Read Western Highland Purepecha Romanos 15 Bible Online

Romanos 15 - Western Highland Purepecha bible

Romanos 15

¹Uétarhisïndi eska jucha, engachi sánderu jánhaskatikia, jarhuatauaka jimbanhe jakajkutichani, ka nóchi juchajku sési p'ikuarerakorheni jarhani.

²Eskachi iámenduecha jángorheaka ambakiti ambe úni enga máteruechani sési p'ikuastauaka, ka ísïchi jarhuatauaka.

³Jimboka Krístujtu no uékaska k'éri úkorheni; eska na karakata jaka: “Arhinhchakuecha engaksïni t'úngeni arhiaka, jíndentsïni nósesi p'ikuastasti”

⁴Inde ambe enga ióntki karanhaka, juchantsïni jimbo karhanhasti, eskachi jurhengorheaka ambakiti ambe erokorheni, tekantskua jinguni, ka engachi indeni karakatani arhintaaka eskachi sési p'ikuarheraaka.

⁵Ka Diósï enga xáni tekantskua jatsika ka enga sési p'ikuastpejka, kóndeksïni eskajtsï chájtu Jesukristueni sési p'ikuarheraaka,

⁶ka eskajtsï Diósïni márku k'éri ambe arhiaka, enga juchari Acha Jesukristueri Tátjembeka.

⁷Jiájkani cha sési uandajpera je, ísï eskajtsïni Krístu na sési uandajpantaka, ka ísï jámani Diósï k'éri exenhaati.

⁸Krístu judiouechanisï juti jánhastaani ka exerhaani ambe enga Diósï uéjka, jimbokaksï ióntki anapuecha aiamenhaspka,

⁹ka eskaksï Diósïri kóntperakuani no judiouechajtu k'éri exeaka, eska na karakata jaka: “Máteru iretecharhukini pirecheaka, jimbokani chéti ambe jiniasï aiangpeaka.”

¹⁰Ka támujtu arhisïndi: “Diósïri ireta jinguni tsípentsï je, no mínda jukaricha,”

¹¹Ka ístu arhisïndi: “No minda jukarhichaksï Diósïni pirekue ka iámendu iretechaksï k'éri ambe arhi imani”

¹²Ka Isaiasijtu arhixati: “Iámendu iretechani juramukuauati ima enga Jéseri sïranguarhu tsïuantaka, ka imaterku mintsikanhaati.”

¹³Ka Diósï enga sési karhoatpentka, kóndeksïni eskajtsï imani mintsikatini kánekua tsípekua ka sési pájperakua jatsiaka, ka eskajtsï Espiritu Sántu jimbo sánderu ambakiti ambe mintsikani jauaka.

¹⁴Jucheti erachicha ji sési míteska, eskajtsï kánekua kaxumbeska ka eskjtsï kánekua mímixeska, ka eskajtsï úaka sési arhistatsperani;

¹⁵K'óruni sáni jukari arhiska íni karakatarhu, uékani chánksïni miátani eskarini Diósï kóndeska

¹⁶Jesukristunisïni jántspekuni jámka. Diósïri ambakiti aiangperakuani aiangpesïnga ísï eska táta ma. Ka no judiouechani jurhendaaxaka, eska Diósï ísï jámani kéjtsïtakueni jiókorheauaka judiouechani engaksï arhutakata jaka Espiritu Sántuni jimbo.

¹⁷Diósïni japarini, Jesukristu jimbo k'éramakorhexaka,

¹⁸no jimbokani xáni ambandiraka, Krístusï úti eskajtsïni no judiouecha kurhauaka. Ka ima ambe marhuakuasti engaksï exeka ji néna engani jámaka, ka imani kurharini engani uadaka

¹⁹ka Diósïri Espiritueri uinhapekua jimbo, k'érati míndechani ka milagruechani exeraaska; Krístueri ambakiti aiangpekuani Jerusaleni uénaska ka Iliria jamberi ísï uandantaska.

²⁰Ka jángorheska no jímesï uandantani enga Krístueri ambe kurhanhapkia, no uékaska máterueri ánchekorhetani inchakukuni,

²¹jimboka ísï karakata jarhaska: “Iásïksï ima exeati, engaksï nómeni aiangunhani jápka; ka imaksï kurhanguati engaksï Acheri ambe nómeni kurhani jápka.”

²²Indeni ambe jimbo, iónistia engaksïni p'urhembekuekakia.

²³Ka iásï engani jucheti úkuani ixuesï k'amarakia, ka enga xáni iónikia engaksïni p'urhembekuekani jaka,

²⁴España nirani jámani jámaaka, jimbokaksïni uékaxaka exeni ka chánksïni jinguni jarhani sáni, ka tátsekuajtsïni cha jarhuataka niárani.

²⁵Jerusalenderkusïni niuaka jakajkutichani jarhojperakua ma pakuani,

²⁶máru jakajkuti Jerusaleni anapuechani engaksï kómu irekaka, engaksï Masedonia ka Akaio anapuecha mintsita jinguni axakuaaka.

²⁷Uandakorhestiksï, jimboka ísïpiringa, jimbokaksï ima intsïmpenhaspkia judiouecheri jakajkukueri ambe, ka ísï jámanksï t'uini kánspexaptia, jimboksïsï jatsipirindi jatsikorhekua ambe sáni intsïmbeantaani.

²⁸Jurajkuni índerkuni k'ámarani jarhojpeni, España nirani jámani, exemaakaksïni.

²⁹Ka míteska eska cha kánekua újchakurakua jatsiaka Krístu ambakiti aiangperakua jimbo.

³⁰Jucheti erachicha, juchari Acha Jesukristuni jimboksïni kómarhixaka ka ístu Espiritueri xénhchperakua jimbo, eskajtsïni kómarhijpecheaka engajtsï uandamukukorheni jauaka,

³¹eskarini Diósï kuájpeaka jimbokaksï máru no jakajkuticha Judea jarhaska, ka eska sési jaiapanhenhantaaka i jarhojperakua engani Jerusaleni anapu jakajkutichani pakuani jaka,

³²ka engarini Diósï tsípekua kuanetaska eskani úaka cha jinguni niárani ka tsípeni indeni ambe exerini.

³³Diósï enga sési jakua íntspejka, chánksïni jinguni jaue. Ísï jakajkuni jauaka.