Read Western Highland Purepecha Romanos 13 Bible Online

Romanos 13 - Western Highland Purepecha bible

Romanos 13

¹Kurhandirakua je iámendu juramutichani engaksï jakaia, jimboka iámendu jásï juramukua Diósïri jimbosï jaka, ka engaksï xáni juramuticha jakaia, Diósïri jimboksïsï jati.

²Jimbo, ne enga juramukuani no kurhandirakuaka, Diósïri eratsekuanisï no kurhandirakuni jati; Ka no kurhandirechaksï jandiójkusï antsitakorhejti nósesi úkorhenchakua.

³K'érati achecha nóksï ísku uénasïndi xukajchaani sési ambe úrichani, nósesi úrichanksïsï xukaajti. T'u sési jáma ekari no uéjka eskakini juramuti ambema úcheaka, ka imakini jamberi k'éri ambe arhiati;

⁴jimboka ima Diósïni marhuakuxamka ka chéti sési jimboesti. Ka ekari nósesi ambe niátaska jiájkani k'óru che: Jimboka ima no ískusï kámka juramukuani, ima úraati imani juramukuani jimboka Diósïnisï marhuakuni jámka ka marhuataati juramukuani imani jinguni ne enga nósesi ambe úska.

⁵Jimbosï uétarhejti iámu kurhandirakuni, no chérhekua jimbojku, sánderu sáni sési exentaparini eska sésiska kurhandirarini.

⁶Ka jimbojtsïsï maiampejka eskaksïni inde juramucheaka, jimbokaksï inde Diósïnisï marhuakuni jámka, ka jimbokaksï méntkisï indeni niátaparini jámsïnga.

⁷Iámendu ambe maiampe je, néni engajtsï maiampentskua kángujka, maiamu je, ka néni enga janhanharhikueka janhanharhi je, ka néni enga k'éri ambe arhikueka k'éri ambe arhi je.

⁸Ásï nemani ambe ma kánguni ja je, imankujtsïsï miáni jauaka eskari nemani no úxaka xénhchani. Jimboka ne enga xénhchpitika, ima k'óru iámu juramukuani kurhandirakuaxati.

⁹Jimboka ima ambe enga arhijka: “Ásï ískujandi, ásï uándikpe, ásï sïpa, ásï epurhetspe ambe”, ka máteru juramukuechaksï májkusï úkorhentajti: “Xáni xénhchpe eskari t'u xáni xénhchakorhejka”

¹⁰Xénhchperakua nónemani ambema nósesi úkusïndi. Jimbo, xénhchperakua juramukueri sánderu sési kurhandirakuesti.

¹¹Ka ísïchi jámaaka, miáparini nénasï jánhaskorheni jaki íni jurhiatekuecha. Jimboka janoskia jurhiata enga uétarheni jakaia tsínharhini; jimboka p'imutantskua sánderu axuterkusï jakaia eska jiájkani engachi uénaka jakajkuni.

¹²Chúrekua nitamaxatiia ka erandexamtia. Ju je pájpakandueri úkuechani jurajkuania ka ju je t'ímarhandekueri kuájpetarakua jukajukatakorheni.

¹³Ju je jurhimbitku jámani, eskachi jurhiakua na jámka. Ásteru xáni kánhachani t'ireia je ka ásteru kaui je; ásteru chári anhanhetakuani ísku ambema niátatrarani ja je; méntku ásteru ambema jimbo urhuta je o ambema epurhpeni jarhani.

¹⁴Sánderu sáni Acha Jesukristueni jaxentsï je, ka ásteru anhanhetakueri anhejchakua ambejku miáni ja je.