Read Western Highland Purepecha Hechos 20 Bible Online

Hechos 20 - Western Highland Purepecha bible

Hechos 20

¹Enga pínasku janhapkia, Páblu jurhengorherichani ióarhiaspti ka uinhaperantaspti, uandanuantaaspti ka Masedonia ísï niraspti.

²Iápuru jimesï ísï jámaspti ka jakajkutichani mámaru arhiasïrempti jánhastaani; tátsekua Grésia niraspti.

³Ka tanimu kutsï jima pakaraspti. Enga icharhuta jimbo Síria nirani jámempkia, mítespti eskaksï judiuecha ambe úskukutixapka; jiájkani Masedonia ísï k'uanhatsentaspti.

⁴Ka pámbestiksï Sopateri Pirosï uájpa Bérea anapu ka Aristarku ka Sekundusï Tesalonika anapuecha; ka Gáiu Dérbe anapu; ka Timoteo ka Tíkiku ka Trófimusï Ásia anapuecha,

⁵Imaksï urhepaspti ka Troádesïjtsïni erokaxapti.

⁶Jucha Filipusï icharhutani jataspka, kurhinda no xarhipiti jukariri k'uínchekuarhu nimatiru, ka iúmu jurhiatekua jimbochi Troáde xéjperantaspka, ka iúmu tsimani jurhiatekuachi jima pakaraspka.

⁷Domingu jimbo engachi tángorhentatini jápka kurhinda arhukuni, Páblu enga pauandekua uérapiringa, tángorhentskuarhu uandaxetspexapti ka terujkani chúri jamberi jarhaspti uandaxekuani.

⁸Jima karhakua engachi jápka, uánekuaksï erajkutakuecha jarhaspti.

⁹Ka tumbi ma enga Eutiku arhinhempka k'umanchekuarhu uaxarhukuspti; enga Páblu ióskutantani jápka uandani, ima uarhixapti k'uinhchani, ka k'uíraspti ka k'umanchekuarhu iótakuarhu uératini uekorhentaspti. Ka uarhiriksï tarhatantaspti.

¹⁰Páblu kétsespti ka tumbini kápchakueraspti ka kamanharhitini uandaspti: — Ásï jama je chéni, tsípiti jarhasti.

¹¹Tátsekua karhantaspti; ka kurhindani arhukuspti ka arhani; ka chúngutaspti uandani erandepakua jamberi. Ka jiájkani kéndikuspti.

¹²Ka tumbinksï chéni jémbo tsípiti pántaspti ka imani jimboksï kánekua sési p'ikuarheraspti.

¹³Jucha icharhuta jimbo Aso urhepaspka nirani, jima engaksï Pábluni p'imapiringa; jimboka ima eratsespka eska xanharakorhepapiringa.

¹⁴Engajtsïni Aso andagupka, jucha jingunchi páspka ka Mitilenchi niáraspka.

¹⁵Pauandekuachi japundarhu parhimespka ka Kíosïchi niáraspka; ka pauandekuachi Sámosï andamukueraspka, ka Trogilionichi jamaspka ka pauandekuachi Míletusï niáraspka.

¹⁶Páblu eratsespti eskachi Éfesu nitamamapiringa, jimboka no uékasïrempka Ásia pakarerani. Jirejiresï niraxapti jimboka Jerusaleni sóntku niárakuekaxapka, eka jamberi úpiringa Pentekosiri k'uínchekuarhu jima nitamakorheni.

¹⁷Míletusï uératini Éfesu anapu arhijtsïkpirichani p'ijtajkorheaspti.

¹⁸Engaksï arhijtsïkpiricha niárapka, Páblu ahiaspti: — Chájtsï míteska ji na engani jámempka chánksïni jinguni, jiájkantki uératini engani Ásia niárapka,

¹⁹Achani kaxumbekua jinguni ka uekuatku marhuakuparini, ka na engani judiuechani jimbo xáni nósesi kánhantapka;

²⁰ka no jurajkuntaspka aianguntanksïni indeni ambe enga chári jimbo sési ambeka; k'uiripuni japarini ka k'umanchekuecharhuksïni arhijtsïkuni ka jurhendanksïni jarhasïrempka,

²¹judiuechani ka gríeguechani aianguantaani jarhasïrempka eskaksï Diósïni ka juchari Acha Jesusini jakajkupiringa.

²²Exejtsïni je iásï na engani uinhamu p'ikuarhenheni jaka Jerusaleni nikuekani, ka no jamberi míteska jini ambexamusïni úkorhenchaa;

²³imani k'óruni Espiritu Sántu jimbo mítetixaka, eskani mándani iretarhu ónhanhaaka ka eskani kánekua kómu nitamanchakorheaka.

²⁴K'óruni nauejkini ji uarhini, ji no p'amojkukorhesïnga, jini engani k'amaraaka jucheti ánchekorhetani, ka aiangpentani ambakiti aiangperakua enga Diósï kóntpejka, engarini Acha Jesusi míndaka.

²⁵Ka iásï, ji mítetixaka eskajtsïni nóteru exeakia cha engaksïni irechekuani arhijtsïkuka.

²⁶Jimboksïnisï iásï aianguntani jaka eskani ji nómbema míteska ekajtsï ambe ikimenhaska,

²⁷jimbokani ji no chéska Diósïri aiatsperakuanksïni sési aianguntani.

²⁸Jinguntku jáma je, ka tángorhekuani exeni ja je, engaksïni Espiritu Sántu karichi erangutini péraaka Diósïri tángorhekuani eranguni jarhani, enga uájperi iurhiri jimbo imerirakorheaka.

²⁹Ji mítetixaka jiájkani engani ji p'íkunhantaakia, jiuatsï ikimenharhichaksïni inchaakucheati engaksï karichichani k'amajkuauaka,

³⁰ka cha jamberijtsï máru jauaraaka ka nósesijtsï uandaaka nóna jurhengorherichani chúxatakorheani.

³¹Ísï jimbo, míani ja je eskaksïni tanimu uéxurhini chúrekua ka jurhiakua no jurajkuntaska uekuajku mándani arhinksï xukani jarhani.

³²Iásïksïni Diósïni ka imeri uandakua kóntperakuerini jimbo jurajkuxaka, enga uinhapekua jatsika uinhaperantanksïni, ka iámendu erakukatechani jingunksïni íntskuni ambe engaksïni míndachetini jatsipka.

³³Ji nónemani taiaka ka tiripiti ka xukuparhakua tsitikuspka.

³⁴Chájtsï mítetixaka eskani ji ánchekorhekorheska ka jucheti pámpirichantuni ambe íntsaaska.

³⁵Iámendu ambe jimboksïni jurhendaska eska ísïska, eskajtsï ánchekorheparinisï kómu jándichani jarhuatauaka, ka eska k'uanisïnga méntki ísï Acha Jesusiri uandakuechani míauani jarhani enga uandapka: Sánderu tsípekuesti íntspeni eska intsïnhani

³⁶Íni ambe uandarini tinguixurhispti ka iámendu imecha jinguni uandamukukorhespti.

³⁷Ka iámenduechaksï jurajkutakorhentaspti uerani ka Páblunksï kamapchakusti ka putinharhikusïremptiksï

³⁸enga Páblu arhiapka eskaksï nóteru méni exepiringia, kánekuaksï kómu jánharhintaspti. Ka nirasptiksï icharhutarhu jamberi pambetani.