Read Western Highland Purepecha Hechos 8 Bible Online

Hechos 8 - Western Highland Purepecha bible

Hechos 8

¹Ka Sáulu exexapti néna engaksï uándikuni jápka. Imani jurhiatekuaksï Jerusaleni anapu jakajkutichanksï andaguani káaspti, ka iámenduksï Judea ka Samaria ísï etsakorhespti, k'óruksï Jesusiri uandakua páricha no sïpakorhespti.

²Máruksï acheti p'amojkujpiticha Estebanunksï pántaspti jatsintani, ka kánekuaksï uekuxapti.

³Ka Sáulu kánekua nósesi káasïrempti jakajkutichani; inchapusïrempti ka achetichani ka uarhitichani antsikuasïrempti petaani ka ónhaatarkorheasïrempti.

⁴Ka ima engaksï etsakurhitini jámani jápka iápuru ísïksï ambakiti aiangperakuani uandantapaxapti.

⁵Felipe Samaria kétsemaspti ka Krístueri ambe jima arhijtsïkpespti.

⁶Ka iámenduechaksï májku k'éri kurhasïrempti ambe enga Felipe uandempka, ka xésptiksï míndechani enga ima úempka,

⁷uánekua engaksï nósesi jarhati espirituecha incharhiatini jápka, nósesi járhatichaksï uinhachaparini uérheantasïrempti, ka uánekuaksï chkéjchuecha ka renhejtechaksï ambakentaspti.

⁸Ka imani iretarhu kánekua tsípenhaxapti.

⁹Ka imani iretarhu irekaxapti acheti ma enga Simoni arhinhempka, ima sïkuajperakua ambe úsïrempti, ka Samaria ióni tandojchpesptia k'éri ambe eratakorheparini.

¹⁰Imanksï k'ératicha ka sapirhaticha kánekua kurhajchasïrempti ka uandasïremptiksï: “I uinhapekua Diósï k'ériristi.”

¹¹Ka jinguntkuksï jarhasïrempti exeni ambe enga ima úpiringa, jimboka sïkuajperata ambe jinguni ióni tándojchaatixapkia.

¹²Ka engaksï Felipeni jakajkukupka enga ambakiti aiangperakuani uandantempka Diósïri irechekueri ka Jesukristueri jakangurhikuani, acheticha ka uarhitichaksï itsï atajtsïsïrempti.

¹³Ka Simonijtu jakajkuspti, ka itsï atajtsïspti ka méntku Felipe jinguni jámani jarhasïrempti; ka xérini míndechani enga Felipe úempka ísku pakarerasïrempti.

¹⁴Ka Jesusiri uandakua páricha engaksï Jerusaleni jápka, engaksï kurhajchpepka eskaksï Samaria ísï anapuecha jiókorhespka Diósïri aiangperakuani, Pédruni ka Juánunksï axakuaspti.

¹⁵Ka engaksï ima niárapka, kómarhijpekuasptiksï eskaksï Espiritu Sántuni p'ipiringa.

¹⁶Jimbokaksï ima Espiritu Sántuni nótki p'iraxapka, jinijkuksïsï Jesusiri jakangurhikua jimbo itsï atajtsïtini jáptia.

¹⁷Ka p'ájtsïkuasïrempti ka imaksï Espiritu Sántuni p'irasïrempti.

¹⁸Ka Simoni exerini eska Espiritu Sántu p'inhaxapka engaksï Jesusiri uandakua páricha p'ájtsïkuauempka, tumina aiakuaspti,

¹⁹arhiaparini: — Íntskujtsïni jíndentu indeni uinhapekua, eska néuejkini engani ji p'ájtsïkuaka, eska imajtu Espiritu Sántuni p'iuaka.

²⁰Jiájkani Pédru arhispti: — ¡Kéndikuchejtsïni chéti tumina jinguni! Jimbokari eratseska eska Diósïri intsïmperakua tumina jimbo p'inhasïnga.

²¹T'úri no sésekua jatsiska juchantsïni jingunini, jimbokari Diósïni jánhekusïnga.

²²Móantsï ambe engari nósesi p'ikuarhenhejka, ka Diósïni kómarhikorhe, nándikari ambe púamenhantaaka indeni engari nósesi p'ikuarhenhejka,

²³jimbokakini nósesi ambejku exechexaka engakini kájtsijkutini jaka.

²⁴Ka Simoni uandaspti: — Achantsïni cha kómarhiche je, eskani nómbe ma ísï úkorhenchaaka eskajtsïni na arhini jáka.

²⁵Ka engaksï ima Acheri uandakuani uandantapkia, Jerusalenksï kuanhatsentaspti, ka uápuru iretecharhu engaksï Samaria ísï jaka ambakiti aiangperakuani uandantaspti.

²⁶Tátsekua Acheri ánjeli ma Felipeni arhispti: “Jauara ka kétsemani isï ni, imani xanhari jimbo enga Jerusaleni uératini Gása kétsemajka, enga jimesï nitamajka enga nónema irekaka.”

²⁷Ka Felipe niraspti. Ka jimesï isï níntaxapti Etiopia anapu ma, enga nana irecha Etiopia anapueri tumina patsaripka, enga Jerusaleni nípka Diósïni k'éri ambe arhini.

²⁸Ima Diósïri uandari Isaiasïri karakatani arhipantaxapti.

²⁹Ka Espiritu Felipeni arhispti: “Andangu indeni enga inde jatapantani jáka.”

³⁰Ka enga Felipe andanguni jápka, kurhajchaspti eska Diósïri uandari Isaiasïri karakatani arhipantaxapka ka arhispti: — ¿Jánhaskaxakiri ambe engari arhintani jáka?

³¹Ka ima arhispti: — ¿Nénajtuni jánhaskaa, engarini nónema sáni jánhastajka? Ka kómarhispti Felipeni eska ima jinguni jatapiringa.

³²Ka ima arhintaxapti jima enga arhijka: “Karichini pánhasti uándikunhani, ísï eska karichi ma enga no mintsirajka enga kuinanhani janhajka, ísïmendu no mintsiraspti.

³³Ka enga xáni nósesi kánhani jápka, nónema kuájpentaspti: ¿Né ua sïrukua jémberi ambe uandantani? Jimboka parhakpeni tsípekua euanhantaska.”

³⁴Ka Etiopia anapu Felipeni arhispti: — Kómuarhixakakini, arhirini: ¿Diósïri uandari ixu néri ambesï arhijki; imasï arhikorheni jaki o máteru nemerisï uandajki?

³⁵Jiájkani Felipe ménderu uéntaspti jima arhintani, ka Jesusiri ambakiti aiangperakuani aianguntaspti.

³⁶Ka itsïarhu máksï jamaspti, ka nana irecheri tumina patsari k'éri, arhispti: — Ixu itsï jatasti, ¿Ambe jimbo ji no ua itsï atajtsïni?

³⁷[Ka Felipe uandaspti: — Engari mintsita jinguni jakajkujka, úakari. Ka ima arhintaspti: — Jakajkusïnga eska Jesukristu Diósï Uájpeska.]

³⁸Anhaxustarkorhespti imani enga jatapantani jápka, ka tsimarhenksï itsïrhu kémespti ka Felipe itsï atajtsïkuspti.

³⁹Engaksï uémentani jápka Acheri Espiritu Felipeni kénditaspti, ka jántspiri Felipeni nóretu exesptia ka kánekua tsípepantaspti.

⁴⁰Ka Felipe Asoto iretarhu xarhantaspti, ka ambakiti aiangperakuani arhijtsïkpepaspti iámendu iretecharhu enga jamberi Sesarea niárerapka.