Read Western Highland Purepecha Romanos 6 Bible Online

Romanos 6 - Western Highland Purepecha bible

Romanos 6

¹Ka ¿Nénachisï arhiaia jiájkani? ¿Eskachi k'amanharhintaakateru jimbokachi ísï jámani sánderu kóndenhaaka? ¡Méntku nómbe!

²Jucha engachi k'amanharhintskuani uarhirakia ¿Nénateruchisï k'ámanharhintskua jinguni irekani jauaia?

³¿Andi nójtsï míteski, eskachi Krístuni jinguni márku uarhiska, jiájkani engachi Krístuni jimbo itsï atajtsïkunhaka?,

⁴Krístuni jingunichi jatsinhantaska engachi itsï atajtsïkua jimbo uarhika, eskachi ísï jámani, juchajtu juchari tsípekuani jimbanherantaaka; májkueni eska Krístu na uarhirichani jinguni tsítanhantaka, enga tátjemberi k'érikua jimbo tsíntaka.

⁵Ka engachi kúndanhakia Krístuni jinguni jimbokachi májkueni jatsinhantaska, jiájkanchkachi májkueni tsíntakia eska ima na tsíntaka;

⁶míteparini eska juchari urheta tsípekua Krístu jinguni cháparhatanhaska, ka eska ísï jámani k'amajkunhapiringa i juchari anhanhatakua enga kámanharhinstika ka eskachi nóteru jámapiringa k'ámanharhintskueri jánspirini.

⁷Jimboka eka nema uarhijka, k'amanharhintskua nóteru ambema úkusïndia,

⁸ka ekachi Krístuni jinguni uarhikia, mintsiksïngachi eskachi ima jinguni tsípekua jinguni jámani jauaka,

⁹ka míteskachi eska Krístu nóteru uarhiakia, jimboka uarhirichani jinguni tsíntatiskia, ka eska uarhikua nóteru úakia juramukuni.

¹⁰Enga ísï uarhika, k'amanharhintskuanisï andati, ka eska nóteru méni úaka ambema úkuni; ka eska xánderu tsípeaka Diósïri jimbosï irekani jauati.

¹¹Chájtu májkueni míngorhe je eskajtsï k'amanharhintskuani uarhiraskia ka eskajtsï tsípiti jámaxaka Diósïni marhuakuni enga Krístu Jesusini jinguni jámani jaka.

¹²Ásteruchkaksïni k'amanharhintskua juramucheni jaue, chári anhanhatakuarhu ka ásteru jámani ja je chári atamarhekuani kurhandirakuni.

¹³Ásï jáma je chári anhanatakuani k'amanharhirantani, jimini ménderueni, Diósïni marhuaku je, ísï jáma je enajkijtsï tsíntatiia; ka chári anhanhatakuani Diósïni marhuakutarani íntskukorhentsï je.

¹⁴Jimbokaksïni k'ámanharhintskua nóteru juramucheakia, jimbokajtsï no juramukuani kurhandirakuxaka; chájtsï Diósïri xénhchperakuanisï kurhandirakuparini irekani jakaia.

¹⁵¿Ka andi nénaia? ¿Jiájkanchi iásï k'óru úaia k'amanharhintani jimbokachi Diósïri xenhchperakua jimbosï irekani jaka? ¡Nómendu ambe!

¹⁶¿Andi nójtsï míteski eska, engajtsï nemani kurhandirakujka, eskajtsï imeri jántspirisïnga? ¿Andi nójtsï míteski eska, ekari k'amanharhintskuani kurhandirakuska uarhikueska, ka ekari sési jásïni kurhandirakuska eskakini Diósï sési xéchesïnga?

¹⁷Ka jimboka Diósï ísï uékaska, ka indeni jimbochi diósmaiamu arhintaxaka; náuejkijtsï k'amanharhintskueri jántspiripka, mintsita jinguntsï uékaska íni jurhenguani p'irani engajtsï íntskukorhentatini jaka,

¹⁸ka engaksïni k'amanharhintskua jurajkukia iásïjtsï kaxumbekueri jántspiriskia.

¹⁹Parhakpeni anapuenksïni uandaxexaka, jimbokajtsï chári ísku jánhchakua jimbo ménderueni no úsïnga kurhanguni. Ka ekajtsï urhetku chári anhanhatakua úrempka nósei ambe niátatarani, enga sánhani arhijka sánderu nósesi ambe únhchatarpeni, iásïjtuchka méntkueni íspentsï je chári anhanhatakuani eska sési ambe niátaaka.

²⁰Jimboka jiájkani engajtsï k'amanharhitskuani jántspekuni jámempka, nójtsï marhuakusïrempka kaxumbekuani.

²¹Ka ¿Ambejtsï andaskia ísï irekatini, engaksïni iásï k'uratsetajkia? Jimboka inde ambe uárhikueska.

²²Ka iásï engaksïni k'amanharhintskua jurajkukia, sési ambe niáta je; ka ísïjtsï niáraaka tsípekua ménkisï anapu p'irani.

²³Jimboka k'amanharhintskueri andakua uarhikueska; ka Diósïri ísku intsïmpesïnidi méntkisï anapu tsípekua enga Krístu Jesusi jingunijka.