Read Western Highland Purepecha Hechos 28 Bible Online

Hechos 28 - Western Highland Purepecha bible

Hechos 28

¹Engachi uémentapkia, mítespkachi eska ima ómekua Málta arhinhasïrempka.

²Ka ómekuarhu anapuechajtsïni kánekua sési kámaspti; ka k'éri máksï kurhikaspti jimboka janixapka ka tsirakorheni jarhani, ka sésijtsïni erokaspti.

³Páblu ma kununharhikua chkári k'arhiri tánantaspti; ka enga k'uanijpani jámempka, akuitse ma enga chpíri jimbo sïpakorheni jápka Pábluni mápkuspti.

⁴Engaksï ómekuarhu anapuecha Pábluni erajkupka arhijperasptiksï, “I acheti uándikpiti ambeti; tsípiti uémentasti, k'óru ikimekata jarhasti ka uarhiati.”

⁵K'óru Páblu akuitseni chpírirhu uauajkurhaspti ka nómbe ma úkorhenchaspti.

⁶Imaksï erokorhexapti eska k'úpiringa o eska mátirku uarhipiringa; ka erokatinksï ka exerinksï eska nómbe ma úkorhenchaspka, ménderuenksï eratsespti ka uénasptiksï uandani eska Diósï méspka.

⁷Jima no iauani, ómekuarhu anapu urhejtsïkuri ma enga Publio arhinhempka, echerichani máru kángorheasïrempti, imajtsïni sési erokaspti ka tanimu jurhiatekuajtsïni chéni jémbo pakataspti.

⁸Ka Publioeri tátjemba apondikuspti jimboka pákua p'iraska ka tinharani jarhani. Páblu inchaspti exeni, ka kómarhijpekuspti, ka p'ájtsïkuspti ka ima ambakerantaspti.

⁹Íni jimboksï máteru engaksï ómekuarhu p'amenchani jápka, Páblu jingunksï niraspti ka ambakeranhantasptiksï.

¹⁰Ka kánekuajtsïni sési kámaspti ka uánekua ambejtsïni intsïmbespti engachi pákorhepiringa.

¹¹Tanimu kutsï jimbochi Alejandria anapu icharhuta ma jimbo niraspka, enga iauantskuani jima nitamapka, ka icharhuta tsimani diósïchani jukarhuaspti.

¹²Sirakusachi niáraspka ka tanimu jurhiatekuachi jima pakaraspka.

¹³Jima uératinichi nipaska ka Réjiochi niáraspka. Ka pauandekua k'arhamani ísï tarhiaxapti ka tsimani jurhia jimbo Puteolichi niáraspka.

¹⁴Máru erachichanchi jima xéantaaspka ka kánekuachi sési p'ikuarheraspka, ka iúmu tsimani jurhia imecha jingunchi pakaraspka. Ka tátsekuachi Róma niáraspka.

¹⁵Engaksï erachicha mítetini eskani jucha niáraspkia, Apio kópekuarhu jamberijtsïni niraspti kúmani, jima engaksï tanimu jájkorhekuecha jaka. Páblu exearini, Diósïni diósïmaiamukua arhintaspti ka tsípentaspti.

¹⁶Engachi Róma inchaakupka, Páblunksï jurajkuspti k'umanchekuarhu ma jarhani p'urhejkuti ma jinguni enga exeni japiringa.

¹⁷Tanimu jurhiatekua jimbo, Páblu judio urhejtsïkurichani uandajpatarkorheaspti. Ka engaksï ima tángorhentapka, Páblu arhiaspti: — Erachicha, ji nómbe ma nósesi úkuska jucheti iretani, níjtu juchari tátecheri p'indekuani nósesi úku, Jerusalentsïni jupikaspti ka Róma anapuechantsïni intsïnharhitaspti,

¹⁸imajtsïni mámaru ambe kurhamarhesti ka jurajkukuekaxaptia jimbokajtsïni nómbe ma xénhchentaspka engani jimbo uandikunhapiringa.

¹⁹Ka jimbokaksï judiuecha no jiókorhempka, ji uandakorhespka eskarini Sésari arhinharhikupiringa, no jimbokani Sésarini jucheti ireteri ambe uékani jáka aianguni.

²⁰Íni ambe jimboksïnisï ióarhika, exekuekaxapkaksïni ka aiangukorhenksïni, nóchkani ji imani jimbosïni jójkukata jaki andi enga Israeli erokorheni jáka.

²¹Ka imaksï arhintaspti: — Jucha Judea uératini nóma karakata intsïnhantaska enga chéti ambe arhijka, ka no ma erachi engaksï ixu janoka aianguntasti nósesi ambe chéti ambe.

²²K'óruksïni kurhajchakuekaxaka ambe engari eratsejka, nóchkani jucha imani jakajkua arhujtateri mítetixaki andi eska iápuru isï imeri ambe nósesi uandanhaxaka.

²³Ka pakatperasptiksï eskaksï ma jurhiatekua tángorhentapiringa ka ima jurhia uánekuaksï niáraspti jima enga Páblu jájkuarheni jápka. Ka Páblu chúskutaspti Diósïri irechekueri ambe aianguantaani, ka Jesusiri ambe jajkutakutaraani uékaaxapti, Moisesiri juramukuani ka Diósïri uandaricheri karakatani arhiantaaparini.

²⁴Máruksï Pábluni kurhajchatini jakajkuspti,

²⁵ka máruksï no jakajkuspti, ka engaksï no úpka teruatperani níntaxaptiksïa, jiájkani Páblu índerku arhiaspti: “Jimbochkasï Espiritu Sántu juchari tátechani Diósïri uandari Isaiasïni jimbo uandapti

²⁶arhiaparini: Ni íni iretani arhini: Sésiri kurhauaka, k'óruri no kurhanguaka, sésiri éskani jauaka, k'óruri no exeaka.

²⁷Jimboka i ireta mintsitani chuperaska, nóksï úekasïndi kurhani, ka nóksï uékasïndi exeni; ásïksï exee ka kurhaanksï ka mintsita jingunksï kurhanguni ka móantanksï ka ji ambakerantaani.”

²⁸Mítetini jáchka je eska i Diósïri p'ímutantskua no judiuechasï axamenhaka; imaksï k'óru kurhauati.

²⁹[Engani íni ambe arhiapka judiuechaksï níntaspti mámaru ambeksï arhijperapantani.]

³⁰Páblu tsimani uéxurhini k'umanchekuarhu ma jarhaspti enga kuámpepka ka iámendu eroasïrempti engaksï p'urhembempka.

³¹Diósïri irechekueri ambe uandantasïrempti ka Acha Jesusiri ambe jurhentpesïrempti jarhamekua jinguni, ka nónema ambe arhini jarhasïrempti.