Read Western Highland Purepecha Romanos 11 Bible Online

Romanos 11 - Western Highland Purepecha bible

Romanos 11

¹Ka ménderuni kurhamarhekorhesïnga ¿Andi Diósï juraskuskia imeri iretani? No ísïsti, jimboka jíjtuni Israeli uájpeska, Abraamiri sïrukueska ka Benjaminiri iretarhu anapueska.

²Diósï no jurajkusti imeri iretani, jimboka uénantku erakuaska. ¿Andi nójtsï míteski karakatani, enga arhijka eska Eliasï Israelichani ísï arhijpekuaspka?:

³“Acha, iámendu chéti uandakua párichanksï uándikuasti ka chéti kéjtsïtakuechanksï xereantasti, jíterkuni pakaraxaka ka jíndentujtsïni uándikuekaxatiia.”

⁴Ka Diósï ísï arhintaspti: “Ji támu pérakorheaska iúmu tsimani míli tatechani engaksï Báalini nómeni tinguixurhikuni jaka.”

⁵Iásïjtu méntkueni jarhasti, jarhastiksï máru erakukatecha enga Diósï uékaka kóndeantani.

⁶Ka enga Diósïri kóntperakua jimboeka, jiájkani nóteru uétarhesïndia jángorhentani sési ambe úni; ka enga ísïpiringa, Diósïri kóntperata nóteru kóntperatepirindia.

⁷¿Nena jaki jiájkani? Israelichaksï no xéntasti engaksï jámani jápka jirinhani, imaksïsï xéntati enga Diósï erakuaka. Máteruechaksï mintsita chuperamenhasti,

⁸ísï eska na karakata jaka: “Diósï jiáretaasti eskaksï p'ikurhenheaka espiritueri ambe, mínharhikuasti, eskaksï no úpiringa exeni, ka míndikuasti eskaksï no úpiringa kurhani, ka útasïksï ísï jarhasti.”

⁹Ka Dabijtu uandasti: “Nóksï úati jurajkuani k'uinchekuechani jimbokaksï iámu p'inderheauaka, tsïnchentatiksï ka ikimekuaksï andakorheati.

¹⁰Jurajkuksï pátenharhini ka ásïksï exe; méntkuksï kuarhaparhe.”

¹¹Ka iásï kurhangorhesïnga: ¿Andi israelicha engaksï ísï no kurhandiraka iámuksï tsîrhuku? No ísïsti, engaksï inde no kurhandiraka, marhuasti eska máteru ireta p'ímutanhantaaka, eskaksï ísï jámani Israelicha epurheauaka.

¹²Engaksï israeliecheri no kurhandirakua jimbo parhakpeni anapuecha sési uéraka, ima engaksï no judioueka, ¡Eranhaska je néna enga pakaraaka Israeli enga sési jájkunhantaaka!

¹³Chánksïnisï arhini jaka engajtsï no judioueka; jimbokani ji no judiouechanisïni uandakua pákuajka, ka ini úkuani k'éri ambe exesïnga,

¹⁴Uéksïnga jucheni anapuechani mintsita manatakuani, ka ísï jámani máru p'ímutantaani.

¹⁵Jimboka enga judiouecheri no kurhandirakua marhuaka ka parhakpeni anapuechaksï ménderuenintani, ¿Israelicha néna no sánderu sési jiónhantaa ka tsípekuaksï intsïnhani, nájkirukaksï uarhirini jaka?

¹⁶Enga Diósïni míndanhantajka kurhinda enga urhetku p'ijpanhantajka, iámu tsïreri Diósïni míndakata pakarasïndi; ka enga p'ukuri ma Diósïni míndanhantajka sïrangua uénani, axandikuechaksï jamberi míndakata pakarasïndi.

¹⁷Eka axandikua ma ch'apandikunhaaka ka t'u engari olibu jerambeka, jimari mórhutanhantani, t'úri ambakiti olibuentaka jimbokari ambakiti anhatapurhu jauaka.

