Read Western Highland Purepecha Hechos 9 Bible Online

Hechos 9 - Western Highland Purepecha bible

Hechos 9

¹Sáulu Acheri jurhengorherichani xáni kurhunheani útasï uandikukuekaxaptiteru. Ísï jimbosï táta k'érini jinguni nípti,

²ka arhispti eska karakatechani úkuapiringa enga k'umanchekua tángorhentskua Damasku anapuechani pákuapiringa, ka ísï úni jupiani ka Jerusaleni k'uanhaskuantaani achetichani ka uarhitichani engaksï jimbanhe xanharini chúxapani jápkia.

³Ka xanhari jimbo, Damasku niárani jámani, auandarhu anapu t'íntskua ma mátirku uirhipandaspti;

⁴ka Sáulu kuarhatsespti, ka uandakua ma kurhaspti enga arhimpka: “Sáulu, Sáulu, ¿Andirinisï jupikani úejki?”

⁵Ka Sáulu arhispti: “¿Néskiri Tata?” Ka uandakua ma mókukuntaspti: “Ji Jesusiska ima engari t'u jupikakuekani jaka.”

⁶[Jiájkani Sáulu manaraparini xáni chéni uandaspti: “Acha, ¿Amberisï úejki eska ji úaka?” Ka Acha arhispti:] “Jauara kókuani ka iretarhu inchaaku, jimari arhinhaaka ambe engari úaka.”

⁷Ima engaksï Sáulu jinguni nirani jápka ískuksï pákareratixapti, jimbokaksï sési jimbo kurhaxapka ka nóksï nemani exesïrempti.

⁸Jiájkani Sáulu jauaraspti, nájkiruka éskani jápka nónemani exespti. Jimboksïsï jupijtapapti Damasku inchaatani,

⁹ka tanimu jurhiatekua jima jarhasti pátenharhitini ka nómbe ma uékaspti arhani.

¹⁰Ka Damasku irekaxapti jurhengorheri ma enga Ananiasï arhinhempka, enga Acha tsánharhitapka ka arhini: “¡Ananiasï!” Ka ima arhispti: “Acha, ixu jarhaska.”

¹¹Ka Acha arhispti: “Jauara ka ni ambukutarhu enga jurhimbitku arhinhajka, ka Júdasïo kurhangorhe acheti Társu anapuni ma enga Sáulu arhinhajka. Jimboka ima uandamukukorhexaka,

¹²ka jánhaskaspti achetini ma enga Ananiasï arhinhempka, ka ima ínchaspti ka p'ajtsïkusti ka Sáulu éskantaspti.”

¹³Jiájkani Ananiasï uandaspti: “Acha, uánekuechajtsïni ima achetiri ambe aiangusti, na enga xáni nósesi káaka Jerusaleni chéti ireta erakukatechani.

¹⁴Ka ixu jamberijtuksï kéri tátecha sésekua íntskusti eska ima jupiapiringa iámendu imechani engaksï chéti jakangurhikuani k'éri ambe arhijka.”

¹⁵Ka Acha arhintaspti: “Ni jimbokani ji imani eraantaska eska ima iámendu no judiuechani ka imecheri irechechani ka Israeli uájpechani aianguantaani jámaaka,

¹⁶jimbokani ji exeraaka na enga jucheti jakangurhikua jimbo xáni nósesi nitamanchakorheaka.”

¹⁷Jiájkani Ananiasï niraspti ka k'umachekuarhu inchaspti ka p'ájtsïkuparini arhispti: — Erachi Sáulu, Acha Jesusi engakini xanhari jimbo xarhacheka engari jurhani jápka, axastirini t'úngeni jinguni ka eskari éskantaaka ka eskari Espiritu Sántuni p'iuaka.

¹⁸Ka jimajku éskuecharhu chésïni járhati uénharhiantaaspti ka éskantaspti. Jiájkani jauaraspti ka itsï atajtsïkunhaspti.

¹⁹Ka enga t'irepkia, uíuinhaxentaspti ka namuni jurhia Damasku pákaraspti imecha jinguni engaksï Jesusini jakajkuempka.

²⁰Ka Sáulu uénaspti uandantani k'umanchekua tángorhentskuecharhu eska Jesusi Diósï Uájpeska.

²¹Ka ima engaksï kurhajchempka ískuksï pakarerasïrempti ka uandasïremptiksï: — ¿Andi no ísï Jerusaleni imechani ataani káuempki engaksï Jesusini jakajkuempka? ¿Andi nójtsïni indesï jupikani uékeni engajtsïni k'éri tátechani jinguni pákuekani jápka?

²²K'óru Sáulu sánhani arhixapti jarhamekua jinguni judiuechani engaksï Damasku irekani jápka arhiani, ka no jánhastantaaxapti jimboka xarhatasïrempka eska Jesusi Krístueska.

