Read Western Highland Purepecha Romanos 14 Bible Online

Romanos 14 - Western Highland Purepecha bible

Romanos 14

¹Sési eroa je imechani engaksï jakajkukuani no úni jaka chuperani, ka ásï jámani ja je imani jimbo uinhamu uandaxeni.

²Jimbokaksï máru uandaaka eska iámendu ambe úsïnga anhani, ka engaksï iásï chúperani jaka jakajkukua, imaksï uandaati eska xakua ambejkusï akueka.

³Ne enga iámu ambe arhajka, ásï ikimche imani enga no iámu ambe arhajka, ka ne enga no iámu ambe arhajka, ásï arhinhche imani enga iámu ambe arhajka, jimboka Diósï ísï jaiapanhentaska.

⁴¿Andi t'u néski engari máteru nemeri jántspirini arhinhchatspejka? Enga kuarhatsejka o enga no kuarhatsejka imeri ánchetpirijkusï míteti; ka no kurhatseati jimboka Diósï méntku k'ériska ka p'ínguati.

⁵Ma uandaati eska ma ísï jurhiatekua sánderueska ka máteru uandaati eskaksï iámendu jurhiatekuecha méntkueniska. ¡Táchani uétarhesïndi miákorheni!

⁶Ne enga máru jurhiatekuechani sánderu k'éri xéajka, Diósïni jimbosï k'éri xéajti, ka ne enga iámendu ambe újka arhani, Diósïni jimbosï arhajti, jimboka diósmaiamu arhintasïnga. Ka ne enga no iámu ambe arhajka, Acha jimbosï no iámu ambe arhajti, ka diósmaiamu arhintasïndi.

⁷Jimboka nónema ísku jatini irekaxaka, ka nójtu nema ísku jatini uarhixati.

⁸Ekachi irekani jarajka, Acha jimbochisï irekani jaka; ka engaksï uarhijka Achani jimbochisï uarhijka. Jiájkani Acheriskachi irekaparini o uarhirini.

⁹Krístu jimbosï uarhiti ka tsíntani ka ísï jámani Achesti tsípiticheri ka uarhiricheri.

¹⁰Ka t'u, ¿Andirisï arhinhchajki chéti erachini? Ka ¿Andirisï no xénhchajki erachini? Diósïri arhinharhikperakuarhuchi iámenduechasï arhinharhikunhaaka,

¹¹jimboka karakata jarhaska: “Acha uandaxati: Jucheti tsípekua jimbosïni uandani jaka Iámenduechajtsïni tinguixurhicheati, ka iámendu jasï uandakua jimbojtsïni k'éri ambe arhiati.”

¹²Ka jimbo, táchantsï aianguntaaka Diósïni.

¹³Jimbo, ju je jucha nóteru arhinhchperani jarhani; sánderu sáni eratsentsï je néna no apindukuni erachini o néna jámani eska no ima sánderu nósesi ambe únhchaaka ka nóteru uékani jakajkuni.

¹⁴Ji sési míteska ka Acha Jesurinisï ísï inchajtsïtati eska nómbema nósesika, k'óru ne enga uandajka eska ambema nósesiska, imeri jimbosï nósesiti.

¹⁵K'óru eka chéti erachi mískorheni jaka imani jimbo engari t'u arhani jaka, ísï jámaniri k'óru nóteru xénhchperakua jingunixakaia. ¡Ásïksï ima chéti jimbo tsînchekorhe enga Krístu imecheri jimbo tsípekua íntspeka!

¹⁶Ásï nósesi uandanhani jaue indeni ambe jimbo engajtsï cha sési exeni jaka.

¹⁷Jimboka Diósïri irechekua no t'irekua o kauikueska, sánderu sáni, sési jakuesti ka sési pájperakuesti ka Espiritu jinguni tsípekuesti.

¹⁸Ne enga Krístuni ísï marhuakuni jaka, Diósïni jaiapanhetarantaxati ka sési exenhaxati.

¹⁹Ju je imani ambe úni enga sési jakueka ka márku jurhentperani.

²⁰Ásï akua jimbo ambendarhe je Diósïri úkuani. Iámendu ambe ambakitisti, imasï nóseiti engachi nósesi xarhataparini auaka.

²¹Sánderu sésisti k'uiripeta o kauikua ambe no arhani, ka sánderu sésisti no úni imani ambe enga chéti erachini apindukuaka o enga ikiataaka o enga jamberi nóteru jakajkunhchaaka.

²²Eskari xáni jakajkujka Diósïni, méntkisï xáni jakajku. ¡Tsípe ne enga no nósesi p'ikuarherani jarhajkia ambema úrini!

²³Ka k'óru ne enga tsimanitsimaneaparini arhajka ambe ma, jandiójku uekajpekorhexati, jimboka nóteru jakajkuparinisï arhani jaka, jimboka iámendu ambe kámanharhintskuesïnga enga no ambakiti jakajkukua jimboejka.