¹⁸Ásï jáma k'óru k'éramakorheni ka ísku úndani máteru axandikuechani no xénhchaani, ekari ísï jámaska, mía eskari no t'úsï p'ínguni jaka sïranguani, sïranguakinisï jupikatini jatsiti.

¹⁹Ekari uandaska: “Ji mójtsïtanhaska jima enga axandikua ch'apandikunhaka”

²⁰Ísïsti; ch'apandikunhastiksï jimbokaksï Diósïni no mintsikaspka, ka t'u engari Diósïni mintsikaka jimari pakaraska mójtsïtakata. Jiájkani ásï teparakorhe ka jamberi chéparini jama.

²¹Jimboka eka Diósï no p'amoajkuaka imechani engaksï imeripka, t'úngenkini sánderu no p'amojkuati.

²²Jánhaskakorhe Diósïri kóntperakuani ka ikimperakuani: Ikimeasti no kurhandirechani, ka t'úngenikini kóndentasti engari imeri kóntperakuani kurhanguni jaka, ekari no ísï jámaska, t'újturi ch'apandikunhaaka.

²³Ka ekaksï judiouechajtu úska Diósïni mintsikantani, ménderuksï mójtsïtanhantaati, jimboka Diósï xáni uinhapitiska enga újka ménderu ísï jatsikuantaani eskaksï na jukarini jápka.

²⁴Jimboka, ekari t'u juátarhu anapu olibuepka, ka úndi ambakiti oliburhu mórhutanhani, ¿Nénaksïsï no sánderu sési mórhutanhantaa ima engaksï oliburhu jukarini jápka?

²⁵Uéksïnga jucheti erachicha eskajtsï mítetini jauaka indeni ambe enga no mítenhaka, ásï chájtu jukari k'éramakorhe je, ísï eskaksï máru israeliecha na k'éramakorhepka, engaksï tátsekua mintsitani chuperamenhaka jiáni jamberi engaksï máteru iretecha iámu tánanhantaaka.

²⁶Ka tátsekua Israeli iámu p'ímutanhantaati, ísï eska na karakata jaka: “Sioni uératini juuati p'ímutanspiri ka Jakobuni kénditakuati nósesi jásï ambe.

²⁷Ka indeni ambechisï pakatperani jaka, engani ji kénditakuauaka k'amanharhintskuechani.”

²⁸Ka israelichaksï ambakiti aiangperakuani chári sési jimbo ikiakusïndi; ka k'óru imecheri ióntki anapuechani jimboksï xénhchakatesti jimbokaksï erakukateska,

²⁹Jimboka Diósï no euájpentasïnga kóntperakuani ka no mirikurhisïndi néni enga erakutini jarhajka.

³⁰Ka ísï eskajtsï cha urhetku na járhatipka engajtsï Diósïni no uékempka kurhajchani, indejtuksï no kurhandirasti ka chájtsï p'iraska kóntperakuani,

³¹ka engajtsï cha intsïnhakia kóntperakuani iásï engaksï inde no kurhandiraka, jurajkuksï indejtu p'amokjkunhani.

³²Jimboka Diósï jupiskpeska no kurhandirakuarhu, ka ísï jámani úni iámenduechani kóndeani.

³³¡Xáni enga k'érika Diósïri mímixekua ka eratsekua, nónema úati kurhanguni ambe enga újka ka náki xanharisï úskutini jaki!

³⁴Ka jimboka, ¿Néchka mítetiskia andi Acheri eratsekuani? ¿Andi ne úa Achani arhistakuni?

³⁵¿Andi ne méni, ambema íntskuski, ka enga tátsekua Acha k'uanhaskukuntani uétarhenchaaka?

³⁶Jimboka iámendu ambe Diósï kueraska, ka ima marhuataati néna enga ima uékaaka. ¡Méntkisï k'éri ambe arhinhe Diósï! Ísï jakajkuni jauaka.