Read Western Highland Purepecha Hechos 4 Bible Online

Hechos 4 - Western Highland Purepecha bible

Hechos 4

¹Engaksï Pédru Juánu jinguni uandaxetspeni jápkateru, tátechaksï saduseuecha jinguni ka k'éri tiósïo anapu purhejkuti jingunksï andarheraaspti,

²ka ikiaxaptiksï engaksï Pédru Juánu jinguni jurhentpeni jápka ka aiangpenksï járhani eska Jesusi tsíntaspka.

³Ka jupiasptiksï ka pauandekuarhu jamberiksï ónhaaspti, jimboka ióndakuarhuespkia.

⁴Ka uánekuaksï jakajkuspti engaksï aiangperakuani kurhapka: Iúmu míli acheticha ísïsptiksï.

⁵Pauandekua engaksï Jerusaleni tángorhentapka iretarhu anapu urhejtsïkuricha ka achamasïcha ka juramukua jurhentpiricha,

⁶ka ístu k'éri táta Anasi, ka Kaifasi ka Juanu ka Alejandru ka iámendu engaksï tátecha jingunika.

⁷Terujkanksï péraspti ka kurhamarheasptiksï: — ¿Néksïni uinhapekua íntskuski o néri jakangurhikua jimbojtsï ísï úski?

⁸Jiájkani Pédru, Espiritu Sántuni uinirhekorhetini arhiaspti: — Iretarhu anapu urhejtsïkuricha, ka Israeli anapu tatecha:

⁹Iásï engachi kurhamarhenhani jáka néna enga p'amenchati ambakentaka,

¹⁰mítetini ja je cha ka iámendu Israeli anapuecha, eska Jesusi Nasareti anapueri jakangurhikua jimboeska, ima engajtsï cháparhata ka enga Diósï tsítantaka, imani jimbo i acheti ambakentasti ka cha jinguni ixu jarhasti.

¹¹Jesusi ima tsakapuesti engajtsï cha tsïntsïricha no jaiapanhentaka, enga iásï pítsekuekia.

¹²Ka nóteru nema jinguni p'ímutantskorhenhasïndi, jimboka Diósï nóteru nemani íntspeska engachi jimbo úaka p'ímutantskorheni.

¹³Engaksï juramuticha Pédruni ka Juánuni kurhajchaapka eskaksï jarhamekua jinguni uandaspka, ka eskaksï no sïranda arhirispka níksï jánhaskatini, ískuksï pakareraspti eratsentani ka míteantaasptiksï eskaksï Jesusi jinguni jámsïrempka.

¹⁴Ka achetinksï exerini enga ambakeranhantapka ka enga anhaxurhitini jápka imecha jinguni, nóteruksï ambe ma úspti arhiparhataani.

¹⁵Jiájkanksï tángorhekuarhu petarkorheantaaspti ka mámaru ambeksï

¹⁶arhijperaxapti: — ¿Nénachi káua íni achetichani? Jerusaleni anapuechaksï xésti eskaksï k'éri mínda xarhatakuaska, ka nóchi úaka no jiókorheni.

¹⁷Eska nóteru i ambe iretarhu uandanhani jáuakateru, ju je chéraani ka ásteruksï nemani ambe arhi óksï Jesusiri jakangurhikua jimbo jurhentpeni.

¹⁸Ka uandajpantaasptiksï ka juramukuasptiksï eskaksï nóteru jámapiringa Jesusiri jakangurhikua jimbo uandani ka jurhentpeni.

¹⁹Ka Pédru Juánu jingunksï mókukuantaaspti: Kurhamarhekorhe je, ¿Diósïni jáparini, sési jaki chánksïni kurhajchani o Diósïni?

²⁰Jimbokani jucha no úaka no uandantani indeni ambe engachi jucha xékorheka ka kurhaakorhenchi.

²¹Ka ménderuksï chéraani uékaspti, jurajkuasptiksï, ka nónanimaru jimboksï úspti úmarheani, iretani jimbo, jimbokaksï iámenduecha k'éri ambe arhisïrempka Diósïni imani ambe jimbo enga úkorhepka.

²²Jimboka ima acheti enga mínda jimbo ambakeranhantapka, jukari tsimani ekuatse uéxurhini jatirispkia.

²³Engaksï Pédru Juánuni jinguni jurajkunhapka, pámpiri jémbechanksï jingunksï niántaspti ka iámendu ambeksï aianguantaaspti ambe engaksï k'éri tátecha ka achamasïchaksï arhiapka.

²⁴Ka imaksï kurhajchaatini, májku k'éri uinhachaspti Diósïni arhini: “Acha xáni k'éri, t'úeskari Diósï engari auandani ka parhakpenini kueraaka, k'éri japundani ka engateru xáni ambe jima jáka;

²⁵engari chéti jántspiri Dabidi jimbo uandaka: ¿Andisï xáni méntku ísï jánhki, iretechaksï andisï xáni ísku ambe eratsejki?

²⁶Kúngorhekuntastiksï Diósïni parhakpeni anapu irechecha ka juramuticha, imeri Erakukatani no kurhajchani.”

²⁷“Ka sési jimboksï íni iretarhu, Erodesi ka Pónsio Pilatu no judiuecha ka Israeli anapuecha jinguni chéti erakukatani kungorhekuntaspti; jántspiri Jesusini engari t'u újchakuraka,

²⁸ka ísï jámanksï ústi, engari t'u eratsetini jápka chéti mímixekua jimbo eska úkorhepiringa.

²⁹Iásï Acha, exe ambe engaksïni xáni ambe arhijka, ka sésikua íntsaa chéti jántspirichani eskaksï chéti uandakuani jarhamekua jinguni uandantaaka.

³⁰Xárhata chéti uinhapekuani p'amenchatichani ambakerantaatini ka míndechani ka milagruechani ambe úaparini, chéti erakukata jántspiri Jesusiri jakangurhikua jimbo.”

³¹Engaksï Diósïni kómarhipkia, jenchespti jima engaksï tángorhentatini jápka, ka iámendu jakajkutichaksï Espiritu Sántuni uinirhekorhespti ka jarhamekua jingunksï Diósïri uandakuani uandantasïrempti.

³²Xánksï uánespti engaksï jakajkupka, májku mintsita jinguniksï jarhaspti, ka májku p'ikuarhenhekua jinguni. Nónema no uinhaasïrempti jatsikorhekua ambe, iámendu ambe iámenduecherispti.

³³Ka Jesusiri uandakua párichaksï kánekua uinhapekua jinguni, Acha Jesusiri tsíntskuani uandantasïrempti, ka Diósï kánekua újchakuraasïrempti.

³⁴Imechani jinguni nónema kómu nitamanchakorhesïrempti, jimbokaksï ima enga ambe kángorhempka óksï k'umanchekua ambe jatsikorheni, atarantasïremptiksï ka andakuanksï,

³⁵Jesusiri uandakua párichanksï íntsasïrempti. Ka eskamendu na uétarhechanhani japiringa ísï arhukunhasïrempti.

³⁶Jiájkani Jose, enga Lebiri sïruku jémbepka ka Chípre ómekuarhu anapueni, engaksï Jesusiri uandakua páricha Bernabe arhimpka (enga arhikuekajka “Karhuakpiri”),

³⁷echeri ma kángorhesïrempti ka atarantaspti ka tuminani Jesusiri uandakua párichani íntsaspti.