Read Western Highland Purepecha Romanos 7 Bible Online

Romanos 7 - Western Highland Purepecha bible

Romanos 7

¹Andi cha erachicha, chánksïnisï arhini jaka, engajtsï juramukueri ambe mítetika, ¿Andi no ísïski eska juramukua jiáni jamberkusï juramutspejka enga jamberi tsípeti jánhani janhajka?

²Jimbosï juramukua jimbo uarhiti jatsijti uámbani no jurajkuni enga jámberi uamba japarini jauaka; ka enga na uarhijkia, acheti jémba, juramukua jimbo nóteru úatia juramukuni.

³Jimbosï ísku jándi arhinhajti eka jámaaka máteruni kúrheni, eka uámba nótki uarhini jauaka; k'óru eka uámba uarhijkia, juramukua nóteru úatia juramukuni, ka jamberi úatia máteru nema jinguni uambuchantani.

⁴Chájtujtsï erachicha, májkuenijtsï uarhiskia juramukueri jimbo, jimbokajtsï Krístu jingunintaskia, ka iásïjtsï máterueriskia, imeriskajtsïa enga tsíntaka, eskachi ísï jámani Diósïni kánekua ambe íntskuntaaka.

⁵Jimboka jiájkani engachi ísku jámani jápka, ka engachi k'amanharhintanderku jámani jápka, ka engajtsïni juramukua jarhuatempka sánderu ísku jánhchani, juchari anhanhatakuanchi úrasïrempka ka uarhikuanichi andarasïrempka.

⁶Ka iásï, juramukuajtsïni nóteru juramuchexati, uarhirixakachia imani ambe jimbo engajtsïni jupikatini kámempka, jimbochisï jimbanhe Espirituni jimbo marhuatspeaka ka nóteru ióntki anapu karakata jimboia.

⁷¿Nénachisï arhikuekani jaki jiájkani? ¿Eska juramukua kámanharhintskueska? ¡Nómendu ambe! Enga úka, ji no mítepiringa ambeski k'amanharhintani engarini no juramukua jurhendapiringa. Ji no jurhengorhepiringa ambeski máteru nemani ambema xénhchakuni enga juramukuarhu no arhipiringa: “Ásï jáma máteru nemani ambema xénhchakuni,” arhini.

⁸Ka k'amanharhintskua juramukuani úrasti ka sánderurini mámaru ambe atamarhenhchatarasti; jimboka enga juramukua no jápka, no k'amanharhinhantasïrempti.

⁹Xáni sési irekaxapka nóma juramukuani kurhangutini; ka engarini janocheka juramukua, tsítantaska k'amanharhintskuani,

¹⁰ka ji uarhiska, ka juramukua enga tsípekueri ambepka jíndeni marhuachesti eskani uándikukorhetaraaka,

¹¹jimboka k'amanharhintskua juramukuani jimborini atamarhenchataraska ka juramukua jimborini atasti uándikuni.

¹²Ísï jimbo juramukua sántuesti, ka juramutijtu sántuesti ka kaxumbitini ka sési kámpitini.

¹³¿Andi jiájkani sési jásï amberini jíndeni uándikuski? ¡Nóchka ambe! Sánderu sáni k'amanharhintskuarini uékani xarhacheni, sési ambe úrasti, jíndeni uándikutarani, eska ísï jámani k'amanharhintskua úpiringa iámu uinhapekua xarhatani juramukua jimbo jarhuakorhetini.

¹⁴Mítetixakachi eska juramukua espiritueriska, ka ji k'uiripueska, engani k'amanharhintskua jinguni atarantskata jaka.

¹⁵No jamberini kurhangusïnga ambesïni újki, jimbokani no imani ambe úsïnga ambe engani únhchajka; imani ambe úsïnga engani ikichajka.

¹⁶Ka, egani imani ambe újka engani no únhchajka, ísï jámani juramukua ambakiti jinguniska;

¹⁷Jiájkani nóteruni jískia engani ísï újka, k'amanharhintskuesti engani kámani jaka.

¹⁸Jimbokani sési míteska eska nómbema ambakiti jíndeni jinguni jarhaska, eska jucheti anhanatakua nómbema sésiska; jimboka sési ambe únhchakua jíndeni jinguni jarhaska, k'óruni no únhchasïnga

¹⁹jimbokani no úsïnga sési ambe engani únhchani jarhajka, ka nósesi ambe úsïnga engani no únhchani jarhajka.

²⁰Ka engani imani ambe újka engani no únhchani jarhajka, no jísïni újka, k'amanharhintskuasï újti enga ji jinguni jámani jaka.

²¹Ka jánhaskaskia indeni juramukuani, engani uékani jarhajka sési ambe úni, jimajkurini janochesïndi nósesi jásï.

²²Jimbokarini Diósïri juramukua sési p'ikuarhenhetasïnga,

²³k'óruni exekorhexaka eskani jucheti anhanhatakuarhu kámaxaka máteru juramukua, enga k'amanharhintskueka, ka enga jucheti kurhangukuani támisï pájka.

²⁴¡Inde jucheti jimbo kánekua nósesisti! ¿Andi nérinisï sáni kuájpea, engarini ísï jucheti anhanatakua uéjka atani úandikuni?

²⁵Ji diósmaiamu arhisïnga Diósïni, juchari Acha Jesukristuni jimbo. Jimbokani jucheti mintsitarhu Diósïri juramukuani marhuakusïnga, nájkirukani jucheti jángua jimbo k'amanharhintskueri juramukuani jántspekujka.