Read Western Highland Purepecha Romanos 2 Bible Online

Romanos 2 - Western Highland Purepecha bible

Romanos 2

¹Indeni jimbori, t'u nónemani úaka arhinharhikuni, ne uéjkikari, jimbokari máteru nemani arhinharhikutini jandiojku uekajpekorhexaka, jimbokari ísï jámani májkueni niátaxaka eskaksï ima na niátani jaka.

²Mítetixakachi eska Diósï jurhimbitkueska ka eska no jukari arhinharhikuasïnga ísï niatatichani.

³¿Andi t'u, engari máteruechani arhinharhikuani jaka, eratsexaki eskakini Diósï t'úngeni no arhinharhikuaka?

⁴¿Ándi t'u ísku ambeni exexaki imeri kóntperatani ka tekantskuani ka engakini no ikiachejka? ¿Andi nóri kurhangusïnki eskari Diósïri kóntperata jimbo móantaaka?

⁵K'óru engari mintsita chuperaka ka nóri uékani móantani, ikimekuari andakorhexaka, jiáni enga Diósï terujkani anhaxurhitini sési útatspentaaka,

⁶enga mándani arhini maiamuantauaka ambe enga xáni andakorhenhaka:

⁷Imechani méntkisï tsípekua íntsauati engaksï jángorhentaka sési ambe úni, kéri ambe jirinhakuekani, kéri ambeuatiksï ka méntkisïksï irekaati.

⁸Ka nósani p'amojkuauati ikimeni imechani engaksï inchajtsïmantajka no uékani sési jámani ka sánderuksï ikiakorheni,

⁹No sési niátatichaksï mískorheati ka kómuksï nitamani, judiouecha uénani ka ístu no judiouecha,

¹⁰ka sési ambe úrichani t'íntskua ka kaxumbekua ka sési jakua íntsauati, judiouechani uénani ka ístu no judiouechani.

¹¹Jimboka Diósï nónema jinguni sánderu k'uetsapesïnga.

¹²Jimboka ima engaksï k'amanharhintajka juramukuani no míteparini, nóksï jánhaskatini uarhiaati; ka ima engaksï k'amanharhintajkateru juramukuani mítetinia, juramukua arhinharhikuauati;

¹³jimboka Diósï imechanisï sési xéajka engaksï juramukuani kurhandirakujka, no imechani engaksï ísku kurhajka.

¹⁴Engaksï no judiouecha, juramukuani no mítetini, juramukeri arhistatsperakuani úrajka, indeksï juramukuani kángorhexatiia, nájkirukaksï no míteka,

¹⁵juramukuanksï mintsitarhu kámaxati, indeksï míakorheatia ambeksï sési úxaki o ambeksï nósesi úxaki

¹⁶ima jurhiatekua enga Diósï xarhatatspeaka enga xáni ambe patsanhetini jatsinhaka, eska Jesukristueri ambakiti aiangperakua na arhijka, ima engani ji jurhetpejka.

¹⁷T'u engari judio úkorhejka, ka juramukuaniri jupikorheni ka k'éramakorheniri engari Diósïni mítetika,

¹⁸míteskari ambe enga Diósï uéjka, kurhangusïngari ambesï sánderu sési, jimbokari juramukuani jurhendanhatixakaia,

¹⁹ka sésiri xékorhexaka imechani urherukukuani engaksï pájpakandu jámani jaka,

²⁰ka no jánhaskatichani arhistakuani, ka sapichani jurhendaani, jimbokari mítetixaka, eska juramukua mímixekueska, ka eska jurhimbekueska.

²¹Ka engari máteruni jurhendani jakaia ¿Andi nóri úpirini sáni t'újku arhistakorheni? ¿Andirisï arhijtskpejki eska no sïpatsperanhaaka, ka jiniri t'u sïpani jarhani?

²²Ekari uandajka eska no jánhaaka ísku jándinhani ¿Andirisï ísku jándi? Ekari ikiajka diósï eratakatechani exeani ¿Andirisï inchakuajki diósï eratakatechani ambe sïpakuani?

²³T'u engari juramukua jinguni sési xékorhejka, Diósïniri nósesi pakataxaka engari juramukuani no kurhandirakujka.

²⁴Chári jimbosï karakatarhu arhijti: “Diósï nósesi arhinhani máteru iretecharhu enga no judiouenhaka.”

²⁵Ts'iuekuani sïkuiri p'ikujtsïkuni sési jimbo marhuasïndi, ekari juramukuani kurhandirakuska; ískuri mínda jatsikunhaka ekari juramukuani no kurhandirakuska.

²⁶Eka no mínda jukari ma, juramukuani kurhandirakuaka ¿Andi ima no mínda jukarini exenhaa? ¿Nájkiruka no jukaka mínda?

²⁷Ka jamberikini inde no mínda jukari enga juramukuani kurhandirakujka, índekini jámberi úati t'úngeni arhinharhikuni, engari juramukuani míteka ka míndari jukarini; ka jiniri juramukuani no kurhandirakuni.

²⁸No tájtsïkuntkusï judiouenhajti, ka nójtu ts'iuekuarhusï mínda jukanhajti;

²⁹ambakiti judioueni jinisï p'ikuarhenhenhajti, mínda mintsitarhusï kánhajti, no karakata jimboesti, espiritu jimboesti; k'uiripu no xétspesïndi i k'éri ambeni, Diósïsï xétspejti.