Read Western Highland Purepecha Romanos 9 Bible Online

Romanos 9 - Western Highland Purepecha bible

Romanos 9

¹Krístuni jimbosïni jurhimbitku uandani jaka, nóksïni chkuándirachexaka, ka Espiritu Sántueri jimbo xarharasïndi eska ísïska,

²eskani kánekua mískorhexaka, ka eskarini uinhamu ataxaka,

³jimbokani uékapiringa eskani ji ikimenhapiringa ka eskani Krístuni euangantapiringa, eskaksï ísï jámani jucheti márkuecha sési uéranchaaka;

⁴engaksï Israeli uájpeka, Diósï erakuasti ka uájperakorheantani. Ka t'íntskua kóndeasti ka pakatperakua ka juramukua íntsaasti, ka tióstani újchakurakuasti ka iámendu ambe aiakuasti;

⁵Ka israelistiksï juchari achamasïchajtu ísï eskajtu Krístu enga k'uiripueni kángorhenhapka, nájkiruka ima Diósïka iámendu amberi. K'éri ambe arhinhe méntkisï. Jo kéri arhinhe.

⁶No arhikuekaxaka eska Diósïri uandakua no marhuaska. Nóksï iámendu israelicha Israeli uájpesti,

⁷ka nóksï iámenduecha uájpesïndi xáni jimbojku jimbokaksï Abraamiri siruekueka, sánderu sáni: “Isakiri jimboksïsï arhinhaati eska sïrukueska.”

⁸Arhikuekaxati eska tátjemba ma no úsïnga Diósï uájpa újpentani; eska aiatsperakua jimbosï újka uájpenhani.

⁹Jimboka aiatsperakua ísï arhisïnga: “Ma uéxurhini jimbo junguaka, ka Sara sapini kángorheati.”

¹⁰Ka no xántku, Rebekajtu Isakirisï kámati sapini, imeri enga juchari táteka.

¹¹Ka engaksï nótki andajpenuempka ka nójtuksï úni jarhani sési o nósesi ambe, Diósï t'uíni eratsekata jatsisptia nénisï erakutini jápi,

¹²jimboka no jángorhekua jimboesïnga, Diósïsï erakpejti. Ka Rebeka arinhaspti: “Uájpa urheti sapichuni marhuakuati”

¹³eskajtu na arhijka karakata: Jakobuni xénhchaska ka Esauni ikiakuska.

¹⁴Ka ísï jámani ¿Nénachisï arhiaia? ¿Eska Diósï no terujkani anhaxurhisïnga? ¡Nóchka ambe!

¹⁵Jimboka Diósï Moisesini arhispka: “Ne engani ji uékaka ji púakunhchantaska, ka p'amojkuaka néni engani ji uékaakap'amojkuni.”

¹⁶Jiájkani no uándakorhekua jimboesïndi, ka nójtu jimboka nema jángorhekuaka, Diósïsï p'amojkujti ne engani uékaaka p'amojkuni.

¹⁷Jimboka Diósï Ejiptu anapu irechani arhisïnga: “Jimbokinisï juramuti úka, eskari t'u jinguni xarharaaka jucheti uinhapekua, ka eska ísï jámani iámu parhakpeni mítenhaaka”

¹⁸Ka Diósï p'amojkusïndi ne engani ima uékaaka, ka mintsita chuperakusïndi néni enga uékaaka chuperakuni.

¹⁹Ka t'úri uandaaka: ¿Andisï Diósï jiájkani arhinharikpejki enga nónema újkani Diósïri eratsekuani ménderuenirantani?

²⁰Ka ¿Andisï t'u jámkia Diósïni ambema kurhamarheni? ¿Andi úsïni tsúntsu arhini imani enga úka; andirinisï ísï jájku arhini?

²¹¿Andi no úa tsútsu úri ma, májkueni k'uerekua jimbo máru tsúntsuechani ambarhati úani, engaksï k'ératicha ataraaka, ka máteru arisku járhati engaksï ísku nemecha ataraaka?

²²Méntkuenisti imani ambe jimbo enga Diósï úka, Uékasti xarhatani néna ikiasïni, ka náxani uinhapitiski. Jimbosï xáni kánekua tekaakuantajti imechani engaksï ikiatajka ka engaksï k'amajkunhaaka.

²³Indeni ambe ústi, exerpeni uékani na enga xáni k'érika ka na enga xáni p'amojkuajka imechani enga erakuaka imeri t'instkua exeraani,

²⁴ka juchantsïnisï erakuatini jati. Ka nóksï judiouechajkusï erakunhati, máteru ireta anapuechajtuksï erakunhasti.

²⁵Eska Oseasiri karakata na arhijka: “Imechani engaksï no juchetipka Jucheti ireta arhiauaka, ka imani engani no xénhchempka, jucheti xénhchakateuati.

²⁶Ka jima engaksï arhiapka: Nójtsï jucheti ireteska, arhinhani Jimajtsï arhinhaaka eskajtsï Diósï tsípiti uájpeska.”

²⁷Isaiasijtu Israeli anapuechani ísï arhiaspti: “Na uéjki israelicha xáni uáneni eska k'éri japundarhu anapu kutsari, namuntkuksï p'ímutanhantaati,

²⁸jimboka Acha sóntkusï arhinharhikpeakia.”

²⁹Ka eska Isaiasijtu na uandaka: “Ekajtsïni k'éri Acha sapichani no kóndeapiringa, ísïchi japiringa eskaksï sodomaecha ka gomorecha na jaka.”

³⁰¿Nénachisï uandaia jiájkani? Eskaksï máteru iretecha engaksï no kaxumbekua jirinhantani jámani jápka, eskaksï kaxumbekua xéntaska, imani kaxumbekua enga jakajkukua jimboejka.

³¹Ka israelicha engaksï kaxumbekueri juramukuani jirinhani jámani jápka, eskaksï ima no xéntaska

³²¿Andisï ísï úkorhe? Jimbokaksï no jakajkuparini jirinhantaska, ka ísï jámanksïsï tsakapu téksarhutatarakua jimbo kuarhatseti,

³³ísï eska na karakata jaka: Ji Sioni iretarhu tsakapu ma péraska; Engaksï jimbo kuarhatseaka; ka ne emanga indeni mintsikaaka ima no k'uratsetanhaati.