²³Ka namuni jurhia jimbo, judiuechaksï tángorhentatini, pakatperaspti néna engaksï Sáuluni uandikupiringa,

²⁴ka Sáulu mítespti ambe engaksï úskuni jápka. Chúrekua ka jurhiakua iretarhu inchaakukuarhuksï jarhasïrempti erontani uandikuekanksï,

²⁵ka ima engaksï Jesusini jakajkuempka chúrekuaksï tsïntsïkatarhu isï xúndi jimbo iretarhu késkuntaspti.

²⁶Enga Sáulu Jerusaleni niárapka, jurhengorhericha jinguni tángorhentskuekaxapti ka iámenduechaksï chérhesïrempti jimbokaksï no úsïrempka jakajkuni eska imajtu Jesusini jakajkuxapka.

²⁷Jiájkani Bernabe, Jesusiri uandakua páricha jinguni páspti, ka aianguantaaspti eska Sáulu xanhari jimbo Achani exespka, ka eska Acha uandaxekuspka, ka aianguantaaspti na enga Sáulu Damasku uandantapka Jesusiri jakangurhikuani nósani chémuparini.

²⁸Ka Sáulu Jerusaleni imecha jinguni pákaraspti ka imecha jinguni jámani jarhasïrempti.

²⁹Ka méntku nósani chémuparini Táteri ambe uandantasïrempti, ka judioecha jinguni engaksï gríegu uandempka, uénasptiksï arhirhperani, k'óruksï ima uándikunisï uékani jápti.

³⁰Engaksï jakajkuti erachicha íni ambe mítepka, Sáulunksï Sesarea páspti ka jima uératinksï Társu axaspti.

³¹Imani jurhiatekuechani, Jesusiri tángorhekua Judea ka Galilea ka Samaria ísï sési jakuaksï jatsispti, ka Achanksï janhanharhiparini irekaxapti ka Espiritu Sántueri jarhojperata jimbo uánenhaxapti.

³²Enga Pédru iámenduechani p'urhembeani jamani jápka, p'urhembeasptijtu imani engaksï Jesusini jakajkuempka engaksï Lida irekapka.

³³Ka jima exentaspti achetini ma enga Eneasï arhinhempka, enga iúmu taminu uéxurhini apondikupka, jimboka no úsïrempka jauarani.

³⁴Ka Pédru arhispti: — Eneasï, Jesukristukini ambakerantaxati, jauara ka k'uírakuani irhikorhentsï. Ka ima jauajpatsespti.

³⁵Ka iámenduechaksï exespti engaksï Lida ka Saroni irekapka, ka Acha Jesusinksï jakajkuspti.

³⁶Ka jiájkani ísï Jópe irekaxapti uarhiti ma enga Tabita arhinhempka, imajtu Jesusini jakajkuxapti (“Enga Dórkasï” arhikuekajka gríego jimbo). Ima uarhiti méntkisï sési ambe úrisïrempti ka kánekua jarhojpesïrempti, ka kómu jándichani ambe intsïmbeasïrempti.

³⁷Ka imani jurhiatekua jimbo p'amenchaspti ka uarhispti. Engaksï jikuarantapka, k'umanchekuarhu iótakuarhuksï péntaspti.

³⁸Ka jimboka Lida uératini Jópe no káni iauaneska, jurhengorherichaksï mítetini eska Pédru jima jámaxapka, tsimani achetichanksï axaaspti eskaksï kómarhipiringa: “Ásï iónda ka ju sóntku juchantsïni jinguni.”

³⁹Jiájkani Pédru imecha jinguni niraspti. Enga niárapka iótakuarhuksï karhataspti, ka jimaksï iámendu uarhiti tsîndicha ueparini uirhipandapaspti jupikatianksï sïritakuechani ka xukuparhakua enga Dórkasï úkuantauempka enga nótki uarhimpka.

⁴⁰Jiájkani Pédru iámenduechani petantaarini, tinguixurhispti ka uandamukukorhespti, ka Dórkasïni erateparini arhispti: “¡Tabita, jauarantsï!” Ka ima éskantaspti ka Pédruni exerini jauaraspti,

⁴¹ka Pédru jupijkuspti ka jauatani; jiájkani ióarhiantaaspti jakajkutichani ka uarhiti tsîndichani ka Dórkasïni tsítantatini exerantaaspti.

⁴²I ambe Jópe iámu mítekorhespti, ka uánekuaksï Acha Jesusini jakajkuspti.

⁴³Ka Pédru imani iretarhu pakaraspti sáni namuni jurhia, Simonio enga sïkuiri ambakerani ánchekorhempka.