Read Western Highland Purepecha Hechos 2 Bible Online

Hechos 2 - Western Highland Purepecha bible

Hechos 2

¹Penteskostesïri k'uínchekurhu jimboksï iámenduecha tángorhentatixapti.

²Ka mátirku auandarhu uératini nósesi kúspuspti, eska ambe uinhamu tarhiani, ka méntku k'umanchekuarhu xamantskantaspti jima engaksï ima jápka.

³Ka katambeni járhati chpíririksï xarharaspti ka etsakurhisptiksï, ka mándani arhisptiksï imechani andajtsïkueraani.

⁴Iámenduechani Espiritu Sántu andajtsïkueraaspti, ka uénasptiksï máteru uandakuechani jimbo uándani, ísï eska Espiritu na uandarauempka.

⁵Ka Jerusalenksï irekaxapti máru judiuecha, kánekua jakajkuticha engaksï iápuru ísï uératini jútipka.

⁶Imani xamanguntskuani kurhanhatini uánekua tángorhenhantaspti, ka ískuksï pakareraspti, jimbokaksï táchani kurhajchakorheaxapka imecheri uandakua jimboksï uandani jarhani.

⁷Ískuksï jarhaspti eratsentani ka uandasïremptiksï: — ¿Andi íksï no Galilea anapuecheski engaksï mámaru uandani jaka?

⁸¿Néna jimbochisï kurhangukuani jaki imani uandakuani engachi jucha sapirintki uandajka?

⁹Ixuchi jarhaska Pártosï anapuecha ka Médosï anapuecha ka Elami anapuecha, ka jucha engachi Mesopotamia irekaka; ka Judea ka Kapadosia ka Pónto ka Ásia,

¹⁰ka Frígia ka Panfilia ka Ejiptu ka Áfrika ísï, ka Sirene jini sánderu ísï, ka Róma anapuecha engaksï ixu irekani jaka;

¹¹máruksï judiouesti ka máruksï judio úkorhentasti. Ka ístuksï ixu jarhasti Kréta anapuecha ka Arabia anapuecha, iámenduechachi kurhajchakorheaxaka engaksï juchari uandakua jimbo, Diósïri k'éri ambekueri ambe uandani jaka.

¹²Iámenduksï ísku pakareratixapti ka mámaru ambeksï eratsexapti ka arhijperasïremptiksï: — ¿I ambexamu arhikuekajki?

¹³Ka máteruksï arhinhchaasïrempti: — Íksï kauirixati.

¹⁴Ka Pédru, jauaraspti máteru témbeni ma Jesusiri uandakua párichani jinguni ka uinhamu uandaspti: “Judiouecha, ka iámendu engajtsï Jerusaleni irekorheka: Sési mítetini ja je íni ambe, ka kurhajtsïni je ambe engaksïni arhiaka.

¹⁵Íksï no kauirixati eskajtsï cha na eranhaskani jaka, nóchka xarheniski andi.

¹⁶Ísï ima ambeti enga Diósïri uandari Joeli uandaka:

¹⁷Diósï uandasti: Jiájkani engaksï jurhiatekuecha k'amarhuni jámaaka, jucheti Espirituni k'uiripuni andajtsïteraaka, ka chári uátsïtichaksï Diósïri ambe uandajtsïkpeaati; chári tumbichaksï jánhaskaati, ka tata k'ératichaksï tsánharhiati;

¹⁸sési jimbo ji jucheti jántspirichani, ima jurhiatekuechani jimbo Espirituni andajtsïterauaka ka uandajtsïkujpeatiksï.

¹⁹K'érati míndechani xarhatauaka auandarhu, ka parhakpeni iurhiri ka chpíri ka kánekua sïraata.

²⁰Tata jurhiata pájpakaxeati, ka nana kutsï iurhirkuentaati, enga nótki niárani jauaka Acheri k'éri jurhiatekua.

²¹Ka ima engaksï Achani kómarhiaka, p'ímutanhantaatiksï.[2]

²²Kurha je íni ambe Israeli anapuecha, engani uandani jámka: Jesusi Nasareti anapu imesti, engaksïni Diósï erakucheka, ka imaksïni Diósïni jimbo, k'éri ambe, ka míndechani ambe xarhatachesti eskajtsï cha na mítetini jáka;

²³ka indenksï intsïnharhitpesti ísï eska na eratsekata jápka, eska Diósï na eratsetini jápka; ka uándikutarkorheskajtsï cháparhatarkorheparini nóambarhati k'uiripu jimbo.

