Read Western Highland Purepecha 1 Corintios 12 Bible Online

1 Corintios 12 - Western Highland Purepecha bible

1 Corintios 12

¹Erachicha, ka espiritueri ambe, ji uéksïnga eskajtsï sési jánhaskaaka, ambe enga espiritu íntsïnpejka.

²Chájtsï miáni jaka engajtsï nótki jakajkutipka, na engajtsï sési mínharhintenga jurajkutakorheni, diósï eratakata nunuxichani chuxapani.

³Ka iásï, jimbosïni uéjka eskajtsï míteaka, eska nónema uaka Diósïri Espiritu jimbo uandani “¡Jesusini útakuni!” Ka nójtu nema úati uandati “¡Jesusi Achesti!” Enga no Espiritu Sántu jimbo uandani jauaka.

⁴K'óruksï mámaru járhasti Esperitueri intsïnperatecha, ka Espiritu, májkuesti, enga iamu ambe íntspejka.

⁵Ka nájkiruka mámaru jasï jimbo marhoanhani jarhajka. K'óru Acha májkuesti,

⁶Mámaru ambe jurhenanhasti únhani, kóru májkuesti Diósï enga újka, eska iámendu ambe ísï únhaaka.

⁷K'órujtsïni Espiritu jurhengua táchani kóndesïndi, eskachi xarhataaka marhuatspeparini.

⁸Ka indeni Espiritu jimbo, Diósï kóndeasti eskaksï máru mímixekua jinguni uandaaka; ka máteruechani eskaksï jurhenaaka uandani.

⁹Ka máteruechani Espiritu kóndeasïndi eskaksï Diósïni mintsikaaka, ka máteruechani eskaksï úaka p'amenchatichani ambakerantaani.

¹⁰Ka máteruechani eskaksï úaka milagru úani; ka máteruechani eskaksï úaka Diósïni jimbo uandani; ka máteruechani eskaksï úaka nósesi jasï, ka sési jasi espírituechani míteantani; ka máteruechani eskaksï úaka mámaru járhati uandakuechani uandaani, ka máteruechani eskaksï úaka mámaru járhati uandakua kuerantaani.

¹¹Ka májkuesti Espiritu enga jimbo újka iámendu inde ambe únhani, ka enga Espiritu mándani arhini kóntpejka, eska ima na uéjka ka ne engani uékaka.

¹²Jimboka ísï eska juchari anhanhatakua na mámaru ambe jukaka ka mámaru marhoani, ka k'óru májku anhanhatakueni. Krístueri anhanhatakuajtu méntkuenisti.

¹³Ka iámenduchi májku Espiritu jimbo itsï atajtsïkunhantaska, ka ísïchi májku anhanhatakua ukorhentani, nájkirukachi máru judioueka ka máteruechaksï no judioueni, ka máruksï jántspirini ka máruksï no jántspirini; iámenduechantsïni májku Espiritu kueraasti.

¹⁴Jimboka anhanhatakua no ma ambejkusï jukaka, mámaru ambe jukasti.

¹⁵Eka jantsiri uandapiringa “Ji nóteru anhanhatakua jinguniskia jimbokani no jájkiska” ¿Andi jimbo nóteru anhanhatakua jinguniuaia?

¹⁶Ka enka kutsïkua uandapiringa “Ji nóteru anhanhatakua jinguniskia, jimbokani no éskueska” ¿Andi jimbo nóteru anhanhatakua jinguniuaia?

¹⁷Eka iamu anhanhatakua éskuepiringa, ¿Néna kurhapirinia? Ka eka iamu anhanhatakua kutsïkuepiringa, ¿Néna sïpirupirinia?

¹⁸Ka Diósï sési eratsesti ka iámendu ambe jima jatsikpesti nani enga marhoauaka.

¹⁹Eka iámendu májku ambe úpiringa ¿Anhanhatakua ambe úni xani ambe jukapirinki?

²⁰Jiájkani nájkiruka májku anhanhatakueka, k'óru mámaru ambe jukasti, anhanhatakua.

²¹Eskua no úsïndi jájkini arhini: “Nókini uetarhenchasïnga.” Níjtu ejpu újki jantsirichani arhiani: “Nóksïni uetarhenchasïnga.”

²²Ka indeksï sánderu uranhasïndi, engaksï no uinhapitini xarharajka.

²³Ka ambe enga k'uratsekueni xarharajka juchari anhantakuarhu sánderuchi sési kaasïnga, Ka sánderuchi sési tipijchukorhentasïnga,

²⁴ka no jamberi uétarhisïndi eska ónharhinhaaka, ka ójkunhaaka ka óndunhaani. Jimboka Diósï anhanhatakuani májku k'eri úntaska, ka sánderu sési jájkuasti ambe enga no k'uanijka orhetanhani,

²⁵ka eskaksï iámenduecha jarhojperaaka, juchari anhantakuarhu anapuecha, ka nóksï táchantku ísï jámani.

²⁶Eka nani anhanhatakuarhu p'ameaka, iámu anhanhatakua p'ikuarheraati; ka nani enga sési p'arhirenhaska, ka sïpiati jatsikunhani, iámu anhanhatakua sési pikuarherantaati.

²⁷Ka iásïjtsï cha Krístu jinguniskia, ka mándani arhintsï jatsinhaska ambe ma jimbo marhuani.

²⁸Ka Diósï tángorhekuarhu péraasti eskaksï marhuakuaka, urheta uandakua párichani, ka tátsekua arhijtsïkpirichani, ka tátsekua jurhentpirichani; ka tátsekua milagru úrichani, ka tátsekua engaksï ambakerpentani újka, ka jarhojpirichani ka urhejtsïkurhichani ka mámaru jásï uandakua uandarichani.

²⁹Nóksï iámendu uandakua páristi, níksï iámendu Diósïni jimbo uandajki, níksï iámendu jurhentpiri, níksï iámendu újki milagru úani,

³⁰níksï iámendu ambakerpentani újki. Ka níksï iámendu újki mámaru jasï uandani, óksï uandakuechani kuerantaani.

³¹Chájtsï jinisï jángorhentaaka, sánderu ambakiti Espiritueri uinhapekuechani p'iuani. Ka Iásï sánderu ambakiti ambeksïni mítetaraaka.