Read Western Highland Purepecha 1 Corintios 10 Bible Online

1 Corintios 10 - Western Highland Purepecha bible

1 Corintios 10

¹Erachicha, no uéksïnga eskajtsï no mítetini uandaaka, eska juchari tua anapuechani janikua ma k'umantskakuaspka ka eskaksï japunda charhapitirhu parhimespka,

²ka ísï jamaniksï iámenduecha janikuarhu ka japundarhu itsï atajtsïnini p'itaraspti, ka Moisesi jinguni májkuenhantaspti.

³Ka iámenduechani imeri espiritu t'ireraspti,

⁴ka iámenduechaksï imeri espiritu itsïmaspti, jimbokaksï itsïmasïrempka k'erenderi espirituni enga imechani pánbeauenka, ka k'erenda Krístuespti.

⁵Nájkiruka ísïpka, jímesï enga nónema irekapka sánderuksï uánespti, ima engaksï Diósïni no jaiapanhetarantapka, ka jimajkuksï uarhipaspti.

⁶Isïchkasï úkorhepti, ka eska marhuaka janhaskani eska nósesiska, nósesi ambe tsitinhchani, ísï eskaksï ima na tsitipka.

⁷Ka ásïchka eratakatechani diósïra je ísï eskaksï máru na úpka, eska karakata na arhijka: “Uaxakanhantaspti t'irenhani ka kauinhani ka tátsekua jurajkutakorhenhataspti nósesi jánhani tsípekorhenhani.”

⁸Ka ásï nema ísku jándi ukorhe, ísï eskaksï máru na ísku jándipka, ka ma jurhiatekua jimbojkuksï ma ekuatse tanimu míli uarhinhani.

⁹Níjtuchi jámaa Achani ts'éjkuni, ísï eskaksï máru na ts'éjkupka ka uarhipasptiksï engaksï akuitsecha katsarheapka.

¹⁰Ka ásïjtu nema jame Achani uandatseni, ísï eskaksï máru na uandatsepka ka tátsekua ánjeli atajpiti imani uándikuani.

¹¹Iámendu inde ambe úkorhespti ka juchachi arhintasïnga jimboka karakata pakaraska, ka arhistachexatijtsïni juchantsïni engachi iásï irekani jaka.

¹²Jiájkani ne enga sési anhaxurhikorhetini jakajkuni p'ikuarerani jaka, ásï jurajkutakorhe ka kuarhatseni.

¹³Chájtsï nóma ts'ejperata nitamanchaska engajtsï no úaka jakukuni; ka Diósïni mintsikaxaka eskaksïni no jurajkuaka eskajtsï jukari jamberi ts'éjkunhaaka, eskaksïni jarhuataaka tekantani ka sóntkujtsï uérakuni ekajtsï ts'éjkunhaaka.

¹⁴Jiájkani jucheti erachicha, diósï eratakatechani kéndikukua je.

¹⁵Sési jimbokaksïnisï arhini jaka, jimbokajtsï cha eratsekua kámasïnkia.

¹⁶¿Andi indeni, itsïmatarakua engachi jupikajka ka Diósïnichi kurhakuni eska újchakuraka, nójtsïni Krístueri iurhiri jimbo májku k'éri úntaxaki? Ka inde kurhindani engachi ústatsperajka, ¿Nójtsïni Krístu jingunitarantaxaki?

¹⁷Ka náuejkichi jucha uáneni, k'óru kurhinda májkuesti engakachi ústajka ka engachi arhajka.

¹⁸Israelichani exea je, na engaksï jámka: Inde engaksï kejtsïtakate ambe arhajka, ¿Nóksï kejtsïtarakua jinguni májkuentatixaki?

¹⁹¿Nénateruksïni arhia? ¿Kéjtsïtakatasï ambe me, engaksï diósï eratakatecha kéjtsïtamenhajka? O, ¿Diósï eratakatasï ambe me?

²⁰Nochkaksï ima no Diósïnisï kéjtsïtakuni jaki andi, Nóambakitinksïsï kéjtsïtakuni jati, ka ji no uéksïnga eskajtsï nóambakiticha jingunintaaka.

²¹Chájtsï no úaka Acheri itsïmakua arhani, ka ménderu nóambakiticheri itsïmakuantu arhani; nójtsï úaka Acheri t'irekuani arhani, ka ménderu nóambakiticheri t'irekuantu arhani.

²²¿Andi nema úa Achani nósesi p'ikuastani? ¿Andi juchachi sánderi uinhapitiski eska Acha?

²³Chájtsï uandasïnga: “Jucha úaka úni ambe engani jucha uékaaka” ísïsti nájkiruka no iámendu ambe marhoatspejka, “Iámedu ambe sésikua jarhasti úni” k'óru no iámendu ambe jarhojpesïndi.

²⁴Máteruechani jarhuata je sési irekorheni, ásï chájku úeke je sési irekakorheni jarhani.

²⁵Úakajtsï iámendu ambe arhani, enga k'uiripeta atarantsti atarantajka, ásï jáma je kurhangorheni ¿Úaa arhani o no ua?,

²⁶Jimboka Acheriska parhakpeni ka iámendu ambe enga xáni jaka.

²⁷Ekaksïni no jakajkuti ma p'imarheaka t'ireni, ka cha ninhejchani, iámendu ambe a je engaksïni kejtsïtacheaka ka ásï jáma je kurhangorini nani uéraski akua.

²⁸Ka engaksïni nema arhiska: “Ari kéjtsïtarakuarhu pérakatespti”, jiájkani ásï a je, jimbokajtsï míteskia eska nósesiska, ka miántani engaksïni arhika,

²⁹ka no chéti eratsentskuasïni uandanheata arhini jaka, máruteruecherinisï arhini jaka. ¿Nénajtu ua jucheti sési p'ikuerherakua, máteru nema arhimarheni jarhani, imeri eratsentskua jimbo?

³⁰Ekani ji t'irekua jimbo diósïmeiamukua arhijka, ¿Andisïni, xukajchanhaa engani arhani jarhajka, ekani diósmeiamu arhiparini arhajka?

³¹Jiájkani engajtsï t'irejka o engajtsï itsïmajka, o ambe uéjki engajtsï újka, eska méntkisï Diósï k'érikuarhu péranhaaka.

³²Ásï tandonhasta je judiouechani ka no jakajkutichani ka ni Diósïri tángorhekuarhu anapuechani,

³³jíjtuni, jangorhesïnga no jandiojku úekani sési pakarakuekani, ka iámenduechani jámaska marhoakuani, uékani eskaksï p'ímutantskateuaka.