Read Western Highland Purepecha Hechos 19 Bible Online

Hechos 19 - Western Highland Purepecha bible

Hechos 19

¹Enga Apolusï Korintu jápka, Páblu juátarhu ísï niraspti ka Éfesu niáraspti, ka jima máru erachichani xéantaaspti;

²ka kurhamarheaspti: — ¿P'iraskijtsïa Espiritu Sántuni jiájkani engajtsï jakajkupka? Ka imaksï arhintaspti: — Nómbe, jucha nómeni kurhaska eska Espirtu Sántu jarhaska.

³Ka Páblu ménderu arhiaspti: — ¿Andi náki itsï atajtsïkuantsï p'iraski? Ka imaksï arhispti: — Juánueri itsï atajtsïkuani,

⁴ka Páblu uandasptiteru: — Juánu itsï atajtsïkua móantskuerini itsï atajtsïkpesti, arhijpeparini eskaksï jakajkukupiringa imani enga Juánuni chúxapuni jápka, Jesusinichka.

⁵Íni kurharinksï Acha Jesusiri jakangurhikua jimboksï itsï atajtsïkunhaspti.

⁶Ka Espiritu Sántu andajtsïkueraspti enga Páblu p'ájtsïkuapka, ka máteru uandakua jimboksï p'iáraspti uandani ka Diósï jimboksï uandani.

⁷Témbeni tsimani acheticha ísïsptiksï.

⁸Páblu tanimu kutsï niraspti k'umanchekua tángorhentskuarhu ka Diósïri irechekueri ambe ts'iuekua jinguni uandasïrempti, ka jángorhentasïrempti jakajkutaraani.

⁹K'óruksï máru inchajtsïmasïrempti no jiókorheni ka xanhariri ambeksï k'uiripuni japarini nósesi ambe uandasïrempti, Páblu imechani kéndikukuaspti ka jurhengorherichani jingunksï támu tángorhentasïrempti; ka mándani pauani k'umanchekua jurhentperakua Tiranusïrirhu jurhendaasïrempti.

¹⁰Tsimani uéxurhini májkueni úspti, ka iámenduksï Ásia anapuecha ka judioecha ka gríeguecha, Acheri Uandakuani kurhaspti.

¹¹Ka Diósï Pábluni jimbo k'érati milagruechani úasïrempti,

¹²takusï ka tánharhikuechantku enga Páblu p'arheauempka, p'amenchatichanksï pákuasïrempti ka imaksï ambakentasïrempti, ka nósesi jarhati espirituechajtuksï uérhpentasïrempti.

¹³Máru judiuecha engaksï iápuru isï nósesi jarhatichani petarhpeantauani jámempka, Acha Jesusini jimboksï nósesi jarhatichani petarhpeantani uékaspti ka uandasïremptiksï: — ¡Jesusini jimbo, imani enga Páblu arhijtsïkpejka, urhejpentsï je!

¹⁴Iúmu tsimani k'éri táta judio Eseba uájpechesptiksï engaksï íni ambe úempka.

¹⁵K'óru nósesi jásï espiritu arhiantaaspti: “Jesusini míteska ka míteska Pábluni, ¿Cha néski andi?”

¹⁶Ka ima acheti enga nósesi jásï espiritu incharhetini jápka jupikakuekaaspti ka nósesi kántaaspti, ka imaksï uiriapantaspti uentani xásku ka xarhixarhirhekorhetini.

¹⁷Iámendu Éfesu anapuechaksï íni ambe mítespti, ka ístuksï judiuecha ka gríeguecha mítespti. Ka iámenduechaksï chétku jarhaspti, ka Acha Jesusi k'éri ambe arhinhaspti.

¹⁸Uánekua engaksï Jesusini jakajkupka nirasïremptiksï p'amongorhentani.

¹⁹Uánekua ima engaksï sïkuamepka karakatechanksï tánantaaspti ka iámenduechanksï japarini kurhiantaaspti. Ima karakatecha tsimani ekuatse ka témbeni míli taiakataksï jukaparhaspti.

²⁰Ísï Acheri uandakua mítekorhepaxapti ka uinhamu etsakurhipani jarhani.

