Read Western Highland Purepecha Romanos 8 Bible Online

Romanos 8 - Western Highland Purepecha bible

Romanos 8

¹Jimajkanchka nóteruksï ikimenhatia ima engaksï Jesukristu jingunikia.

²Jimbokakini juramukua tsípeti Espiritueri enga Jesukristuni jimboeka, p'ímutantastikini engakini k'amanharhintskua ka uarhikua juramucheni jápka.

³Jimboka, ambe enga juramukua no úempka kénditani, enga xáni ambe anhanatakua únhchempka, Diósï, Uájpani axaspti enga k'uiripu k'amanharhintstini kángorenhapka ka ísï k'uiripueni uarhirini, k'amanharhintskuani k'amajkusti,

⁴eska ísï jámani juramukueri sési ambe jucha jinguni úrakorhepiringa, engachi nóteru anhanhatakuani tsíperani jámkia, iásïchi ísïsi irekakia eska Espíritu na uéjka.

⁵Jimboka, ne engaksï anhanhatakuani tsíperaparini irekajaka, anhanhatakuaksï atamarhesïndi; ka ne engaksï espíritu jinguni irekani jakaia, espiritunksï jirinhakorhentasïndi.

⁶Jimboka uarhikueska iamendu ambe enga xáni anhanhatakua jirinhakorhentka, ka tsípekuesti ka sési jakueni eska xáni espiritu jingunika,

⁷jimboka anhanhatakueri ambe, Diósïni ikiakutarasïnga: Nóksï uékasïndi Diósïni kurhandirakuni, noksï úsïndi kurhandirakuni Diósïni;

⁸ka jimboksïsï no újti Diósïni sési p'ikuastani, ima engaksï sánderu anhanhatakuani sési kámani jaka.

⁹Ka chájtsï no anhanhatakuani chúxapaxaka, chájtsï espiritu jingunixaka, jimboka Diósïri Espiritu cha jinguni irekaxaka. Né enga no kámani jaka Krístueri Espirituni, no Krístueristi.

¹⁰Ka eka Krístu cha jinguni jámani jaka, náuejki chári anhanatakua uarhinia k'amanharhintskua jimbo, espirituksïni tsípekua íntskuntsïndi jimbokajtsï kaxumbeska.

¹¹Ka enga cha jinguni jakaia Diósïri espiritu, enga Jesusini uarhikuarhu tsítantaka, imaksïni tsítachentaati chári anhanhatakuechani jimboka imeri espiritu cha jinguni jámaxakaia.

¹²Jiájkani erachicha nóchi anhanhatakuani kángusïnga tsípekua, jimbochisï no ísï irekaaka eska anhanhatakua na uéjka,

¹³uarhiakajtsï ekajtsï ísï irekaska; ka sésijtsï irekaaka, ekajtsï Espiritu jimbo anhanhatakueri jánhchakuani ataska uandikuni.

¹⁴Iámenduksï Diósï uájpesti ima engaksï uéjka eska Diósïri Espiritu urhekupauaka.

¹⁵Jimbokajtsï no xásï ma espirituni intsïnhaska engajtsï sóntku ménderu chéni jauakia; sánderu sáni, espirituntsï imeni jásï ma intsïnhaska engajtsï úaka ísï p'ikuarherani eskajtsï uájpeska ka engachi jimbo úaka uinhachaparini arhini: ¡Abba Tate! Arhini.

¹⁶Inde Espiritu juchari espirituni xarhatakuesïndi eskachi Diósï uajpeska.

¹⁷Ka engachi uájpekia, juchajtuchi minda jurajkumenhakia, Diósïjtsïni míndaati ka Krístuni jingunichi márku intsïnhaaka, jimbokachi ima jinguni márku nósesi nitamanchaska ka ísï jámanichi márku k'érikuarhu péranhaaka.

¹⁸Mítetixaka eska iásï anapu nósesi p'ikuarherakua, no xarharamaaka t'íntskua jinguni engachi intsínhaka.

¹⁹Iámendu kueraakatechaksï uarhintaxati erokorheni eskaksï xarhatanhaaka néksïsï Diósï uájpe.

