Read Western Highland Purepecha Romanos 5 Bible Online

Romanos 5 - Western Highland Purepecha bible

Romanos 5

¹Maiampemenhaskachi, juchari jakajkukua jimbo, ka Diósïni jingunchi sési jarhaska juchari Acha Jesuckrsitueri jimbo;

²Ka jimbokachi Jesusini jakajkuska, ístuchi p'iuaka ini kóntperakuani engajtsïni uinhaperantajka. Ka tsípekua jingunchi erokorheaka Diósïri t'íntskuani.

³Ka xántku ísï, jiájkani jamberichi k'érini p'ikuarherani jarhasïnga náuejkichi nósesi ambe úkorhenchani jarhani,

⁴ka tekantskua ts'éjkpesïndi, ka ts'éjkperakua mintsikatarpesïndi,

⁵ka mintsikakua no k'uratsekua ambesti; jimbokachi uininhetixaka Diósïri xénhchperakuani engachi Espiritu Sántuni intsïnhaka.

⁶Jimboka Krístu k'amanharhintstichani jimbo uarhiska, jiájkani engachi jucha útasï nótki uinhapekorhempka.

⁷Sési jimbo, no neuejki uékaati máteru nema jimbo tsípekua íntspeni, kaxumbiti ma jimbo k'óru nema uékapirindi tsípekua íntspeni.

⁸Ka Diósï k'órujtsïni xarhatechesti na engajtsïni xáni xénhchajka, jimboka Krístu jiáni uarhiska juchantsïni jimbo engachi k'amanharhintstipka.

⁹Ka iásï, engajtsïni Uájperi iurhiri jimbo, Diósï k'amanharhintskuechani maiampecheantakia, imeri Uájpa jimbojtsïni kuájpeati, jiájkani enga ikimpeaka.

¹⁰Jimboka engachi Diósïni ikiakuempka, ka útasïjtsïni imeri Uájperi uarhikua jimbo sési arhintani; iásï enga ima irekani jaka sánderuchi p'ímutanhantaka jimbokachi Diósï jingunintaskia.

¹¹Ka no xántku, Diósï jingunchi tsípesïnga juchari Acha Jesukristuni jimbo, jimbokachi uájpani jimbo sési arhijperantaska.

¹²K'amanharhintskuani k'uiripu ma juásti ixu parhakpeni, ka k'amanharhintskua uarhikuani juájtasti, ka uarhikua iámenduechani andaasti, jimboka iámenduecha k'amanharhinhantaska.

¹³Jiájkani k'amanharhintskua parhakpeni t'uíni jarhasptia, jiántki uératini enga juramukua nótki jamberi karanhempka; nójtuchka nema k'amanharhiranhantasïndi enga juramukua no jarhajka.

¹⁴K'óru Adani jinguni uénani, ka eka jamberi Moisesika iámendu uarhipanhasti, imajtuksï ísï engaksï no xáni no kurhandirapka eska Adani na jámapka. Ka Adani t'uini imeni jáxesptia enga jupiringa.

¹⁵K'óru Diósïri kóntperakua no xáxesti eska no kurhandirakua, jimboka eka no kurhandirari ma jimbo uánekua uarhinhaka, Diósïri kóntperakua ka intsïmperakua sánderu uánekuechani sési p'ikuastantasti enga Jesukristujku aiakorhentapka.

¹⁶Diósïri kóntperakua no ísï p'ájpesïndi eska na jámapka májku tateri k'amanharhintskua, jimboka ísïska eska imeri no kurhandirakua jimbojku útatsperakuani juáska enga uándikpejka; k'óru kóntperakua jiájkani janosti enga xáni k'amanharhintskua jápka ka maiampetspentasti.

¹⁷Jimboka eka úka uarhikua juramuni nemeri no kurhandirakua jimbo, Jesukristujtu ústi eskaksï sési irekaparini sánderu sési juramuaka imecha engaksï Diósïri kóntperakuani p'irajka ka sési jakuaksï intsïmbenhani.

¹⁸Jiájkani, eka májkueri no kurhandirakua jimbo iámu tsînchenhaka, ísïjtuksï májkueri sési kurhandirakua jimbo iámenduecha irekaati, jimbokaksï k'amanharhintskuechani maiampemenhantaskia.

¹⁹Ísï eska ma achetiri no kurhandirakua uánekua k'amanharhirantaaka, ístu májku achetiri sési kurhandirakua uánekuechani Diósïni jinguni péntauati.

²⁰Juramukua, sési jimbo, marhuaspti eska sánderu nósesi ambe niátanhapiringa; k'óru jima enga kánekua k'ámanharhinhantaka, kánekua kóntperata jarhasti;

²¹jimboka májkueni eska k'amanharhintskua na juramujka eska uarhinhaaka, Diósïri kóntperakuajtu májkueni juramue sési ambe úkua jimbo eska íntsperanhaaka tsípekua méntkisï anapu enga Jesukristu, juchari Acha íntspejka.