²⁴Ka Diósï tsítantasti, ka kénditakusti uarhikueri p'amekuani, jimboka uarhikua no úpiringa andani.

²⁵Jimboka irecha Dabi, Jesusini arhikuekani uandasti: Ji exeni jarhasïnga eskarini jucheti Acha urhechepasïnga, jimbokarini jurhijkandani pámbexaka, ka nómbemarini úati andani.

²⁶Jimbosï jucheti mintsita tsípejti, ka andanhentasïnga pirekuni, ka ji kánekua mintsikaparini irekaaka,

²⁷jimbokari no uarhiricha jinguni jurajkuaka, ka no jurajkuati eska chéti erakukata teretseaka.

²⁸Xéraaskarini xanharichani enga sési irestpejka, ka ji kánekua tsípeaka engakini exeni jauaka.”[3]

²⁹“Tatecha ka nanecha, jurajkuksïni jurhimbitku arhini, eska irecha Dabi uarhiska ka jatsinhantasti, ka jima enga jántaka, útasteru jima jarhasti.

³⁰Enga ima Diósïri uandarini jápka, mítetixapti eska Diósï aiakutixapka sïrukua jémbani ma irechetarani,

³¹sési eranguntatini, Dabi, Krístueri tsíntskueri ambesï uandapti, eska Jesusi no uarhikuarhu pakarapiringa ka eska no téretsepiringa.

³²Ka Diósï Jesusini tsítantasti, ka indeni ambe jucha exekorheska.

³³Enga Diósï Jesusini p'íkuntapka, t'irejkandani pérasti, ka ima p'irasti Espiritu Sántuni enga Tátjemba íntskupka ka Jesusijtsïni juchantsïni andajtsïterasti, indesti engajtsï exeni jaka ka kurhani jaka.

³⁴No Dabisï kénchentati, nóchka ima ísï uandaspki andi: Acha Diósï arhisti jucheti Achani, jurhijkandarini uaxakachetini ja,

³⁵ekakini jamberi jatandutauaka imechani engaksïni kurhunhejka.”[4]

³⁶“Mítetini jaueksï Israeli anapuecha, eska Jesusini engajtsï cháparhataka, Diósï újchakurasti ka Acha ústi.”

³⁷Ísï kurharinksï kánekua jáarhaspti ka Pédrunksï ka máteru Jesusiri uandakua párichanksï arhiaspti: — Tatecha, ¿Jucha nena jámaa?

³⁸Ka Pédru arhiaspti: — Diósïni andarhentsï je ka Jesukristuni jimbo itsï atajtsï je, ka k'amanharhintskuechantsï púamenhantaaka, ka Espiritu Sántuntsï p'iuaka.

³⁹Jimboka i, ima aiatsperakueska engajtsï cha ka chári uátsïticha ka iámendu engaksï iauani anapuecha aiamenhaka. Arhikuekasïndi, eska imecheriska enga juchari Acha Diósï uékaaka ioarhiani.

⁴⁰Pédru íni ambe ka uánekua ambeteru arhiaspti ka útasteru arhiaspti: — ¡Ásteru nósesi ireke jeia!

⁴¹Ka ima engaksï uandakuani kurhanguntapka, itsï atajtsïkunhasptiksï ka ima jurhiatekuaksï tanimu míli isï jakajkuticha jingunisptia.

⁴²Ka Jesusiri uandakua páricheri jurhentperakuanksï sési marhuatasïrempti, ka iámenduechaksï márku marhuataxapti ambe, t'ireni jámani ka uandamukukorheni jámani.

⁴³Iámenduechaksï ísku pákareratixapti, ka Jesusiri uandakua párichaksï uánekua míndechani ka k'éri ambeksï úsïrempti.

⁴⁴Ka ima engaksï jakajkupka májkuksï úkorhentatixapti, ka iámenduechaksï jatsikorhekua ambe márku marhuatasïrempti;

⁴⁵ambe engaksï xáni kángorhempka, atarantasïremptiksï ka ísïksï arhukuntasïrempti eskaksï nájku ambe uéntarhinchani jápiringa.

⁴⁶Mándani pauanksï tiósïo tángorhentasïrempti, ka k'umanchekuarhuecharhuksï kurhinda márku ústasïrempti, ka márkuksï t'iresïrempti tsípekua jinguni ka sési jásï mintsita jinguni.

⁴⁷Diósïnksï k'éri ambe arhiparini, ka iámenduechaksï sési erauasïrempti. Ka Acha mándani pauani uáneraaxapti imechani engaksï p'ímutantskorhepiringa.