²⁰Kueraakatechaksï no ísku jatinisï no úti jángorheni, imasï ísï jatsiapti enga aiatsïperakua jimbo uandarini jaka

²¹eska k'amanharhintskua jurajkuaka, ka eskaksï ísï jámani imecha jinguniuaka, engaksï kánekua sési p'ikuarheraparini jámka Diósï uájpecha.

²²Míteskachi eska iásï jamberi iámendu kuerakata kómu atsïkorhentaxaka, ísï eska ma uarhiti enga sapini kángorhekuekani jarhajka.

²³Ka no kuerakata ambejkusï ísï p'ikuarherani jati, juchajtuchi ísï engachi Espirituni urhetku p'ika, kómu p'ikuarhenhexakachi uékani eskachi p'íkunhantaka ka sésichi p'ikuastanhantani.

²⁴Jimbokachi aiamenhatini p'ímutanhantaska; k'óru enga aiatsperakua t'uíni exenhajkia, nóteru aiatsperakuesïndia, ka jimboka t'uíni exesïngia ¿Nénateru erokani jauaia enga t'uíni exeakia?

²⁵Ka engachi no mítejka ambechisï intsïnhaa, tekantani jarhasïngachi erokorheni.

²⁶Méntkueni, Espiritujtsïni jarhuatanisï jurhajti jimbokachi no uinhapekorheska. Jimbokachi no jurhenaska néna kurhajkorheni eskachi úaka uandamukukorheni eska na sésika; ka espiritujtsïni arhijpechesïndi kómu aparini engachi uandakua jimbojku no újka arhini,

²⁷K'óru ima enga mintsitechani exeajka, mítesti ambe enga Espiritu uéjka, jimboka ísï komarhijpekuasïnga imeri erakukatechani eskamendu Diósï na uéjka.

²⁸Ka ístuchi míteska, eska ne engaksï Diósïni xénhchajka, eskaksï ima iámendu ambe jimboksï sésiuaka, imechani enga Diósï uékaka uandajpantaani.

²⁹Jimboka imani enga míteapkia, imechantu erakuatixaptia eskaksï májkueni jámapiringa eska Uájpa na jámapka, eska ísï jámani ima urhetipiringa uánekua erachichani jinguni;

³⁰ka imechani enga erakuatini jápka, maiampekuaasti; ka imechantu k'érikuarhu péraasti.

³¹Ka enga ísïka ¿Andi úachia jiájkani arhini eska Diósï jucha jinguniska ka eskajtsïni jimbosï nóteru néma úakia ambema úcheni?

³²Diósï, enga uájpani jamberi no p'amojkuka juchantsïni jimbo íntspeni, ¿Nénajtsïnisï no tsípekua jinguni íntskua iámendu ambe ima jinguni?

³³¿Andi ne úa Diósïri erakukatechani arhinharikuauani? Diósïjtsïnisï maiampechejti,

³⁴¿Néjtsïni arhinharhikua? ¿Andi úajtsïni Krístu arhinharhikuni enga uarhika; ka enga tsíntaka, ka enga Diósïni t'irerkandani jakuka, ka engajtsïni arhijpecheni jaka?

³⁵¿Andi nejtsïni úa euantani Krístueri xénhchparakuani? ¿Kómu nitamakua, uandanheata, k'ataperakua, k'arhimakua, ts'irakorhekua, atajperakua, uarhikua?

³⁶Eska karakata na arhijka: “T'ungeni jimbojtsïni uarhikua méntku uanondaxati; Karichintsïni kámsïndi, engaksï uándikunhani pánhajka.”

³⁷Iámendu indeni ambechi andasïnga, imeri jimbo engajtsïni xénhchaka.

³⁸Jimbokani sési mítetixaka eskajtsïni nómbema úaka Diósïri xénhchperakuani kénditacheni: Uarhikua no úati, tsípekuajtu no úati, níksï ánjelicha úa, níksï espiritueri uinhapekuacha úa, níksï i jurhiatekuecha úa níjtuksï ima jurhiatekuecha úa engaksï jurhani jaka,

³⁹ni auanda, ni kauaru, ni máteru Diósï kueraakatajtsïni úa euantani. ¡Nómbemajtsïni úati jarharetani Diósïri xénhchperakua jinguni, imani engajtsïni Krístu, juchari Acha jimbo xarhatacheka!