Read Western Highland Purepecha Hechos 27 Bible Online

Hechos 27 - Western Highland Purepecha bible

Hechos 27

¹Enga eratsenhapkia eskajtsïni icharhuta jimbo Italia axapiringa, Pábluni ka máteru ónhakatechanksï p'urhejkuti urhejtsïkurinksï jurajkukuaspti enga Júlio arhinhempka, ima Augustueri kúngorhekuarhu jámasïrempti.

²Ka Adamitrio anapu máchi icharhutani jataspka, enga Ásia andamukuerapiringa, ka parhimespkachi. Aristarku Tesalonika anapu, enga Masedonia jaka, jucha jinguni jámaxapti.

³Ka pauandekuachi Sidoni niáraspka. Júlio Pábluni kánekua sési kámaspti ka jurajkuspti pámpiri jémbechani p'urhembeani ka eskaksï ima sáni exeni jápiringa.

⁴Jima uératinichi Chípre andamukueraspka, jimbachi jarhaspka erokorheni jimbokajtsïni tarhiata k'uanhaskuntasïrempka.

⁵Ka Silisia ka Panfilia anapu japundecharhuchi parhimespka ka témbeni iúmu jurhiatekua jimbochi Míra niáraspka enga Silisia jaka.

⁶P'urhejkuti jima xéntaspti icharhutani ma, Alejandria anapu ma, enga Italia nirempka, ka jatsirasptijtsïni.

⁷Sáni ióni, icharhuta kánekua iatsitapasti ka kánekuachi ióndaspka Knído andaparhakuerani. Ka jimbokajtsïni tarhiata no jurajkuspka andamukuerani, Salmunachi niraspka ka Krétachi uanondarheska jimesï enga no tarhiauempka;

⁸ka kánekua úkua jingunchi andamukueraspka jima enga Ambakiti niárantskua arhinhajka, jimajku enga k'éri ireta Lásea jaka.

⁹Sáni iónisptia ka kánekua úkua jukasti icharhuta jimbo nirani, ka k'arhinda jakueri k'uínchekua t'uíni nitamasptia. Ka Páblu arhiaxapti:

¹⁰Pámpiricha, xéxaka eskachi kánekua úkua jinguni parhimeaka, no icharhutajkusï uekameati, iámu ambe enga xáni jatarini jakajtu uekameati, juchachi jamberi uarhimeaka.

¹¹K'óru p'urhejkuti urhejtsïkuri Pábluni no kurhajchaspti, imani enga icharhutani páni jápka ka enga icharhutani kámempka sánderu kurhajchaaxapti.

¹²Ka jimboka jima no iauantskua nitamakorhekuespka, iámenduechaksï eratsespti jima uératini Fenisia niárani, máteru ireta Kréta anapu, enga jimajku no iauani karhakua jápka, ka iauantskuani jima erokorheni.

¹³No uinhamu tarhiaxapti karhamani ísï, ka eratsesptiksï eskaksï úpiringa nirani, p'ímantaasptiksï icharhuta p'íngutarakuechani ka Krétaksï uanondarhespti.

¹⁴K'óru jimajku akuitse janikua ma úkorhespti enga ómekuarhu uératini kétsemupka.

¹⁵Icharhutani páspti, ka nóchi úspka icharhutani p'ínguni, ka tarhiatajtsïni páspti.

¹⁶Ka tarhiatajtsïni máteru ómekuarhu andamuteraspti enga Kaúda arhinhempka ka jimachi kánekua úkua jinguni icharhuta sapichuni tarhatantaspka.

¹⁷Engachi karhatantapkia, icharhutanksï kánekua sïndari jójchukuspti jimboka úpiringa kutsarirhu pisijchuni, p'ikuntarakuanksï tarhatantaspti ka jurajkusptiksï eska tarhiata pápiringa.

¹⁸Ka jimboka sánderu uinhamu tarhiaxapka, pauandekuaksï icharhutarhu ambe petanhaspti.

¹⁹Tanimu jurhiatekua jimboksï iámendu ambe engaksï icharhutarhu úrempka késkuspti.

²⁰Ióni tata jurhiata ka jóskuechaksï no xarhanchespti; jimboka kánekua nósesi janixapka engachi jamberi nóteru eranhaskempkia eskachi tsípiti uémentapiringa.

²¹Sánchi ióni nóteru t'irespkia, Páblu jauaraspti ka iámenduechani arhiaspti: Erachicha, sési japiringachi engajtsïni Krétatki kurhajchapiringa, íni ambejtsï no nitamanchakorhepiringa ka xáni uánekua ambejtsï no ambendarhepiringa.