²¹Tátsekua Páblu eratsespti Jerusaleni nirani ka Masedonia ka Akaia isï jamani. Ka uandaxapti: “Jerusaleni uératini Róma niuaka.”

²²Ka Masedonia tsimani imeri jarhojpirichani axaaspti, Timoteoni ka Erastusïni, ka ima Ásia pakaraspti sóndi.

²³Imani jurhiatekuechani jimbanhe jakajkukua jimbo méntkisï jánhaspti.

²⁴Acheti taiakata ánchekorheri ma jimbo enga Demetrio arhinhempka, ima Artemiseri tióstarhu eratakuechani taiasïrempti, ka máteru taiaricha jingunksï kánekua tumina andasïrempti,

²⁵ima acheti iámendu tánantaaspti, ka máteruechantu engaksï íni ambe újkuantauempka ka arhiaspti: Pámpiricha, chájtsï mítetixaka na engachi íni ánchekorheta jimbo sési nitamakorhejka;

²⁶ka exeni jakaajtsï ka kurhantsï jarhani, no Éfesujku, iámu Ásia ísïjtu, na enga inde Páblu k'uiripuni jakajkutarani jaka ka támisï páni jarhani arhiaparini eskaksï no diósïska indeni enga k'uiripu újkuantajka.

²⁷Ka inde ambejtsïni no juchari ánchekorhetantkusï ísku ambeni xarhatacheati, k'éri diósï Artemiseri tióstani jamberi ísku ambeni xénhaati. Imeri k'érikuanksï ísterku ambemeni exeati enga Ásia ka ma parhakpeni k'éri ambe arhijka.

²⁸Íni ambeksï kurharini, kurhunheparinksï uinhachaspti: “¡Artemisa Éfesu anapuecheri k'éri ambesti!”

²⁹Ka iretarhu méntku isï jánhaspti. Ka Gáiuni ka Aristarkunksï Masedonia anapuechani engaksï Páblueri pámpiri jémbepka, antsikupaasptiksï jima jamberi enga exejpekua ambe úkorhempka.

³⁰Ka Páblu inchakuekaxapti k'uiripuni uandaxekuni, k'óruksï jurhengorhericha no jurajkuspti.

³¹Juramutichaksï Ásia anapuecha jamberi engaksï Páblueri pámpiri jémbepka, uandakua axakusptiksï eska no jámapiringa inchani.

³²Ka tángorhekuarhu méntku ísï uinhachanhaxapti, ka méntku no jánhaskorhespti, ka uánekuaksï no jamberi mítespti andiksïsï jima japi.

³³Máruksï judiuecha Alejandruni arhirixapti ka urhepanksï p'ákchakuspti. Ka Alejandru níjkurhatspespti eska ísku janhapiringa ka k'uiripuni jánhastakuekaxapti.

³⁴K'óru engaksï mítepka eska Judiouespka, méntku ísï uinhachaspti: “¡Éfesu anapuecheri Artemisa, k'éri ambesti!”

³⁵Enga juramuti jima anapu pínasku jatsijpepka uandaspti: Éfesu anapuecha, ¿Ne no míteski? Eska Éfesu ireta Artemiseri tiósïoni kuáni jarhasïnga ka imeri eratakuani enga auandarhu uératini kétseka.

³⁶Méntku nómbema uandakuesti, sésiuati eskajtsï ísku jauaka ka eskajtsï no nósesi ambe niátaaka.

³⁷Chájtsï íni achetichani júaska engaksï juchari nana kuerajpirini nómbema nósesi úkuka, ka imeri ambeksï nómbema nósesi uandasti.

³⁸Eka Demetrio, jarhojpiri jémbecha jinguni ambe arhikua xékuani jaka, útatsperakua ka juramutichaksï jatsïkorhesti; jimaksï arhijpere.

³⁹Ka ekajtsï máteru ambe kámani jakateru, tángorhekuarhu uandakueuati.

⁴⁰Nóchkani jucha jamberi arhinharhikunhaa andi, eskani jucha k'uiripuni manataxaka, ambejtuchi aiangpentaa enga xáni ísï jánhani jaka.

⁴¹Ísï uandarini tángorhekuani k'amarhutaspti.