Read Western Highland Purepecha Romanos 1 Bible Online

Romanos 1 - Western Highland Purepecha bible

Romanos 1

¹Chári sésekua jimbo Roma anapuecha, Ji Páblusïni karani jaka, Jesukristueri uandakua páriska, Diósïrini erakusti imeri ambakiti aiangperakuani uandantani jámani,

²eska na aiatspetini jápka ka engaksï imeri uandakua páricha na karantapka,

³eska Dabiri sïrukueska jimboka ísï kángorhenhaspka eska parhakpeni anapu ma na kángorhenhajka,

⁴ka eskajtu Diósï Uájpeska, jimboka Espiritu pímbinhasïri uinhapekua jimbo tsítanhantaska. Juchari Acha Jesukristu.

⁵Imeri jakangurhikua jimbo jucha míndanhaska iámu parhakpeni uandantani jámani eska ima kurhajchanhaaka ka mintsikanhani.

⁶Ka iámendu chájtu engajtsï Roma irekani jaka, Jesukristuni jingunijtsï eranhaxaka,

⁷Diósïksïni erakusti ka kánekuaksïni xénhchasïndi. Juchari Diósï Táte, ka Acha Jesukristuksïni úchakuare ka sési jakuaksïni kóndeni.

⁸Urheta Diósïni diósmaiamukua arhixaka, Jesukristuni jimbo, jimboka iápuru isï mítekorhepaxaka eskajtsï cha imani mintsikaxaka.

⁹Ji Diósïni jimbo uandaxaka, jimbokani ima Uájperi ambakiti aiangperakuanisïni uandantani jámka, imanisïni mintsita jinguni marhuakujka, ka exexatirini eskaksïni kómarhijpecheni jarhasïnga,

¹⁰ka eskani kurhakuni jarhasïnga, eskarini sésekua íntskuaka niranksïni p'urhembeni,

¹¹jimbokaksïni exentskuekaxaka ka aiangunksïni úekaxaka máru espiritueri jurhengorhekuechani engajtsï jinguni uinhapentaaka,

¹²eska ísï jámani chájtu úaka méntkueni mintsikani ka jarhojperani.

¹³Míte je k'óru, erachicha, eskaksïni ióni p'urhembekuekaskia, ka méntkisïrini ambe ma p'íngusti. Uéksïnga cha jinguni jarhani ka jíjtuni p'ikuarherani na engajtsï xáni újchakurakata jaka, ísï eskani máteru iretecharhu na p'ikuarheraka.

¹⁴Íni ambe aiangukuekaxaka grieguechani ka ístu iauani isï anapuechani ka k'éri jurhendichani ka no jurhendichantu ísï.

¹⁵Jimbosïni xáni ninhejchani jaka chánksïni jinguni engajtsï Roma jaka, ka pájtamaakaksïni ambakiti aiangperakua aianguntani.

¹⁶Sési jimbo no k'uratsesïnga ambakiti aiangperakuani aiangpeni, jimboka Diósïri uinhapekueska, enga p'ímutantajka imechani ne enga jakajkujka, judiouechani uénani ka grieguechantu ísï,

¹⁷jimboka ísïsï xarharajka ambe enga Diósï uékajka, eska sánderu jakajkupanhaaka ísï eska karakata na arhijka: “Kaxumbiti, jakajkukua jimbosï sési irekaati.”

¹⁸Diósïri ikimperata xarharastia auandarhu, eska ikiakusïnga k'uiripuni enga no p'amojkpejka ka no xénhchpeni, ka engaksï nósesi jámaparini no uéjka eska mítekorheaka ambe enga ísïka,

¹⁹jimbokaksï jánhaskatixaka ambe enga Diósïrika, Diósï xarhatakuasti.

²⁰Nájkirukachi Diósïni no exejka, parhakpeni kueraakuarhutki uératini xarharaxati imani ambe jimbo enga xáni újka: Enga imeri uinhapekua nómeni k'amarhujka, ka enga Diósïka, jimbo, iámu parhakpeni anapuecha nóteru ambema jimbo úati ónharhini;

²¹ka náuejkiksï mítepkia Diósïni, nóksï k'éri ambe arhisti, ka nójtuksï diósmaiamukua arhisti, sánderuksï mímixeti jurhendi p'ikuarheraparini, iámuksï tandojtsïsti ka mintsïtaksï pájpakasï ka chérhekueni jásï ma kámsïndi,

²²Xánksï jurhendi arhikorhetini, iámuksï tandonhaskasti,

²³ka Diósïri pimbinhaxiti tíntskuaniksï jurajkusti, enga no terejka; ka k'uiripueni járhatiksï úkorheasti ka kuínini járhatiksï úkorheasti ka ch'anchakini jarhatiksï úkorheasti ka akuitseni jarhatiksï úkorheasti engaksï ísku terejka.

²⁴Jimbosï Diósï jurajkuaati eskaksï jurajkutakorhentaaka ísku jánhchani, ka eskaksï imani úaka ambe engaksï mintsitarhu nósesi jásï ambe tsitini jaka, ka jamberiksï jimajku úndasti p'árhperani

²⁵ima engaksï Diósïri jurhimbitkuekuani chkuándirakua jinguni mójtakuka, ka engaksï imani ambe jakajkujka ka marhuakuni enga Diósï úka ka nóksï Diósï Kuerajpirini jakajkuni, imani enga méntkisï k'éri arhinhajka. Ka ísïsti.

²⁶Jimbosï Diósï jurajkuati eskaksï méntku k'uratsekua tsîtatini irekaaka; ka indecheri uarhitichaksï jamberi nóteru tatakaecha jingunderku p'árhperasïndia, iásïksï máteru nanakecha jinguni ísï kámperasïndia, náuejki nóteru ísïjkia.

²⁷Ka tatakechajtuksï témbechani mirikurhiastia ka máteru tatakechanksï jinguni k'uratsekua ambe niátaxati, jandiojkuksï p'íntaxati ambe engaksï andakorhetini jaka ísïksï no kurhandirarini.

²⁸Ka jimbokaksï no jiókorheka Diósïni, Diósï jurajkuasti eskaksï eratsekua tsîtaaka ka eskaksï imani ambe niátaaka enga nómbema jimbo sésika.

²⁹Eskaksï nombema sési úaka, eskaksï mintsitarhu jatanheaka nósei únhchakua, eskaksï iámu ambe piánhchaaka, eskaksï nósesi ambe únhchaaka, eskaksï kánekua epurhpeaka, eskaksï atajpenhchaaka uándipeni, eskaksï iámu ambe no jaiapenhentaaka, eskaksï tandojchpeaka, eskaksï iámendu ambe no jaiapanhentaaka, eskaksï arhinhchpiriuaka,

³⁰eskaksï uandatsetspitiuaka, Diósíri ikiatspirinksï, nósesi uandaristiksï, imani ambeksï jamberi arhikorhesïndi engaksï no jurhenaka úni, sóntkuksï xékuntasïndi néna nósesi ambe úni, tátjembechanksï no kurhandirakuasïndi,

³¹inchandimestiksï, ískuksï aiatspesïndi ambe, nóksï p'ikuarherasïndi ambema nósesi útspeni, ka nóksï sáni p'amojkpesïndi.

³²Imaksï mítetixati, eska Diósï uandarixaka eskaksï xásïkua uarhikueska, ka nóksï jandiójku mítesïndi indeni ambe úni, útaseruksï jaiapanhekuantaasïndi máteruechani engaksï xásï ambe niátka.