²²Iásïksïni arhixaka eskajtsï uinhapentaaka; nónema uarhiati, icharhutajkusï xerekorhentaati.

²³Íni chúrekuarini Diósïri ánjeli ma xarhachesti, ima engarini p'ímutantaka ka engani k'éri ambe arhijka,

²⁴ka arhistirini: “Páblu ásï jama chéni, Sésari jingundi niuaka, exe Diósï t'úngeni jimbo k'uajchakuauati iámenduechani engajtsï icharhutani jatapani jaka.

²⁵Ísï jimbo pámpiricha ásï che je, ji Diósïni mintsikaxaka ambe engarini arhika.

²⁶Ómekuarhu ma isïchi niareraaka.”

²⁷Témbeni t'ámu jurhiakuajtsïni itsï Adriatiku ísï páxapti ka terujkani chúri isïksï p'ikuarhetsespti echerirhu andamukuerani jarhani.

²⁸Ts'ématakuanksï inchamaspti ka xésptiksï eska tanimu ekuatse ka iúmu tsimani ióxurhakua jauamespka, sántku urhepatinksï ménderu ts'éretakuani inchamaspti ka xésptiksï eska ma ekuatse ka iúmu tsimani ióxurhakua jauamespka.

²⁹Chéxaptiksï jimbokachi úpiringa k'erandarhu ma uásarhentani, icharhutarhu tatsepani t'ámu p'íngutarakuechanksï k'uanimaaspti, ka kómarhaxaptiksï eska sóntku erandepiringa.

³⁰Ima engaksï icharhutarhu ánchekorhempka kétsekuekaxapti, ka icharhuta sapichu máksï késkuxapti, arhimetaparinksï eskaksï urhepantu p'ingutarakua jatsirhukuxamempka.

³¹K'óru Páblu p'urhejkuti urhejtsïkurini ka p'urhejkutichani arhiaspti: “Engaksï inde no icharhutarhu pakaraska, chájtujtsï ixu uarhimeaka.”

³²Jimajkanksï p'urhejkuticha sïndarichani kachukuaspti enga icharhutani késkuni jápka, ka icharhuta uékamespti.

³³Engaksï erokorheni jápka eska erandepiringa, Páblu iámenduechani arhiaspti eskaksï t'irepiringia arhiaparini: “Témbeni t'ámu jurhiakuestia engajtsï nóteru ambe ma akaia erokorheparini nenaxamu jánhaskorhea.

³⁴Ísï jimboksïnisï arhini jáka eskajtsï ambe atsïkorheaka, chári sési jimboesti; jimboka nónema ambe ma úkorhenchaaka.”

³⁵Íni ambe uandarini k'urhinda ma p'ikuspti, ka iámenduechani japarini Diósïni diósïmaiamukua arhintaspti ka arhukuspti ka arhaspti.

³⁶Jiájkanksï iámenduecha tsípentaspti ka t'iresptiksï.

³⁷Engachi icharhutarhu jámani jápka témbeni tanimu ekuatse ka témbeni kuímu (276) ísïspkachi.

³⁸Engaksï iámenduecha sési t'irepkia, tríjuksï japundarhu k'uanimaspti jimbokaksï uékasïrempka eska icharhuta nóteru xáni k'uetsapepiringa.

³⁹Ka enga erandepka, icharhuta párichaksï no miiuntaspti; ka eraasptiksï eska inchandikutini ambandespka andamukuerani, ka icharhutanksï jima andanditerakuekaxapti.

⁴⁰Icharhuta p'ingutarakuechanksï japundarhu jurajkuaspti, ka kuntsïkutarakuanksï kueratakuspti. Ka takusïksï karhatantaspti jirinhakutani eska tarhiata uémantaapiringa.

⁴¹K'óru icharhuta kutsarindu inchatseraspti, ka jima atarhutakorhespti, urhepani inchatseraspti, ka tátsepani nósesi kúskantaxapti jenguerakuechani jimbo xerejchuntani.

⁴²Jiájkanksï p'urhejkuticha eratsespti ónhakatechani uándikuani, jimbokaksï máru úpiringa xarhiameparini sïpakorheni;

⁴³k'óru p'urhejkuti enga Pábluni kuájpeni jápka no jurajkuaspti ka juramuspti eskaksï ima engaksï jurhenapka xarhiameni urhetku k'uanimepiringa ka urhetkuksï uémentani;

⁴⁴ka eskaksï máruteruecha k'érati k'erericha jimbo uémentapiringa. Ísïchi iámenduecha tsípiti uémentaspka.