Read Western Highland Purepecha Hechos 15 Bible Online

Hechos 15 - Western Highland Purepecha bible

Hechos 15

¹Máruksï erachicha Judea uératini kétsemaspti Antiokia, ka uénasptiksï erachichani arhiani: — Ekajtsï cha ts'iuekuarhu pasïri no p'ikujtsïkumeska eska Moisesiri p'indekua na arhijka, nójtsï úaka p'ímutanhantani.

²Pábluksï Bernabe jinguni imechani jinguni mámaru ambe arhijperantaspti, ka pakatperanhaspti eskaksï Páblu Bernabe jinguni ka máteruksï Jerusaleni nipiringa íni ambe uandaxeni, Jesusiri uandakua párichani ka achamasï urhejtsïkuricha jinguni.

³Imanksï Antiokia anapu tángorhekua axaaspti ka Fenisia ka Samariaksï ísïksï parhikuspti, ka aiangpentasïremptiksï eskaksï no judiuecha jakajkuspkia; ka iámendu erachichanksï kánekua tsíperaasïrempti.

⁴Jerusaleni niáratinksï, tángorhentskuarhu anapuechaksï ka Jesusiri uandakua páricha ka achamasï urhejtsïkurichaksï eroaspti, ka imaksï uandantaspti ambe enga Diósï imechani jinguni xáni úpka.

⁵K'óru máru engaksï fariseuechani jarhareapka, engaksï Jesusini jakajkuempkia, jauarasptiksï uandani: — K'uanisïndi no judiuechani ts'iuekuarhu p'enojtsïkukuani, ka eskaksï Moisesiri juramukuani kurhandirakuaka.

⁶Jesusiri uandakua páricha ka achamasï urhejtsïkurichaksï tángorhentaspti íni ambe uandaxentani.

⁷Sánksï ióni mámaru ambe arhijperantatini, Pédru jauaraspti ka arhiaspti: — Tatecha, chájtsï mítetixaka na enga sáni iónikia engarini Diósï erakuka, eskajtsïni no judiuecha jíndeni ambakiti aiangperakua kurhajchakorhepiringa, ka eskaksï jakajkupiringa.

⁸Ka Diósï enga míteka na enga jásï mintsita jatanhaka, jiókaasti Espiritu Sántuni íntsaaparini ísï eskajtsïni juchantsïni na íntskuka,

⁹ka iámenduechantsïni májkueni exesti, imecheri mintsitechani pímbinhajkuantaaspti jimbokaksï jakajkuska.

¹⁰Iásïjtsï, ¿Andisï Diósïni ts'éjkukuekajki engajtsï jurhengorherichani íni uanajchakuani párakuekaani jaka, engaksï jucha ka juchari tátecha jamberi no úka páni?

¹¹Juchachi jinisï jajkajkujka eskachi Acha Jesukristueri kóntperakua jimbo p'ímutantskorhexaka, májkueni eskaksï ima engaksï jakajkuka na p'ímutantskorheni jaka.

¹²Jiájkani tángorhekuarhu pínamanhaspti, ka Páblunksï Bernabeni jinguni kurhajchaaxapti, engaksï ima uandantani jápka iámendu míndechani ka k'éri ambe enga Diósï imechani jimbo no judiuechani úkuapka.

¹³Engaksï íni ambe uandapkia, Santiagu arhiantaaspti: — Tatecha, erachicha, kurhajchajtsïni je.

¹⁴Simoni uandantasti na enga Diósï uénakia no judiuechani jarhuataani ka imeri ireterakorheani eskaksï imeriuaka.

¹⁵I ambe terukuntaxati engaksï Diósïri uandaricha uandaka, eska na karakata jaka:

¹⁶Íni ambe nitamatini, junguaka ka Dabiri k'umanchekuani úntaaka, ka ménderuni jauatantaaka.

¹⁷Eskaksï máteru iretecha ka no judiuecha engaksï xáni imani andarhentaka Achani jirinhantaaka.

¹⁸Achasï ísï uandani jati enga íni ambe újka, eska méntkisï na mítekorhekia.

