptiksï jurhengorherichani ka arhiasptiksï eskaksï jakajkuni japiringateru ka arhiasptiksï: — K'uanisïndi eskachi uánekua ambe nósesi nitamanchakorhea engachi jimbo úaka Diósïri irechekuarhu inchani.

²³Ka engaksï k'amarapka uandamukukorheni ka k'arhinda jarhani, tángorhekuecharhuksï achamasïchani erakuaspti, ka imechani engaksï Achani jakajkupka, arhiasptiksï eska Acha újchakurapiringa.

²⁴Pisidia uératinksï Panfilia niáraspti.

²⁵Ka Pérgaksï uandakuani aiangpentaspti ka jima uératinksï Atalia kétsemaspti.

²⁶Ka Atalia uératinksï icharhuta jimbo Antiokiaksï niántaspti, jima engaksï uérapka imani ánchekorhetani úni mintsikaparini eska Diósï urhekupaapiringa.

²⁷Níaratinksï, tángorhekuarhu anapuechanksï tánantaaspti, ka p'íarasptiksï uandantani ambe enga Diósï imecha jimbo úempka ka na enga no judiuechani jakajkutaraapka.

²⁸Ka Jesusiri jakajkuticha jingunksï sáni ióni jima pakaraspti.