Read Western Highland Purepecha Hechos 25 Bible Online

Hechos 25 - Western Highland Purepecha bible

Hechos 25

¹Enga Féstu Sesarea niárapka Jerusaleni karhamaspti.

²Ka tátecheri urhejtsïkuricha ka judiuecheri achamasïchaksï niraspti Páblueri ambe k'amanharhintantani,

³ka kómarhisptiksï eska Pábluni Jerusaleni pápiringa sáni, ka imaksï xanhari jimbo úskutixapti Pábluni atani.

⁴K'óru Féstu arhiantaaspti eskaksï Pábluni jatsipiringa Sesarea jatsini, ka eska ima uéraxamempkia jini nirani.

⁵Féstu uandaspti: “Kétsemeksï máru chári urhejtsïkuricha jíndeni jinguni, ka enga ima acheti k'amarhintstika, jinijtsï arhinharhikuaka.”

⁶Enga iúmu taminu jurhiatekua o témbeni jurhiata ísï Jerusaleni jápka, Sesarea kétsemaspti ka pauandekua útatsperakuarhu uaxakaspti ka Pábluni p'itajkorhespti.

⁷Enga Páblu niárapka judiuecha engaksï Jerusaleni uératini kétsemapka uirhipkurhapasptiksï, uánekua ambe ka nósesi ambeksï arhiparhataxapti ka nóksï úsïrempti xarhatani eska ísïspka.

⁸Ka Páblu mókukorhesïrempti: “Ji judiuecheri juramukuani no k'amanharhikuntaska ka níjtu k'éri tiósïoni ka níjtuni Sésarini k'amanharhikuntsï.”

⁹K'óru Féstu enga judiuechani sési uékempka pakarakuani, Pábluni kurhamarhespti: “¿Uékasïnkiri Jerusaleni karhamani ka eskakini ji jini k'amanharhirantaaka?”

¹⁰Ka Páblu mókuntaspti: Ji Sésariri útatsperakuarhu jarhaska, ixusïni k'amanharhitanhantaaka. Ji judiuechani nómbe ma nósesi úkuaska, t'úri sési mítetixaka.

¹¹Engani ji ónhakata jaka jimbokani ambe ma k'amanharhintaka ka uándikukueni, ji nómbe ma uandakorhesïnga; k'óru nórini úaka intsïnharhitpentani indeni ambe jimbo engajtsïni k'amanharhirantani jaka engaksï no újka xarhatani eska ísïska. Ji ísï kurhajkorhexaka eskarini Sésari útacheaka.

¹²Jiájkani Féstu imeri arhistatspirichani kurhamarheaspti ka tátsekua mókuntaspti: “Sésari jingundi níkuekaxaka, ka Sésari jingundi niuaka.”

¹³Tátsekua namuni jurhiatekua jimbo, irecha Agripa témba Bérenise jingunksï Sesarea niraspti Féstuni p'urhembeni.

¹⁴Ka jimbokaksï ima sáni ióni jima pakarapiringa, Féstu irechani Páblueri ambe aianguntaspti: “Xu jurhasti acheti ma, arhispti, enga Féliksï ónhatini jurajkuka.

¹⁵Ka jiájkani engani ji Jerusaleni karhamapka, tátecheri urhejtsïkuricha ka judio anapu achamasïchajtsïni kurhachexapti eskani k'amanharhirantapiringa.

¹⁶Ka ji arhiaspka eskaksï Róma anapuecha no p'indeska intsïnharhitpeni, eka k'amanharhintsti no mókukuantauaka imechani engaksï k'amanharhitantani jauaka.

¹⁷Imaksï ixu jíndeni jinguni jurhaspti, ka pauandekua útatsperakuarhu uaxakaspka ka imani achetini p'itajkorhespka.

¹⁸Imaksï jurhaspti engaksï k'amarhitantani jápka, ka nómbemaksï k'óru arhispti nósesi ambe engani ji eranhaskani jápka;

¹⁹indecheri jakajkukueri arhirperata ambejkuksïsï uandani jápti, ka achetiri ma engaksï Jesusi arhimpka, enga uarhikia ka enga Páblu uandajka eska tsípiti jarhaska.

²⁰Ji íni ambe no jánhaskeraspka ka arhispka: ¿Niuari Jerusaleni, ka eskakini íni ambe jini k'amanharhitantaaka?

²¹Ka jimboka Páblu uandakorhespka eska imeri ambeksï Sésarini jurajkukupiringa néna enga ima eratsepiringa, juramuspka eskaksï kuáni japiringa ekani jamberi Sésari jinguni axapiringa.”

²²Agripa Féstuni arhispti: “Jíjtuni úekapiringa imani achetini kurhajchani.” Ka Féstu arhintaspti “Pauandi kurhajchaaka.”

²³Pauandekuaksï Agripa Bérenise jinguni sési xukuparhantatini útatsperakuarhu inchaspti k'éri p'urhejkutichani jinguni ka iretarhu anapu achamasïchani jinguni. Enga Féstu juramupka, Páblunksï incharaspti.

²⁴Ka Féstu uandaspti: “Irecha Agripa ka iámendu engajtsï ixu jaka; xéxakajtsï íni achetini engaksï uánekua judiuecha juka ísï eskaksï Jerusaleni na tángorhentapka uinhachaparini eska uándikukueska.

²⁵Ji jánhaskaspka eska nómbe ma úspka enga jimbo jukanchapka uándikunhani; ka jimboka inde uandakorheska eska Sésari k'amanharhitantaaka, ji eratseskia ima jinguni axani.

²⁶No jánhaskasïnga íni achetiri ambe, Sésarini ambesïni karakuaa; jimboksïnisï chánksïni juácheka, ka sánderu sáni chánksïnimendu ireche Agripa, jimbokani uékaxaka míteni, engajtsï ambe kurhamarheakia ji jánhaskaaka ambesïni karaa.

²⁷Ji nósesi xésïnga ónhakatani ma axani no karaparini ambeksïsï xáni arhiparhatani jáki.”