¹⁹Ísï jimboksïnisï ji arhini jaka, eskaksï no judiuechani engaksï Diósïni andarheraaka nóteruksï jatsiskia méntku ambe arhinhani jarhani.

²⁰Jinichi karakuauaka eskaksï jarhareaka kéjtsïtakuani enga diósï eraakatechani jimbo ikichakua úkorheka, eskaksï no jámaaka manakorheri uarhikorhetani ka iurhirini arhani, ka eskaksï no ískjandi úkorheaka.

²¹Jimboka ióntkitki uératinia, mándani iretecharhuksï jatsïkorhesti ima engaksï Moisesiri karakatani arhijtsïkpejka, ka k'umanchekua tángorhentskuecharhu mándani sábadu arhinhantaxati.

²²Jimajkanksï Jesusiri uandakua páricha ka achamasï urhejtsïkuricha, iámendu tángorheticha jingunksï pakatperaspti máru jima erakuaani, engaksï Páblu ka Bernabe jinguni Antiokia axaapiringa; Júdasïspti engajtuksï Bársabasï arhimpka ka Sílasi, ima enga erachichani urherukukuauempka.

²³Ka imecha jingunksï karata ma axakuaspti: “Erachicha, Jesusiri uandakua páricha ka achamasï urhejtsïkurijchaksï, erachichanchi uandajpaaxaka engaksï no judioueka engaksï Antiokia ka Síria ka Silisia anapueka.

²⁴Jucha míteska eskaksïni jimintku máru manataska mámaru ambe arhiparinksïni engani no jucha arhiaka, ka nóksïni jánhasteraasti,

²⁵jucha sési teruatperaskia erakuani máru achamasïchani, ka juchari pámpiri Bernabe ka Páblu jingunksïni axacheauaka,

²⁶engaksï juchari Acha Jesukristuni íntskukorhentaaka.

²⁷Júdasïni ka Sílasinksïni axacheaska, imajtuksïni íni ambe arhikorheati:

²⁸Eskani jucha Espiritu Sántuni jinguni sési exeska, ka nóteruksïni ts'unhapekua ambe úraakia, arini ambe k'óru jo, jimboka ísï k'uanisïnga

²⁹eskajtsï diósï eratakatecheri kéjtsïtakatani no auaka ka manakorheri uarhikorhetani ka iurhirini, ka eskaksï no ískjandi úkorheaka, sésiuati engajtsï íni ambe jurajkuska. Eskajtsï sési jámani jauaka.”

³⁰Engaksï na uandanukorhentapka, Antiokiaksï kétsemaspti ka tángorhekuanksï tánantaspti ka karakatanksï íntspentaspti.

³¹Ka engaksï arhintapka, kánekua tsípenhantaspti.

³²Júdasï ka Sílasiksï engajtuksï Diósïri uandaripka, erachichanksï andajtsïteraaspti uánekua ambe arhiaparini.

³³Ka sáni ióni jimbo, erachichaksï kánekua sési tsînguantaaspti iámendu imecha jinguni engaksï axanhapka.

³⁴[K'óru enga úpka, Sílasi sési erangueraspti jima pakaranderu.]

³⁵Ka Páblu, Bernabe jingunksï Antiokia pakaraspti máteruecha jinguni Acheri uandakuani jurhentpeni ka ambakiti aiangperakuani aiangpentani.

³⁶Ka namuni jurhiatekua jimbo, Páblu Bernabeni arhispti: — Ju jucha ménderu iretecharhu imechani exeani engachi Acheri uandakuani aianguantaapkia.

³⁷Bernabe Juánuni pájtakuekaxapti, imani engaksï Márkusï arhimpka,

³⁸k'óru Páblu nósesi eranguntaspti imani pájtani enga Panfiliatki kéndikukuapka ka ánchekorheta jurajkukuani.

³⁹Xánksï mámaru ambe arhijperantaspti engaksï jamberi jarharpererapka; Bernabe Márkusï jingunksï Chípre ómekuarhu niraspti,

⁴⁰ka Páblu Sílasini pájtaspti, ka erachichaksï arhiaspti eska Acheri kóntperakua urhekupaapiringa,

⁴¹ka Síria ka Silisia isïksï jámaspti tángorhekuechani uinhaperantaaparini.